Amono A ti Kpobọ Odhiwu?
Uyo nọ Ebaibol na ọ kẹ
Ọghẹnẹ ọ salọ umutho ahwo jọ evaọ usu Ileleikristi nọ i fi ẹrọwọ họ iẹe re ọ kpare ae kpobọ odhiwu nọ a te whu no. (1 Pita 1:3, 4) Nọ Ọghẹnẹ ọ tẹ salọ ahwo nana no, o gwọlọ nọ a re kru ẹrọwọ rai te urere jẹ daoma dhesẹ emamọ uruemu ẹsikpobi re a sae wo osa obọ odhiwu rai na te obọ.—Ahwo Ẹfisọs 5:5; Ahwo Filipai 3:12-14.
Eme ahwo nọ a bi kpobọ odhiwu a ti ru evaọ obei?
A te jọ ivie gbe izerẹ nọ i ti lele Jesu su evaọ ikpe odu (1,000). (Eviavia 5:9, 10; 20:6) A te jọ “idhiwu ekpokpọ,” hayo egọmeti obọ odhiwu na, enọ i ti su “otọakpọ ọkpokpọ” na, hayo ahwo kpobi nọ a te rria akpọ na. Ahwo nana nọ a te jọ obọ odhiwu su na a ti fiobọhọ kẹ ahwo-akpọ zihe ruọ ahwo ọgbagba wọhọ epanọ Ọghẹnẹ ọ gwọlọ no emuhọ ze.—Aizaya 65:17; 2 Pita 3:13.
Bro ahwo a te kpare kpobọ odhiwu?
Ebaibol na o dhesẹ nọ Ọghẹnẹ ọ te kpare ahwo nọ a bu te idu udhuhrẹ-gbene (144,000) kpobọ odhiwu. (Eviavia 7:4) Evaọ obe Eviavia 14:1-3, Jọn ukọ na ọ jọ eruẹaruẹ ruẹ “Omogodẹ na nọ o dikihẹ Ugbehru Zayọn, avọ ahwo idu udhuhrẹ-gbene (144,000) nọ e rrọ kugbei.” Evaọ eruẹaruẹ nana, “Omogodẹ” na o dikihẹ kẹ Jesu nọ a kpare kpobọ odhiwu no. (Jọn 1:29; 1 Pita 1:19) “Ugbehru Zayọn” na u dikihẹ kẹ ọkwa okpehru nọ Ọghẹnẹ ọ kẹ Jesu avọ ahwo idu udhuhrẹ-gbene (144,000) na nọ i ti lele ei su evaọ obọ odhiwu na.—Olezi 2:6; Ahwo Hibru 12:22.
Ebaibol na o se enọ “a se jẹ salọ” nọ i ti lele Jesu su evaọ Uvie na “uthuru okakao.” (Eviavia 17:14; Luk 12:32) Onana u dhesẹ nọ a tulo ho nọ a tẹ rehọ ae rọ wawọ igodẹ Jesu kpobi.—Jọn 10:16.
Eriwo ọthọthọ nọ ahwo jọ a wo kpahe enọ i ti kpobọ odhiwu
Eriwo ọthọthọ: Ahwo owoma kpobi a ti kpobọ odhiwu.
Uzẹme ẹme na: Ọghẹnẹ ọ ya eyaa nọ ahwo owoma buobu a ti wo uzuazọ ebẹdẹ bẹdẹ evaọ otọakpọ na.—Olezi 37:11, 29, 34.
Jesu ọ ta nọ: “Ohwo ọvo o ri muvrẹ kpobọ odhiwu hu.” (Jọn 3:13) Onana u dhesẹ nọ ahwo owoma nọ e kake rehọ Jesu whu wọhọ Abraham, Mosis, Job, gbe Devidi, a kpobọ odhiwu hu. (Iruẹru Ikọ 2:29, 34) Ukpoye, a wo ẹruore inọ Ọghẹnẹ ọ te kpare ae zihe ziọ uzuazọ evaọ otọakpọ na.—Job 14:13-15.
Ebaibol na o se ẹkparomatha nọ a te jọ kpare ahwo kpobọ odhiwu na “ẹkparomatha ọsosuọ na.” (Eviavia 20:6) Onana u dhesẹ nọ ẹkparomatha ọfa ọ te jariẹ. Oye họ ẹkparomatha nọ a te jọ kpare ahwo ziọ otọakpọ na.
Ebaibol na o wuhrẹ nọ evaọ okenọ Uvie Ọghẹnẹ u te mu otọakpọ na họ esu no, “uwhu o gbẹ te jọ ofa ha.” (Eviavia 21:3, 4) Otọakpọ na eyaa nana e sae jọ rugba keme a re whu evaọ obọ odhiwu hu.
Eriwo ọthọthọ: Ohwo kpobi ọ sae salọ kẹ omariẹ sọ ọ gwọlọ kpobọ odhiwu hayo sọ ọ gwọlọ jọ otọakpọ.
Uzẹme ẹme na: Ọghẹnẹ ọvo ọ rẹ salọ evaọ usu Ileleikristi nọ i fi ẹrọwọ họ iẹe, enọ i ti wo “osa use obọ odhiwu” na, koyehọ ẹruore uzuazọ obọ odhiwu. (Ahwo Filipai 3:14) Orọnikọ a rẹ salọ ohwo fikinọ ọ gwọlọ kpohọ odhiwu hu.—Matiu 20:20-23.
Eriwo ọthọthọ: Ẹruore uzuazọ ebẹdẹ bẹdẹ evaọ otọakpọ na o woma te orọ obọ odhiwu hu, yọ ahwo nọ a te ahwo nọ a re kpobọ odhiwu hu ae a te jọ otọakpọ na.
Uzẹme ẹme na: Ọghẹnẹ o se ahwo nọ a ti wo uzuazọ evaọ otọakpọ na “ahwo mẹ,” “ahwo mẹ nọ mẹ salọ,” gbe enọ “Jihova ọ ghale no.” (Aizaya 65:21-23) A ti wo uvẹ nọ a ti ro ru ẹjiroro nọ Ọghẹnẹ o wo kẹ otọakpọ na gba, koyehọ a ti wo uzuazọ ọgbagba evaọ otọakpọ nọ o zihe ruọ aparadase no, yọ a te rria bẹdẹ bẹdẹ.—Emuhọ 1:28; Olezi 115:16; Aizaya 45:18.
Eriwo ọthọthọ: A rẹ nwane rehọ inọmba na, idu udhuhrẹ-gbene (144,000) nọ a fodẹ evaọ obe Eviavia na dẹe he, keme u dikihẹ kẹ oware jọ.
Uzẹme ẹme na: Dede nọ whọ rẹ jọ obe Eviavia ruẹ inọmba nọ i dikihẹ kẹ eware sa-sa, a rẹ rehọ ejọ wọhọ epanọ a kere i rai. Wọhọ oriruo, obe Eviavia o ta kpahe “edẹ ikpegbivẹ erọ ikọ ikpegbivẹ Omogodẹ na.” (Eviavia 21:14) Joma ta kpahe oware nọ u ro mu omai ẹro nọ inọmba na, idu udhuhrẹ-gbene (144,000) u dikihẹ kẹ oware ofa ha.
A jọ obe Eviavia 7:4 fodẹ “unu ahwo nọ a kpe oka họ na [hayo, enọ i ti kpobọ odhiwu], idu udhuhrẹ-gbene (144,000).” Evaọ eria nọ e wariẹ oria ikere nana họ, a fodẹ utu ahwo ọfa jọ, “ogbotu obuobu, nọ ohwo ọvo ọ sai kele he.” “Ogbotu obuobu” na o ti wo esiwo evaọ obọ Ọghẹnẹ re. (Eviavia 7:9, 10) O hae jọ nọ inọmba na, idu udhuhrẹ-gbene (144,000) u dikihẹ kẹ oware ọfa jọ, Ebaibol na ọ hae te gbẹ fodẹ ogbotu obuobu nọ a sai kele mu hu na ha, keme ohẹriẹ ọvuọvo o hae te jọ utu ahwo ivẹ nana ha.a
Ofariẹ, Ebaibol na o dhesẹ nọ ahwo idu udhuhrẹ-gbene (144,000) na yọ enọ “a dẹ . . . no udevie ahwo-akpọ ze wọhọ ibi ọsosuọ.” (Eviavia 14:4) A rẹ rehọ ẹme na, “ibi ọsosuọ” ro dhesẹ umutho eware nọ a rehọ evaọ usu eware nọ e rrọ buobu. Fikiere, Ebaibol na ọ be rehọ ẹme nana ro dhesẹ ahwo nọ a ti lele Jesu su evaọ obọ odhiwu. A te jọ obọ odhiwu su otọakpọ na nọ ahwo buobu gbidi gbidi a te rria.—Eviavia 5:10.
a Epọvo na, profẹsọ jọ nọ a re se Robert L. Thomas o kere kpahe inọmba na idu udhuhrẹ-gbene (144,000) nọ a fodẹ evaọ obe Eviavia 7:4 na inọ: “Inọmba nana yọ unu nọ a rẹ rehọ dẹe keme a fodẹ unu ahwo nọ e rrọ 7:9 na ha. O hae jọnọ inọmba nana u dikihẹ kẹ oware ofa jọ, kiyọ inọmba ọfa nọ a rẹ gbẹ rehọ dẹe evaọ obe na o rrọ họ.”—Revelation 1-7: An Exegetical Commentary, ẹwe-obe avọ 474.