¿Tzet qʼinalehal xʼil-lax yul paraíso?

Kaw txʼihal tzetet skʼulal xaʼ Komam Jehová tet yaʼ Adán bʼoj yaʼ Eva (Génesis 1:28)

Komam Jehová xwatxʼen yaʼ Eva, yaʼ bʼabʼel ix, yaʼni Komam yaʼ yixaloj yaʼ Adán (Marcos 10:6, 7).

Yet xwatxʼen Komam Dios yaʼ Adán bʼoj yaʼ Eva mach mule yinh hebʼ yaʼ. Kaw kʼul snimanil bʼoj snabʼal hebʼ yaʼ.

Yul paraíso bʼay xʼehikʼoj hebʼ yaʼ, Edén sbʼih, kaw kʼulchʼankanoj: ay huneʼ haʼ nimej haʼ, ay hej teʼ teʼ bʼoj noʼ noqʼ.

Stzotel yaʼ Jehová bʼoj hebʼ yaʼ yuh skuylax yuni tzetet skʼulal. Ta choche hebʼ yaʼ ehojkʼoj sunilbʼal qʼinal sat txʼotxʼ txʼotxʼ, yilal yabʼentoj hebʼ yaʼ tzet chal Komam Dios.

Komam Dios yal yaʼ ta mach chislotoj hebʼ yaʼ sat huneʼ teʼ teʼ (Génesis 2:16, 17)

Komam Dios yal yaʼ tet yaʼ Adán bʼoj yaʼ Eva ta mach slotoj hebʼ yaʼ sat huneʼ teʼ teʼ ay yul paraíso. Ta chislobʼtoj hebʼ yaʼ sat teʼ, chikamoj hebʼ yaʼ.

Huneʼ naj ángel xpakʼikoj yinh Komam Dios, haʼ naj Matzwalil.

Naj Matzwalil mach choche naj ta syijye hebʼ yaʼ tzet chal yaʼ Jehová. Yuxin xʼoknikoj huneʼ noʼ labʼah yuh naj yuh yalni ta mach chikamoj yaʼ Eva ta chislotoj yaʼ sat teʼ. Yal naj ta chʼelokoj yaʼ hakaʼ Komam Dios. ¡Niman leqʼtiʼal! (Génesis 3:1-5.)