No Mek Notn Mash Op Yu Marid Laif

Di vou we ozban an waif mek tu dem wan aneda, Jeuova tek it siiros. Im se di ozban an waif dem fi stik tu dem wan aneda. (Mt 19:5, 6) Mongks Gad piipl tide, wi av nof marid piipl we a liv gud wid dem wan aneda. Bot nobadi marid laif no porfek. Prablem a-go kom op somtaim. Wi no fi du laik nof piipl an fiil se wans wi av prablem iina wi marid laif di bes ting a fi wi paat fram wi wan aneda ar divuos. Wa di Kristiyan dem we marid kyan du so dat notn no mash op dem marid laif?

Luk pan dem faiv sitn ya we kyan elp.

1. Wi protek wi aat wen wi no inkorij sumadi wen dem a luk wi an no du tingz fi mek dem tingk se wi a luk dem niida. Wi naa go lov notn we afi du wid seks sin. Aal a dis jos a-go mash op wi marid laif.​—Mt 5:28; 2Pii 2:14.

2. Wok aad fi bi Gad fren, an chrai aad fi lov di sitn dem we im se yu fi du iina yu marid laif.​—Ps 97:10.

3. Gwaan wok aad fi chienj yu wiez dem. Du likl nais tingz fi yu ozban ar yu waif, an dis wi mek dem laif apiya.​—Kol 3:8-10, 12-14.

4. Taak tu unu wan aneda bout ou unu fiil, an wen unu a dwi’it shuo se unu rispek unu wan aneda.​—Kol 4:6.

5. A di ozban an waif dyuuti fi sliip wid dem wan aneda an wen dem a du dat, dem fi shuo se dem lov an kier bout dem wan aneda.​—1Kor 7:3, 4; 10:24.

Wen Kristiyan shuo se dem rispek dem marid laif, dem shuo se dem rispek Jeuova, di wan uu kom op wid it.

WACH DI VIDIYO “WI FI RON AN NO TAP”​—FALA DI RUUL DEM, AN DEN ANSA DEM KWESTIYAN YA:

• 

  Aalduo wan ozban an waif mait-a staat out gud, wa kain-a prablem kyan kom op?

• 

  Ou di sitn dem we di Baibl tiich wi kyan elp di waif an ozban dem we fiil se no lov no de iina dem marid laif?

• 

  Wa a som a di ting dem we Jeuova se ozban an waif fi du an no fi du?

• Fi dem av wan api marid laif, wa di tuu a dem fi du?