Yu A Du Tingz Fi Get Redi Fi Di Laad Sopa?

Di laas Paasuova we Jiizas kip did a-go bi wan speshal wan. Bikaa Jiizas did a-go ded suun, im plan fi nyam di Paasuova fuud wid im apasl dem, an im tel dem bout di Laad Sopa we a wan nyuu sitn we dem fi kip evri ier. So im sen Piita an Jan fi go luk bout di ruum we im a-go kip it iina. (Lu 22:7-13; luk pan di picha pan di kova.) Dis mek wi memba se wi fi get tingz redi fi di Laad Sopa we a-go gwaan Maach 27. Di elda dem mait-a aredi plan uu a-go gi di taak, ou dem a-go get di bred an wain, an dem tingz de. Bot, wa wi kyan du fi get wiself redi fi di Laad Sopa?

Get yu aat redi. Di paat iina di Baibl we yu fi riid fi di Laad Sopa, mek shuor se yu riid it an tingk bout it. Yu kyan fain di paat dem we yu fi riid iina Examining the Scriptures Daily. Ef yu waahn si muo sitn we yu kyan riid, yu kyan go luk pan Appendix B12 (B12-A The Final Week of Jesus’ Life on Earth (Part 1); B12-B The Final Week of Jesus’ Life on Earth (Part 2)) iina di New World Translation of the Holy Scriptures. (An yu kyan luk pan di Life and Ministry Meeting Workbook fi Iepril 2020.) Yu kyan fain som sitn we yu kyan yuuz iina yu fambili Baibl stodi we shuo umoch it miin se Jiizas did kom ded fi wi iina di Watch Tower Publications Index ar di Research Guide for Jehovah’s Witnesses.

Invait ada piipl fi kom. Du evriting yu kyan du fi tel piipl bout di Laad Sopa. Tingk bout aal a di piipl dem we yu kyan invait, laik di wan dem we yu priich tu we waahn nuo muo, di wan dem we yu yuus tu stodi di Baibl wid, ada piipl we yu nuo, an yu fambili dem. Di elda dem fi du dem bes fi invait di wan dem we tap priich an naa kom a miitn. Memba ef sumadi no liv iina di ieriya we yu liv, yu kyan fain out di taim an wich paat it a-go kip nier we dem liv. Yu kyan go pan di uom piej pan di jw.org websait, klik pan BOUT WI, an den klik pan “Laad Sopa.”

Wa a som ada tingz we wi kyan du fi get redi fi di Laad Sopa?