Ou Wi Kyan Worship Gad Iina Wan Wie Fi Im Api Wid Wi?

Iina di lesn we wi dis don stodi, wi si se a no aal a di rilijan dem a worship Gad di rait wie. Bot wi kyan stil worship Gad iina di wie ou im waahn wi fi worship im. Bot wa’a di kain-a worship we “gud an kliin iina Faada Gad yai”? (Jiemz 1:27) Luk pan ou di Baibl se wi fi worship Gad.

1. Di sitn dem we wi a du wen wi a worship Gad, a wich paat dem fi kom fram?

Wen wi a worship Gad, wi fi du wa di Baibl se. Wan taim wen Jiizas a taak tu Gad, im se: “Fi yu mesij a di chuut.” (Jan 17:17) Som a di choch dem no pie no main tu di sitn dem we Gad Wod tel wi fi du. Wa dem du, a dat dem fala wa man se dem fi du an wa dem baan kom si dem piipl piipl dem a du. Bot Jeuova no aarait wid di wan dem we ‘ton dem bak pan wa im se dem fi du.’ (Riid Maak 7:9.) So ef wi waahn Jeuova fi aarait an api wid wa wi a du, wi fi du di sitn dem we di Baibl tel wi fi du.

2. A ou wi fi worship Jeuova?

A Jeuova mek wi, so a im wan wi fi worship. (Revilieshan 4:11) Dis miin se wi fi lov im wid aal a wi aat an worship im wan. So wi no fi yuuz notn wen wi a worship Gad, an wi no fi mek notn an worship it fi Gad.​—Riid Aizaiya 42:8.

So di wie ou wi worship Jeuova, it fi komiin “laik wan sakrifais . . . we Gad kyan api wid.” (Ruoman 12:1) So wi fi mek shuor se wi du aal a di sitn dem we Jeuova se wi fi du. An wa im se wi no fi du, wi no fi dwi’it. So wan man an im waif a-go liv di wie ou Jeuova se dem fi liv. An piipl we lov Gad naa go du notn fi ort demself an ada piipl, an dem naa go yuuz tubako, sumuok, ar tek jogz, ar jringk til dem get jongk.a

3. Wa mek wi fi worship Jeuova wid ada piipl we waahn fi worship im?

Wen wi go a wi miitn dem a wiik taim, wi get fi “priez Jeuova . . . iina di kanggrigieshan.” (Saam 111:1, 2) Wan a di wie dem ou wi du dis a wen wi sing sang we a priez Jeuova. (Riid Saam 104:33.) Jeuova waahn wi fi go a di miitn dem kaaz im nuo se wen wi dwi’it, wi a-go kyan get fi liv fi eva. Wi go a wi miitn dem so dat wi kyan gwaan fiil gud an push chuu. An wen wi go de, a dat it du fi wi.

LORN SOM MUO

4. Wa mek wi no fi yuuz no faalz gad we luk laik notn wen wi a worship Jeuova?

VIDIYO: Yu Tingk Gad Waahn Wi Mek Sitn An Yuuz It Fi Worship Im? (3:26)

• Iina di taim wen di Baibl did a rait, wen som a Gad piipl did yuuz som sitn we dem mek fi worship im, wa did apm kaaz a dat?

Som piipl we yuuz som sitn we dem mek fi worship Gad, dem yuuz dem sitn de kaa dem se it mek dem fiil laik Gad de de wid dem. Bot notn go so? Riid Eksidos 20:4-6 an Saam 106:35, 36, an den wi a-go taak bout dem kwestiyan ya:

• Wa a som a di sitn dem we yu si piipl a yuuz fi worship Gad?

• Wen wi yuuz ada sitn fi worship Jeuova, ou yu tingk im fiil bout it?

• Yu tingk wi fi yuuz ada sitn fi worship Gad?

5. Wen a Jeuova wan wi a worship, wi a-go nuo di chuut an wi naa go biliiv di lai dem

VIDIYO: Kaa Mi Nuo Di Chuut, Mi Na’afi Biliiv Di Lai Dem (5:16)

Riid Saam 91:14, an den wi a-go taak bout da kwestiyan ya:

• Ef wi lov Jeuova an worship im wan, wa im se im a-go du fi wi?

6. Wi worship Gad wen wi go a wi miitn dem

Wi priez Jeuova wen wi go a wi miitn dem, an wen wi sing an put op wi an an ansa kwestiyan. An wen wi du dem sitn ya, it mek wi an ada piipl fiil gud so dat wi kyan gwaan tan op chrang. Riid Saam 22:22, an den wi a-go taak bout dem kwestiyan ya:

• Wen yu go a di miitn dem an ier ada piipl ansa kwestiyan, yu lov fi ier dem?

• Yu wuda waahn fi ansa wan a di kwestiyan dem wen yu go a wan a di miitn dem?

7. Wen wi tel ada piipl bout di sitn dem we wi a lorn, it mek Jeuova api

A nof difrant wie de we wi kyan yuuz fi tel ada piipl bout di sitn dem we wi a lorn bout Jeuova. Riid Saam 9:1 an 34:1, an den wi a-go taak bout da kwestiyan ya:

• Wa a sopm we yu lorn fram di Baibl we yu wuda waahn fi tel sumadi els bout?

DIS A WA YU FI MEMBA

Fi mek di Sumadi we mek wi api, wi fi worship im wan. Wi fi priez im wen wi go a di miitn dem, an wi fi tel ada piipl bout wa wi a lorn.

Wa yu did lorn iina da lesn ya?

• Wa wi kyan luk iina fi get fi nuo di rait wie fi worship Gad?

• Wa mek a onggl Jeuova wi fi worship?

• Wa mek wi fi sorv Gad wid ada piipl we waahn worship im di rait wie?

CHEK OUT SOM MUO SITN

Riid di tuori we niem “Mi Tap Yuuz Ada Sitn Fi Worship Gad” fi fain out wa mek wan uman api se shi tap yuuz ada sitn fi worship Gad.

“Di Baibl Chienj Piipl Laif Fi Di Beta” (Di Wachtowa, Julai 1, 2011)

Fain out wa yu kyan du so dat yu kyan ansa kwestiyan wen yu go a di miitn dem.

“Priez Jeuova Iina Di Kanggrigieshan” (Di Wachtowa, Janiweri 2019)

Luk pan ou it wok out gud fi wan man wen im go a di miitn dem iivn duo it neehn iizi fi im go.

Jeuova Tek Kier A Mi (3:07)

Uol iip a piipl fiil se ef yu a Kristiyan yu fi yuuz di kraas, bot yu tingk Kristiyan fi yuuz di kraas wen dem a worship Gad?

“Wa Mek Di Jeuova Witnis Dem No Yuuz Di Kraas Wen Dem A Worship Gad?” (Sitn we yu kyan get pan di websait)