Wan Tent Fi Worship Jeuova

Wen Muoziz did de pan Mount Sainai, Jeuova tel im fi bil wan speshal tent we di Izrelait dem wuda yuuz fi worship Gad. Eniwe dem muuv go, dem kuda kya da tent ya wid dem.

Jeuova se: ‘Tel di piipl dem fi gi eniting we dem kyan gi fi elp mek di tent.’ So di Izrelait dem gi juulri, som dier stuon, guol, silva an kapa. Pan tap a dat, dem gi wol iip a ada tingz laik wul, linin, an animal skin. Di piipl dem gi so moch tingz dat Muoziz did afi tel dem se: ‘Unu kyan tap nou! Wi no niid notn muo.’

A nof man an uman did elp fi mek di tent an Jeuova did mek dem nuo wa fi du so dem kuda du di wok gud. Som a dem mek chred, som a dem mek klaat, an som a dem suo patan pan di klaat. Som ada wan wok wid stuon an som a dem mek tingz outa guol an outa wud.

Di piipl dem mek di tent di wie ou Jeuova tel dem fi mek it. Dem did mek wan priti kortn we paat aaf di tent iina tuu. Wan paat did niem di Uoli Plies, an di neda paat did niem di Uoliyis Plies. Iina di Uoliyis Plies yu did av di baks we tan fi di pramis we Gad an di Izrelait dem did mek. Da baks de did mek outa akiesha wud an guol. Iina di Uoli Plies yu did av wan lampstan we mek outa guol, wan tiebl, an wan alta we dem yuuz fi bon swiit spais pan. Iina di yaad we di tent did de, yu did av wan big alta an wan biesin we mek outa kapa. Di baks we did de iina di Uoliyis Plies did elp di Izrelait dem fi memba di pramis we dem did mek fi du wa Jeuova se dem fi du.

A Ieran an im bwai pikni dem Jeuova did pik fi du priis wok a di tent. Dem did fi tek kier a it an gi op sakrifais tu Jeuova de. Ieran a did di liida fi di priis dem an a im wan kuda go iina di Uoliyis Plies. A wan taim fi di ier Ieran wuda go iin de. Im wuda gi op sakrifais fi im sin dem, fi im fambili sin, an fi aal a di Izrel piipl dem sin tu.

Di Izrelait dem did don mek di tent wan ier afta dem lef Iijip. So nou dem did av somwe fi worship Jeuova.

Jeuova did shuo se im api wid di tent we dem did mek an im mek wan big kloud kom op uova it tu. So langks di kloud did de uova di tent, di Izrelait dem wuda tan wich paat dem de. Bot wen di kloud muuv, dem nuo se a taim fi dem muuv tu. So dem wuda pul dong di tent an go wich paat di kloud go.