Jeuova Pik Jashwa

Afta Muoziz did a liid di Izrelait dem fi uol iip a ier, im did bout fi ded. Jeuova tel im se: ‘A no yu a-go kya di Izrelait dem go iina di Pramis Lan. Bot mi a-go mek yu si’it.’ Afta dat, Muoziz aks Jeuova fi pik sumadi els fi liid di piipl dem an tek kier a dem. So Jeuova tel im se: ‘Go tel Jashwa se a im mi pik fi liid di piipl dem.’

Muoziz tel di Izrelait dem se im suun ded an im tel dem se Jeuova pik Jashwa fi liid dem go iina di Pramis Lan. Afta dat, Muoziz se tu Jashwa se: ‘No fried man. Jeuova a-go elp yu.’ Likl afta dat, Muoziz ga’a di tap a Mount Niibo an Jeuova shuo im di lan we im did pramis fi gi Iebriyam, Aizak, an Jiekob. Muoziz a did 120 ier uol wen im ded.

Jeuova tel Jashwa se: ‘Go kraas di Jaadn Riva an go a Kienan. Yu si jos laik ou mi did elp Muoziz, a siem wie mi a-go elp yu tu. Mek shuor se yu riid mi laa dem evridie. Briev op yuself an du wa mi tel yu fi du.’

Jashwa sen tuu man fi go spai out Jeriko. Iina di neda lesn wi a-go lorn bout wa did gwaan de-so. Wen dem kum bak, dem tel Jashwa se a wuda wan gud taim nou fii go tek uova Kienan. So di neks die, Jashwa tel di Izrelait dem fi pak op dem tingz. Den im tel di priis dem we a kya di baks we tan fi di pramis we Gad mek wid di Izrel piipl dem, fi waak infronta dem ga’a di Jaadn Riva. Di riva did kom dong. Bot yu si wen di priis dem fut toch di waata, di riva waata tap ron! So di priis dem waak ga’a di migl a di rivabed an tan op de, an aal a di Izrelait dem kraas uova ga’a di neda said. Yu tingk dis did mek dem memba bak wa Jeuova du wen dem did de a di Red Sii?

Afta uol iip a ierz, di Izrelait dem fainali kech a di Pramis Lan. Nou dem kuda mek dem ous an bil op di plies. An dem kuda plaant wiit, griep an dem ting de. Di lan did nais bad an it did riili gud fi plaant tingz pan.