DIS A OU AAL UU A FALA JIIZAS FI LIV

Chrii Sitn We Wi Fi Du We Shuo Se Wi A Chos Iina Jeuova Fi Elp Wi

Dievid kuda win di fait gens Golaiyat kaaz im did chos iina Jeuova fi elp im. (1Sa 17:45) Jeuova wel waahn fi du sitn fi elp di wan dem we a sorv im. (2Ch 16:9) Iivn duo wi mait-a go chuu sortn tingz aredi, ar wi mait-a kyan du sortn tingz gud gud, ou wi kyan shuo se a Jeuova wi a chos iina fi elp wi? Si chrii sitn ya we wi kyan du:

No tap prie. Wi no fi onggl prie an aks Gad fi paadn wi wen wi du sitn rang, bot wi fi prie an aks im fi elp wi fi tan op chrang wen wi fies notn we wi kaaz wi fi sin. (Mt 6:12, 13) A no onggl afta wi mek op wi main fi du sitn wi fi prie an aks Jeuova fi mek tingz wok out gud. Wi fi prie an aks im fi mek wi nuo wa wi fi du bifuo wi dwi’it tu.—Jmz 1:5
Riid di Baibl aafn an du tingz we mek yu redi fi di miitn dem an fiil sorvis. Riid di Baibl evridie. (Ps 1:2) Tek taim fi tingk bout di piipl dem we yu a riid bout, an mek shuor se yu a du di gud sitn dem we yu a lorn. (Jmz 1:23-25) Iivn duo yu mait-a a go out iina sorvis fram lang taim, stil mek shuor se yu tek di taim fi get tingz redi fi fiil sorvis. Wen wi du di sitn dem we mek wi redi fi di miitn dem, a so kom wi a-go lorn muor tingz wen wi go a di miitn dem.
Du wa Jeuova aaganaizieshan se yu fi du. Mek shuor se yu nuo wa a gwaan wid Jeuova aaganaizieshan. An eniting we dem se yu fi du, yu fi kwik fi dwi’it. (Nu 9:17) Wen di elda dem tel wi wa fi du, ar wi du sitn rang an dem taak tu wi bout it, wi fi lisn tu dem.—Iib 13:17

Som poliis put aan ankof pan wan breda an a kya im we. Som nyuuz piipl an som ada breda an sista a luk wa a gwaan.

WACH DI VIDIYO WI NA’AFI FRIED WEN PIIPL A FAIT GENS WI KAAZ A WA WI BILIIV, AN DEN ANSA DEM KWESTIYAN YA:

• Wa a som a di sitn dem we did mek di breda an sista dem iina da vidiyo ya fiil fried?

• Iivn duo dem did fiil fried, wa did elp dem fi diil wid it?