¡Aʼ stzalabʼal sunilbʼal ha qʼinal sat Txʼotxʼ txʼotxʼ!
Huneʼ hum tiʼ, xwatxʼelax teʼ yu ha wohtajnhen mak xwatxʼen Txʼotxʼ txʼotxʼ bʼoj sunil tzet ay sat Txʼotxʼ. Cha kuyuʼ tzet sbʼi Komam Jahaw, Yaʼ xwatxʼen huneʼ Txʼotxʼ tiʼ. Hakpaxtuʼ xin, xhko kuyuʼ tzet yuxin swatxʼe Komam Jahaw anma bʼoj tzet chu ha waʼni yaqʼbʼilxa ha qʼinal stzalalbʼal ha wanma sat Txʼotxʼ txʼotxʼ.
Wal sunil echele tiʼ, xhjechmahan ta chʼokoj stxumlubʼal ha kʼul yinh sunil tzetet-taj ay sat huneʼ hum tiʼ. Yunhe ha txumni hunun echele tiʼ, kaw yilal ha kuyni Stzotiʼ Komam Jahaw stzʼibʼnhebʼil sat teʼ. Haknhetuʼ xin, chubʼ ha wu ha kuyni tzetet-taj skʼulal haltebʼil yu Komam Jahaw yinh Stzotiʼ, bʼoj tzet bʼelal kʼul ha wuni, yunhebʼal yijnisbʼa skʼulchʼanil skʼul Komam Jahaw ta winh.
Huneʼ hum tiʼ chu ha wanikoj skuybʼanil hunxa anma. Chu pax a wanikoj skuybʼaniloj a wuninal yunhebʼal yohtajnhen Komam Jahaw. Ta ayach yul huneʼ konhobʼ bʼay txʼihal anma mach chu yilni hum, chu ha yeni echele ayayoj sat teʼ, yunhe stxumni anma tzet kaw choche Komam Jahaw yinh, lawituʼ xin, chu skuynuj hebʼyaʼ hun majanxa anma.
Kaw xhjochehan ta huneʼ kuybʼanil tiʼ chu s-hajni stxumbʼanil ha kʼul, yunhe ha chani sunil tzet xalte Komam Jahaw, hakpaxtu xin, chu ha kolni hunxa anma tzet chu yiʼni sqʼinal yibʼanh Txʼotxʼ txʼotxʼ yinh stohbʼal qʼinal.