Wen Yu A Stodi, Redi Op Yuself Fi Tek Iin Di Sitn Dem We Yu A-Go Lorn

Wen wi a redi op wiself fi stodi, wi kyan aks wiself da kwestiyan ya: ‘Wa mi tingk mi a-go lorn fram dis?’ Bot wi no fi mek wa wi tingk wi a-go lorn mek wi no get wa Jeuova riili a tiich wi. So ou wi kyan redi op wiself fi tek iin di sitn dem we wi a-go lorn wen wi a stodi?

Aks Jeuova fi mek yu waiz. Aks im fi elp yu fi nuo di sitn dem we im waahn yu fi nuo nou. (Jmz. 1:5) No onggl dipen pan di sitn dem we yu nuo aredi.​—Pr. 3:5, 6.

Rispek di powa we di Baibl av. “Wen Gad taak a laik se di sitn dem we im se alaiv.” (Iib. 4:12) Evritaim wi riid Gad Wod it kyan elp wi iina wan difrant wie. Bot di onggl wie it a-go du dat a ef wi redi op wiself fi tek iin wa wi a-go lorn wen wi riid it.

Wi fi tangk Jeuova fi evriting we im a yuuz fi tiich wi. Di sitn dem we Jeuova a yuuz fi kip wi kluos tu im komiin laik wan big tiebl we av nof difrant difrant fuud pan it we gud fi wi. (Aiz. 25:6) So wi fi mek yuus a aal a dem, aal di wan dem we wi no lov so moch. Wen yu du dat, it no onggl a-go elp yu, bot it a-go mek yu get fi lov di sitn dem we Jeuova a yuuz fi elp wi.