Di Mirikl We Jeuova Wok A Di Red Sii

Wen Fiero ier se di Izrelait dem did gaan, im did beks se im sen dem we. So im tel im suoja dem se: ‘Go saat out aal a mi aas an bogi kyaat dem we wi yuuz fi fait waar an kom mek wi go fi dem! Mi no nuo we mi sen dem we fa.’ So im an im suoja dem lef out fi go kya bak di Izrelait dem.

A Jeuova did a liid im piipl dem. Iina di die dem wuda si wan big kloud op iina di ier, an iina di nait dem wuda si faiya. Wen dem kech a di Red Sii, im tel dem fi kyamp out de-so.

Bot ier wa apm nou. Di Izrelait dem no si Fiero an im aami a kom fi dem! An dem kudn go no we kaa di Ijipshan dem did de pan wan said an di sii did de pan di neda said. So dem baal out tu Muoziz se: ‘A ded wi ded nou! Dis wudn apm ef yu did mek wi tan a Iijip.’ Bot Muoziz se: ‘No wori unuself man. Jos luk an si ou Jeuova a-go siev wi.’ Muoziz did riili chos iina Jeuova, no chuu?

Jeuova tel di Izrelait dem fi pak op dem tingz. An iina di nait, Jeuova yuuz di kloud fi blak aaf di Ijipshan dem fram di Izrelait dem. So we di Ijipshan dem did de, it did daak an dem kudn si a ting. Bot di Izrelait dem did av lait.

Afta dat Jeuova tel Muoziz fi chrech out im an uova di sii. Den fi di wol nait, Jeuova mek wan chrang chrang briiz bluo uova di sii an it plit iina tuu. Waata did de pan di tuu said an wan ruod did iina di migl. A uol iip a Izrelait did de de an di wol a dem kuda waak go kraas di ada said a di sii an di grong nat iivn did wet.

Fiero suoja dem tek op demself an staat fala di Izrelait dem. Den aal av a sodn, Jeuova mek di wiil dem staat fi kum aafa dem aas an bogi kyaat dem an it did komiin laka se di wol a dem ton iidiyat. Di suoja dem staat shout out se: ‘Unu kom mek wi lef fram ya-so! Unu no si se a Jeuova a fait fi dem.’

Den Jeuova se tu Muoziz se: ‘Chrech out yu an uova di sii.’ Sed taim di waata we did plit iina tuu kom dong pan di Ijipshan dem. Fiero an evri singgl wan a im suoja dem ded aaf.

Pan di ada said a di sii nou, yu did av wan big kroud a piipl we did a sing an a priez Gad. Ier wa dem did a sing: ‘Kom mek wi sing tu Jeuova kaa im fi get nof big op. Im joun aaf di aas dem an di wan dem we did a raid dem iina di sii.’ Wen di wol a di piipl dem did a sing, di uman dem did a daans an a nak tambariin. Evribadi glad-bag did bos kaa dem a neehn sliev no muo.