Fram di Jineral Sekiteri
Mi Jamiekan Piipl,
Di uol a wi fram di Baibl Sosaiyati a di Wes Indiz fiil wel bles kaa wi tek paat iina wan Baibl chansilieshan. It riili toch an muuv yu aat wen yu sidong an si Gad wod tek laif. Dem we chansiliet di Baibl kyan tel se piipl ier Gad vais klier klier wen im taak iina di langwij we di piipl dem baan an gruo op a taak, an a wan speshal sitn dem fiil an go chuu wen dem ier Gad wod iina dem uona langwij.
Wen wi chansiliet di Baibl iina di langwij sumadi andastan di muos, it kaaz wi fi tingk diipa bout ou di Baibl riich out an toch piipl laif. Di chansileshan wok mek wi tingk muo bout wa wi biliiv iina, an dat de nou mek wi tingk aad aad bout wa wi fi du fi mek piipl fala Jiizas. Aal a dem sitn ya jraa wi kluosa tu di sitn dem we wi lorn fi du kaaz wi a kristiyan, dem jraa wi kluosa tu wi kolcha an wi piipl dem.
Wi glad fi Dr. Fiet Lintan, wan a di Baibl Sosaiyati a di Wes Indiz buod memba dem. A shi a di fos wan we boj fi chansiliet di Baibl iina Jamiekan. Dis ya staat fram wie bak wen, iina di 1960’z. Shi tek ar taim an push fi di Jamiekan Baibl wen shi taak tu di Baibl Sosaiyati a di Wes Indiz Buod memba dem. A dat de mek di Buod staat fi tingk se dem kuda chrai out Baibl chansilieshan iina Jamiekan an ou dis wuda gud. Wi waahn fi se plenti tangks tu dem a yaad an tu dem abraad we wok wid wi fi chansiliet di Nyuu Testiment. Wi tangk evribadi we kom kom elp wi pan di wie -dem we elp wi muuv paas di big an impuotant step dem iina chansilieshan, so wi kuda riich we wi did plan fi go.
Az wi did a wok aad fi don di chansilieshan, uol iip a taim, wi wuda memba Sient Paul an ou im did wok fi bil op di choch wen it dis a staat out. Wen wi memba, dis push wi fi go aan tu. Siek-a dat de, wi kyaahn elp bot fiil wel glad bout wa gweehn apm an wa kyan apm wid ou di choch riich out tu piipl iina Jamieka. Wi a aks unu fi prie az Gad taak an riich out tu di Jamiekan piipl dem.
Rev. Courtney Stewart
General Secretary
Bible Society of the West Indies
24 Hagley Park Plaza
Kingston 10
Jamaica, W.I.