Yu Tingk Ded Piipl Kyan Liv Agen?

1. Wa a di gud nyuuz bout wa a-go apm tu ded piipl?

Wen Jiizas ier se im fren Lazaros did ded fi fuor die, im an Lazaros tuu sista, Mieri an Maata, go a di plies we Lazaros did beri. Tingk bout ou Mieri an Maata aat ful op a jai wen dem si Jiizas riez bak Lazaros tu laif.​—Riid Jan 11:21-24, 38-44.

Maata did nuo fram bifuor se Jeuova a-go rezarek ded piipl fi liv pan di ort agen.​—Riid Iibruu 11:17-19.

2. Wa apm tu piipl wen dem ded?

Gad mek wi fram dos, so non a wi a no spirit. An wen wi ded, wi go rait bak tu di dos. (Genesis 2:7; 3:19) Ded piipl kyaahn tingk; dem no nuo ar memba notn. An dem no ton no dopi. Dats wai Lazaros neva av no tuori fi tel wen im kom bak fram di ded.​—Riid Psalm 146:4; Jan 11:11-14.

Nof piipl biliiv se wen wikid piipl ded, Gad a-go bon dem op iina elfaiya. Notn no go so—a lai dem a tel pan Gad kaa di Baibl mek wi nuo se di ded kyaahn fiil notn. Jeuova a wan lovin Gad, an im wuda neva mek piipl sofa dem wie de.​—Riid 1 Jan 4:8.

Wach da vidiyo ya Wa apm tu piipl wen dem ded?

3. Ded piipl kyan taak tu wi?

Ded piipl kyaahn ier wi, an dem kyaahn taak tu wi. (Psalm 115:17) Bot yu av som wikid ienjel—a dem a taak tu piipl an a priten fi bi di ded piipl. (2 Piita 2:4) Jeuova no waahn wi chrai fi taak tu ded piipl an fi dabl iina uobiya.​—Riid Gyalieshan 5:20, 21.

4. A uu a-go kom bak alaiv?

Uol iip a piipl we ded a-go kom bak alaiv pan ort. Iivn som we did du bad tingz an adaz uu neva get fi nuo bout Gad a-go kom bak alaiv.​—Riid Luuk 23:43; Aks 24:15.

Di piipl dem we kom bak alaiv a-go get di chaans fi lorn bout Gad, fi biliiv iina Jiizas, an fi du wa im se. (Revilieshan 20:11-13) An di wan dem we du wa rait a-go liv fi eva pan ort.​—Riid Jan 5:28, 29.

5. Sins piipl a-go kom bak tu laif, wa dat tel wi bout Jeuova?

Ded piipl kyan liv agen kaa Gad did sen im Son fi gi im laif fi wi. Dis shuo wi se Jeuova lov wi​—iivn duo wi no du notn fi dizorv it. So wen ded piipl kom bak alaiv, uu yu wuda wel waahn fi si?​—Riid Jan 3:16; Ruoman 6:23.