Nombaz

6 Jeuova gwaan taak tu Muoziz an se: 2 “Taak tu di Izrelait piipl dem an tel dem se, ‘Ef wan man ar wan uman pramis Jeuova se dem a-go bi wan Nazarait, 3 Im no fi jringk no wain ar no ada kain-a lika. Im no fi jringk wain viniga niida, ar no viniga we av alkowal iina it. Im no fi jringk no jringks we mek wid griep niida ar nyam di griep dem niida no mata ef dem dis pik dem ar dem jrai. 4 Fi az lang az im a wan Nazarait, im no fi iit notn we kom fram di griep vain, ar notn we kom fram griep we no raip, ar we kom fram di griep skin. 5 “An fi aal a di taim wen im a stil wan Nazarait, im no fi kot aaf im ier aafa im ed. Im fi tan uoli an mek im ier gruo til im liv out di taim we im pramis Jeuova se im wuda bi wan Nazarait. 6 Fi di taim we im se im wuda liv im laif fi Jeuova, im no fi go nier no ded badi niida. 7 So aal ef im faada ar im mada ar im breda ar im sista fi ded, im no fi go nier dem ded badi so dat im stie kliin iina Gad yai, kaa im av sitn pan im ed we shuo se im a wan Nazarait fi Gad. 8 “‘Fi aal di taim wen im a wan Nazarait, im uoli tu Jeuova.’ 25 Jeuova a-go sumail wen im luk dong pan yu, an im a-go tek kier a yu iina wan speshal wie. 26 Jeuova a-go gud an kain tu yu, an im a-go gi yu piis.”’ 27 An dem fi yuuz mi niem wen dem a bles di Izrel piipl dem, so dat dem wi get di blesn dem fram mi.”