LESN 53
Wen Yu A Du Tingz Fi Enjai Yuself Mek Shuor Se A Sitn We Jeuova Kyan Api Wid
Jeuova a “di api Gad.” (1 Timoti 1:11, NWT ) Im waahn wi fi api an av wan nais laif. It mek im api wen wi no dis a wok a galang so bot wi tek som taim fi enjai wiself. Iina da lesn ya wi a-go get fi si ou wen wi a enjai wiself wi kyan stil du tingz we wi laik fi du an mek Jeuova api tu.
1. Wa wi fi tingk bout wen wi a-go du tingz fi enjai wiself?
Wen yu waahn fi chil out an tek likl taim fi yuself, wa yu laik fi du? Som piipl laik fi spen dem taim a dem yaad. Dem laik fi riid wan buk, lisn myuuzik, wach wan shuo ar go pan di intanet. Ada piipl laik fi go outa duor go du tingz wid dem fren dem. Laik dem mait-a go kik tuu baal, plie som daminuo ar go a biich. So iivn duo wi laik fi du difrant difrant tingz, wi stil afi mek shuor se eniting we wi du fi enjai wiself a sitn ‘we di Laad riili waahn wi fi du.’ (Ifiijan 5:10) Dis a sitn we wi afi nuo kaaz nof a di tingz we piipl du fi enjai demself nowadiez av tingz we Jeuova iet. Som a di shuo dem, di giem dem, an dem ting de av iin aal kain-a seks sin, dem ful op a bie badnis an tingz we av fi du wid dopi, uobiya an dem sitn de. (Riid Saam 11:5.) Wa kyan elp wi fi du di rait ting wen it kom aan tu di sitn dem we wi du fi enjai wiself?
Wan ting we kyan elp wi a ef wi kip kompni wid di piipl dem we lov Jeuova. Dem wi elp wi fi mek shuor se di sitn dem we wi du wen wi a enjai wiself mek Jeuova api. Iina wan a di lesn dem we wi did du bifuo dis, wi did lorn se ‘wen wi kip kompni wid piipl we waiz an av nof sens, wi wi av sens tu.’ Bot ef wi aalwiez a spen taim wid piipl we no lov di sitn dem we Gad se rait, ‘tingz naa go wok out gud fi wi.’—Pravorbz 13:20.
2. Wa mek wi fi mek shuor se wi no spen tu moch taim a du di sitn dem we wi laik fi du fi enjai wiself?
Iivn duo notn mait-a no rang wid di sitn dem we wi laik fi du fi enjai wiself, wi afi riili tingk bout umoch taim wi a spen a du dem ting de. Kaaz wen yu tingk bout it, yu mait-a si se yu a spen tu moch taim pan dem tingz de an naa du ada tingz we yu supuoz fi du. Di Baibl tel wi se: “Evri chaans [wi] get fi du sopm gud, du it.”—Riid Ifiijan 5:15, 16.
LORN SOM MUO
Wi a-go get fi si ou yu kyan du di rait ting wen it kom aan tu di ting dem we yu du fi enjai yuself.
3. Kip we fram di bad sitn dem we piipl du fi enjai demself
Wa mek wi fi riili tingk bout di sitn dem we wi a-go du fi enjai wiself? Plie di VIDIYO, an den wi a-go taak bout di neks kwestiyan dem.
Ou som a di ting dem we piipl du fi fon nowadiez komiin laik di faitin giem dem we dem yuus tu av iina Ruom bak iina di diez?
Wa Dani did lorn bout som a di ting dem we piipl du fi enjai demself?
Riid Ruoman 12:9, an den wi a-go taak bout da kwestiyan ya:
Ou da vors ya kyan elp yu wen yu a pik wa an wa yu a-go du fi enjai yuself?
Wa a som tingz we Jeuova iet bad? Riid Pravorbz 6:16, 17 an Gyalieshan 5:19-21. Afta evri wan a di skripcha dem wi a-go taak bout da kwestiyan ya:
Wen yu luk pan di ting dem we piipl du fi fon nowadiez, yu si non a dem sitn ya we dem vors ya a taak bout?
Ou yu kyan shuo se yu waiz wen yu a pik tingz fi du fi enjai yuself
Aks yuself dem kwestiyan ya:
Wa mi a du? It av notn fi du wid di ting dem we Jeuova iet?
A wen mi a dwi’it? Mi a dwi’it wen mi shudaana du tingz we muo impuotant?
A uu mi a dwi’it wid? It mek mi kip kompni wid piipl we no lov Jeuova?
It beta fi wi ef wi kip faar faar fram di sitn dem we kyan ort wi. Ef wi si se di sitn dem we wi laik fi du fi enjai wiself av tingz we Gad iet, wi waahn fi tek we wiself fram dem tingz de
4. Shuo se yu waiz an no wies yu taim
Plie di VIDIYO, an den wi a-go taak bout di neks kwestiyan.
Iivn duo di breda iina di vidiyo neehn did a wach notn bad, ou di wie ou im did a yuuz im frii taim did en op fi bi wan prablem fi im?
Riid Filipiyan 1:10, an den wi a-go taak bout da kwestiyan ya:
Ou da vors ya kyan elp wi fi si umoch taim wi fi spen wen wi a du tingz fi enjai wiself?
5. Du gud tingz fi enjai yuself
Iivn duo som a di ting dem we piipl du fi enjai demself no mek Jeuova api, wi av nof ada tingz we wi kyan du we im aarait wid. Riid Iikliiziyastiiz 8:15 an Filipiyan 4:8, an den wi a-go taak bout da kwestiyan ya:
Wa a som a di gud sitn dem we yu laik fi du fi enjai yuself?
Yu kyan du gud tingz fi enjai yuself
SUMADI MAIT-A SE: “Ef di sitn dem we mi du wen mi a enjai miself av likl badnis iina it, likl seks sin ar dopi an dem tingz de, notn no rang wid dat. Afta mi naa du dem sitn de.”
Wa yu wuda se?
DIS A WA YU FI MEMBA
Wen wi a du tingz fi enjai wiself, Jeuova waahn wi fi du gud tingz we a-go mek im api.
Wa yu did lorn iina da lesn ya?
Wen wi a du tingz fi enjai wiself, wa a som a di sitn dem we wan Kristiyan fi kip we fram?
Wa mek wi fi tingk bout umoch taim wi a spen a du di sitn dem we wi du fi enjai wiself?
Wa mek yu waahn fi mek shuor se di sitn dem we yu du fi enjai yuself a mek Jeuova api?
CHEK OUT SOM MUO SITN
Chek dis out an si a uu riili fi disaid di sitn dem we wi a-go du fi enjai wiself.
Luk pan ou yu kyan nuo ef a gud tingz yu a du wen yu a enjai yuself.
Chek out da tuori ya we niem “Mi Did Chienj Di Wie Ou Mi Fiil Bout Wait Piipl” fi si wa mek wan man did afi chienj di kain-a myuuzik we im did a lisn tu.
“Di Baibl Chienj Piipl Laif Fi Di Beta” (Di Wachtowa, Febiweri 1, 2010)
Wach dis an si ou wan mada get fi nuo di rait ting we shi fi du wen shi si wan shuo we av iin vampaiya an dem ting de.