Kwestiyan We Piipl Aks

Wen 2 Tesaluoniyan 3:14 se wi fi “maak dem fies,” a uu fi du di maakin? A di elda dem ar di difrant difrant breda an sista dem iina di kanggrigieshan?

Wen di apasl Paal did rait di Kristiyan dem iina Tesalonaika, im tel dem se: “Ef sumadi no fala wa wi se iina da leta ya maak dem fies.” (2 Tes. 3:14) Wi yuus tu biliiv se wen Paal se “maak dem fies,” a di elda dem fi dwi’it. An dem wuda dwi’it ef dem taak tu sumadi uova an uova agen bout sitn an dem stil naa du wa di Baibl se dem fi du. A da taim de di elda dem wuda gi wan taak iina di kanggrigieshan fi maak di sumadi. Afta dat, di breda an sista dem iina di kanggrigieshan wudn kip kompni wid da sumadi de.

Bot nou wi si se a no dat Paal did miin. Paal did a taak bout sopm we di difrant difrant breda an sista dem iina di kanggrigieshan wuda du wen sumadi a du sortn tingz. So di elda dem wudn afi gi no taak fi maak nobadi iina di kanggrigieshan agen. Mek wi luk pan wa mek wi se a dis Paal did miin.

Paal did se som a di breda an sista dem iina di kanggrigieshan ‘naa waak laik ou dem did tel dem fi waak.’ So dem wan ya neehn a du di sitn dem we Gad Wod tel dem fi du. Laik wan a di taim wen im go luk fi dem, im did tel dem se: “Ef sumadi no waahn wok, no mek dem nyam.” Bot yu did stil av som a dem we neehn waahn fi wok aalduo dem kuda dwi’it. An dem did a faas iina ada piipl bizniz tu. So ou di ada breda an sista dem did fi chriit dem wan ya?​—2 Tes. 3:6, 10-12.

Paal did se fi “maak dem fies.” Iina di Griik langwij, dis did miin tu se yu fi luk pan da sumadi de gud. An a no onggl di elda dem Paal did a taak tu da taim ya, im did a taak tu evribadi iina di kanggrigieshan. (2 Tes. 1:1; 3:6) So enibadi iina di kanggrigieshan we si se sumadi naa du di sitn dem we Gad Wod se dem fi du, a dem fi mek op dem main ef dem a-go tap diil wid da sumadi de.

Bot dis no miin se wi a-go chriit dem laik sumadi we get put outa di kanggrigieshan, kaa Paal did se “waan dem laik ou unu wuda waan unu uona breda an sista we biliiv iina Jiizas.” So di breda an sista dem iina di kanggrigieshan wuda stil taak tu di sumadi wen dem de a miitn an wen dem de a sorvis. Bot dem wudn invait dem wen dem a av dem paati ar wen dem a du ada tingz fi enjai demself, so dat di sumadi mait-a “fiil shiem” an chienj dem wiez dem.​—2 Tes. 3:14, 15.

Bot a ou wi kyan du dis? Di fos ting we wi wuda waahn fi du a mek shuor se di sumadi we wi maak a sumadi we naa waak laik ou Gad Wod se dem fi waak. An Paal neehn de taak bout sumadi we a du tingz we fi dem kanchens lou dem fi du we difrant fram wa fi wi kanchens wuda lou wi fi du. An im neehn de taak bout sumadi we wi no laik kaa dem du sitn we ort wi. Bot im did a taak bout di wan dem we mek op dem main se dem naa du sitn we di Baibl tel dem fi du.

So ef yu nuo sumadi laik dat iina yu kanggrigieshan we mek op dem main fi no du wa di Baibl se dem fi du,a a yu wuda afi mek op yu main se yu naa go kip kompni wid im wen yu a kip wan paati ar a du ada tingz fi av fon. An a onggl di piipl dem iina yu fambili yu a-go mek nuo wa yu plan fi du. Bot yu stil a-go taak tu di sumadi wen yu go a miitn an sorvis. An wen da sumadi de chienj dem wiez dem, yu kyan staat fi du ada tingz wid dem.