Yu Piipl We Ded Kyan Kom Bak Alaiv!

Wen sumadi fi yu ded, it mek yu sad so til yu waahn baal. An a dat mek di Baibl se det a wan enimi. (1 Korintiyan 15:26) Iina Lesn 27, yu did lorn se Jeuova a-go get rid a da enimi de. Bot wa a-go apm tu di piipl dem we ded an gaan? Iina da lesn ya, yu a-go lorn sitn els we Jeuova tel wi se im a-go du. Im a-go mek wol iip a miliyan a piipl kom bak alaiv agen! An dem a-go api, an dem a-go kyan liv fi eva. Yu tingk dat kyan riili apm? Wen dem kom bak alaiv, wich paat yu tingk dem a-go liv? Iina evn? Ar pan di ort?

1. Yu piipl dem we ded, wa Jeuova waahn fi dem?

Jeuova wel waahn fi mek ded piipl kom bak alaiv agen. Wan man we chos iina Gad we niem Juob did nuo se ef im ded, Gad wuda mek im kom bak alaiv agen. Im did se tu Gad se: “Yu a-go kaal mi, an mi a-go ansa yu [fram outa di griev].”​—Riid Juob 14:13-15.

2. Ou wi nuo se ded piipl kyan kom bak alaiv agen?

Wen Jiizas did de pan di ort, Gad did gi im di powa fi mek ded piipl kom bak alaiv agen. Jiizas did mek wan 12 ier uol gyal pikni we did ded kom bak alaiv agen. An yu av wan uman we ar ozban did ded, ar son ded an Jiizas mek im kom bak alaiv tu. (Maak 5:41, 42; Luuk 7:12-15) Som taim afta dat, Jiizas uona fren Lazaros did ded tu. Iivn duo Lazaros did ded fi bout fuor die, Jiizas mek im kom bak alaiv agen. Afta Jiizas don prie tu Gad, im luk pan di griev an baal out an se: “Lazaros, kum out!” An “di ded man kom out.” So Lazaros kom bak alaiv agen! (Jan 11:43, 44) Yu kyan imajin ou Lazaros fambili dem an im fren dem did api!

3. Wi piipl dem we ded, wa wi kyan ekspek fi apm tu dem iina di fyuucha?

Di Baibl tel wi se: ‘Ded piipl a-go kom bak alaiv.’ (Aks 24:15) Wen Jiizas did de pan di ort, di piipl dem we im did mek kom bak alaiv, a neehn iina evn dem did go. (Jan 3:13) An a dat mek dem did so api wen Jiizas mek dem kom bak alaiv rait ya-so pan di ort agen. An a siem so, Jiizas a-go mek wol iip a miliyan a piipl kom bak alaiv, rait ya-so pan di ort iina Paradais. Jiizas se evribadi we Gad memba, im a-go mek dem kom bak alaiv agen, aal ef nobadi els no memba dem.​—Jan 5:28, 29.

LORN SOM MUO

4. Jiizas don mek wi si se im kyan mek ded piipl kom bak alaiv agen

Mek wi luk pan som muo sitn we Jiizas did du fi im brejrin Lazaros. Riid Jan 11:14, 38-44, an den wi a-go taak bout dem kwestiyan ya:

• Ou wi nuo se Lazaros did ded fi chuu?​—Luk pan vors 39.

• Ef Lazaros did de iina evn wen im ded, yu tingk it wuda mek sens fi Jiizas mek im kom bak alaiv pan ort agen?

Plie di VIDIYO.

VIDIYO: Jiizas Mek Lazaros Kom Bak Alaiv Agen (1:16)

5. Wol iip a piipl a-go kom bak alaiv agen!

Riid Saam 37:29, an den wi a-go taak bout da kwestiyan ya:

• Di wol iip a miliyan a piipl we gweehn kom bak alaiv agen, a we dem gweehn liv?

A no jos di wan dem we did a sorv Jeuova aluon Jiizas a-go mek kom bak alaiv agen. Riid Aks 24:15, an den wi a-go taak bout da kwestiyan ya:

• A uu yu wuda waahn fi si kom bak alaiv agen?

Tingk bout dis: Jos laka ou wan faada kyan wiek op im pikni outa bed wen im a sliip, a siem so Jiizas kyan mek ded piipl kom bak alaiv agen iizi iizi

6. Fi nuo se ded piipl kyan kom bak alaiv agen, yu a-go fiil gud an it a-go gi yu sitn gud fi luk faawod tu

Di tuori iina di Baibl bout Jairos daata mek nof piipl we fiil it wen sumadi fi dem ded fiil beta. Riid da tuori ya we did riili apm iina Luuk 8:40-42, 49-56.

Bifuo Jiizas mek Jairos daata kom bak alaiv, im tel ar faada se: “No bada fried, jos biliiv.” (Luk pan vors 50.) Fi nuo se ded piipl a-go kom bak alaiv agen ou dat mek yu fiil . . .

• wen sumadi fi yu ded?

• wen yu fiil laik yu a-go ded?

Plie di VIDIYO, an den wi a-go taak bout di neks kwestiyan.

VIDIYO: Fi Nuo Se Ded Piipl A-Go Kom Bak Alaiv Agen, Ou Dat Mek Wi No Fried? (3:21)

• Kaa dem nuo se ded piipl a-go kom bak alaiv agen, ou dat did elp Phelicity mada an faada fi fiil beta?

DIS A WA YU FI MEMBA

Di Baibl mek wi nuo se wol iip a miliyan a piipl we ded a-go kom bak alaiv agen. Jeuova waahn dem fi kom bak alaiv agen. A dat mek im gi Jiizas di powa fi mek dem kom bak alaiv.

Wa yu did lorn iina da lesn ya?

• Fi mek ded piipl kom bak alaiv agen, ou yu tingk Jeuova an Jiizas fiil bout dat?

• Di wol iip a miliyan a piipl we gweehn kom bak alaiv agen, a we dem gweehn liv​—iina evn ar pan di ort? Wa mek yu se so?

• Wa mek yu so shuor se yu piipl we ded kyan kom bak alaiv agen?

CHEK OUT SOM MUO SITN

Lorn bout som sitn we yu fi du fi elp yu wen sumadi ded an yu fiil it.

“Elp Fi Di Wan Dem We A Fiil It Wen Sumadi Fi Dem Ded” (Wiek Op! No. 3 2018)

Di ting dem we di Baibl se kyan riili mek sumadi fiil beta wen sumadi fi dem ded?

Wen Sumadi Fi Yu Ded (5:06)

Wa kyan elp di pikni dem fi fiil beta wen sumadi fi dem ded?

Jiizas Kom Ded Fi Wi (2:07)

Nobadi we ded a-go go a evn? Wa kain-a piipl naa go kom bak alaiv wen dem ded?

“Wa It Miin Fi Se Piipl A-Go Kom Bak Alaiv Agen?” (Sitn we yu kyan get pan di websait)