LESN 10
Ou Yu Kyan Nuo di Rait Wie fi Worship Gad?
1. Yu tingk se a onggl wan chuu wie de fi worship Gad?
“Wach out fi faalz prafit.”—MATYU 7:15.
Jiizas tiich im falara dem di wan chuu wie fi worship Gad, an da wie de komiin laik wan ruod we piipl afi tek ef dem waahn fi liv fi eva. Bot Jiizas mek wi nuo se “a likl bit a piipl fain it.” (Matyu 7:14) Gad onggl waahn worship we bies pan we di Baibl tiich. An aal a di chuu worshipa dem, dem yuunait tugeda iina wan fiet.—Riid Jan 4:23, 24; 14:6; Ifiijan 4:4, 5.
Wach da vidiyo ya Yu Tingk a Evri Kain-a Worship Gad Pliiz wid?
2. Wa Jiizas did se bout di faalz Kristiyan dem?
“Dem se dem nuo Gad, bot dem no gwaan laik se dem nuo im.”—TAITOS 1:16.
Jiizas did waan se chuu Kristiyaniti a-go get korop bikaaz a di faalz prafit dem. Wen yu luk pan dem, dem wuda waahn luk laik dem a worship Gad iina di rait wie. An dem choch de—dem kliem se dem a Kristiyan, bot yu kyan si dem piipl de fi uu dem riili bi. So wen piipl worship Gad di wie ou im waahn dem fi worship, yu wi si dem gud wiez an nuo se dem a Kristiyan.—Riid Matyu 7:13-23.
3. Ou yu kyan nuo di piipl dem we a worship Gad iina di rait wie?
Si faiv tingz ya we kyan elp yu fi nuo di piipl dem we a worship Gad iina di rait wie:
Dem rispek di Baibl fi we it bi—di Wod a Gad. Dem chrai aad fi liv dem laif iina di wie Gad waahn dem fi liv it. Chuu worship no fala di tingz we man mek op. (Matyu 15:7-9) Dem no priich wan ting an den du di tuotal opozit.—Riid Jan 17:17; 2 Timoti 3:16, 17.
Jiizas chuu falara dem rispek Gad niem, Jeuova. Jiizas shuo se im av nof rispek fi Gad niem kaa im mek piipl nuo it. Im elp piipl fi nuo Gad an tiich dem fi prie fi piipl av nof rispek fi Gad niem. (Matyu 6:9) Iina yu komyuuniti, wich set a Kristiyan taak bout Jeuova an tiich piipl bout da niem de?—Riid Jan 17:26; Ruoman 10:13, 14.
Di chuu Kristiyan dem priich bout Gad Kindom. Gad sen Jiizas kom a ort fi priich di gud nyuuz bout di Kindom, we a wan govament iina evn. Gad Kindom a di onggl uop fi a beta fyuucha. Jiizas taak bout Gad Kindom chriet op tu im det. (Luuk 4:43; 8:1; 23:42, 43) Jiizas se im falara dem wuda priich bout it tu. Wich set a Kristiyan wuda muor laikli kom op tu yu an taak tu yu bout Gad Kindom?—Riid Matyu 24:14.
Jiizas falara dem no get invalv iina di wikid sitn dem iina da worl ya. Yu kyan nuo dem kaa dem no get miks op iina palitiks an di prablem dem iina sosaiyati we piipl a chrai fiks. (Jan 17:16; 18:36) Dem no gwaan laik di worliyan dem ar du di bad sitn dem we dem du.—Riid Jiemz 4:4.
Di chuu Kristiyan dem lov dem wan aneda wid aal a dem aat. Gad Word tiich dem fi lov an rispek evribadi no mata wich paat iina di worl dem kom fram. So dem no fala faalz rilijan an tek paat iina waar. Az a matarafak, chuu Kristiyan no av notn at aal fi du wid waar. (Micah 4:1-3) Insted, dem yuuz dem taim an eniting dem av fi elp piipl.—Riid Jan 13:34, 35; 1 Jan 4:20.
4. Yu kyan tel nou wich rilijan a di rait wan?
Wich rilijan yuuz Gad Wod fi tiich evriting we dem tiich? Wich rilijan rispek Gad niem an tel piipl se Gad Kindom a di onggl uop fi di fyuucha? Wich gruup shuo lov an no get invalv iina waar? We yu tingk?—Riid 1 Jan 3:10-12.