Dem Neehn Du Wa Dem Did Pramis Fi Du

Jeuova se tu Muoziz se: ‘Kum bak op pan di mountn. Mi a-go rait di laa dem we mi waahn di Izrel piipl dem fi fala pan som tablit we mek outa stuon an gi yu.’ Muoziz gu op pan di mountn an tan de fi 40 die an 40 nait. Wen im did de de, Jeuova rait Di Ten Komaanment pan tuu tablit we mek outa stuon an gi im.

Kaa Muoziz did op de fi wan gud likl wail, di Izrelait dem did tingk se im gaan lef dem. So dem se tu Ieran se: ‘Go mek wan gad fi wi kaa wi waahn sumadi fi liid wi.’ Ieran se tu dem se: ‘Kya di guol we unu av kom gi mi.’ So im melt dong di guol we di piipl kya kom gi’im an mek wan kou kyaaf stachu. An dem se: ‘A fi wi gad dis we kya wi outa Iijip!’ Di piipl dem staat fi worship di stachu an dem kip wan big paati. Yu tingk notn did rang wid dat? Ye man. Kaa memba se ino, dem did pramis se a Jeuova wan dem wuda worship. Bot dem neehn du wa dem se dem wuda du.

Jeuova did si wa a gwaan an im tel Muoziz se: ‘Go dong de go taak tu dem. Dem naa du wa mi se dem fi du an dem a worship faalz gad.’ So Muoziz kom dong aafa di mountn wid di tuu tablit dem.

Wen Muoziz did kech nier wich paat di Izrelait dem did kyamp out, im ier dem a sing. Den im si dem a pudong wan piis a daansin an a bou dong infronta di kou kyaaf. Muoziz did beks bad. Im dash di tuu tablit dem pan di grong an mash dem op. Den im mash op di stachu. Afta dat im aks Ieran se: ‘Ou yu manij fi mek di piipl dem mek yu du dis, iihn?’ Ier Ieran no: ‘No bada beks man. Yu no nuo ou dem piipl ya tan aredi? Dem se dem waahn wan gad, so mi dash di guol iina di faiya an den a da kou kyaaf ya kum out.’ Ieran did rang fi du dat. So Muoziz gu bak op pan di mountn an beg Jeuova fi figiv di piipl dem.

Jeuova figiv di wan dem we did redi fi du wa im se. Yu si wa mek a did wan big ting fi di Izrelait dem du wa Muoziz se dem fi du?