Oware nọ Who re Ru nọ A te bi Kienyẹ Owhẹ

Se Emuhọ 37:23-28; 39:17-23 re who wuhrẹ oware jọ no iku Josẹf ze. Muẹrohọ epanọ o thihakọ te okenọ a je kienyẹe.

Kiẹ eme nọ e wariẹ e riẹ họ. Fikieme a ro mukpahe Josẹf tere? (Emu. 37:3-11; 39:1, 6-10) Kọ ẹvẹ Josẹf o thihakọ kri te nọ a mukpahe iẹe? (Emu. 37:2; 41:46) Kọ ẹvẹ Jihova o ro fiobọhọ kẹ Josẹf? Kọ eme Jihova o ru hu?—Emu. 39:2, 21; w23.01 17 ¶13.

Gbẹ kiẹ. Ebaibol ọ ta nọ aye Pọtifa o gu ọrue fihọ Josẹf uzou. Rekọ o vuẹ omai hi inọ Josẹf ọ jẹ ta nọ ọrue o bi gu fihọ iẹe uzou na. Ẹvẹ eria Ebaibol nọ e rrọ obotọ na e sai ro fiobọhọ kẹ omai riẹ oware nọ o sae jọ nọ o wha riẹ ze nọ Josẹf ọ gbẹ rọ ta ẹme ọvo ho? Kọ fikieme a gbe ro kere oware kpobi nọ o nwane via họ Ebaibol ho? (Itẹ 20:2; Jọn 21:25; Iruẹru 21:37) Emamọ uruemu vẹ Josẹf o wo nọ o lẹliẹ e riẹ thihakọ ebẹbẹ yena?—Mae. 7:7; Luk 14:11; Jem. 1:2, 3.

Eme who wuhrẹ no iku na ze? Nọ omara nọ:

• ‘Kinọ orọnọ mẹ yọ olele Jesu na, ẹvẹ ahwo nọ a ti mukpahe omẹ a ti ru omẹ?’ (Luk 21:12, 16, 17; Hib. 10:33, 34)

• ‘Kọ eme u fo nọ me re ru obọnana nọ o sai fiobọhọ kẹ omẹ thihakọ nọ a te mukpahe omẹ?’ (Ol. 62:7, 8; 105:17-19; w19.07 2-7)