Wich paat yu de pan di ruod we yu afi tek fi get baptaiz?
DIS A OU AAL UU A FALA JIIZAS FI LIV
Mek Op Yu Main Fi Sorv Jeuova
Yu a wan yong sumadi we gruo op iina di chuut, ar yu a stodi di Baibl? Yu plan fi get baptaiz? Wa mek yu fi baptaiz? Wen yu gi yu laif tu Jeuova an get baptaiz, it mek yu get kluos tu im. (Ps 91:1) Wen yu du dem tuu sitn ya, dem wi mek yu get laif. (1Pii 3:21) Wa yu kyan du so dat yu kyan gi yu laif tu Jeuova an get baptaiz?
Pruuv it fi yuself se dis a di chuut. Wen yu waahn fi nuo di ansa tu wan kwestiyan, yuuz di buk an ada sitn dem we wi av an sorch fi it. (Ruo 12:2) Chrai an si eniting we yu niid fi chienj iina yu laif, an chienj dem so dat Jeuova kyan api wid yu. (Pr 27:11; Ifii 4:23, 24) Aalwiez prie tu im fi elp yu. Yu kyan shuor se Jeuova a-go yuuz im uoli spirit fi elp yu fi tan op chrang no mata wa yu a go chuu. (1Pii 5:10, 11) Aal a wa yu du so dat yu kyan sorv Jeuova, it muo dan wot it. Fi sorv Jeuova a di bes ting eva!—Ps 16:11.
WACH DI VIDIYO DI RUOD WE YU AFI TEK FI GET BAPTAIZ, AN DEN ANSA DEM KWESTIYAN YA:
Wa a som a di ting dem we mait-a mek it aad fi som piipl get baptaiz?
Wa kyan elp yu fi mek yu fiet chrangga so dat yu kyan gi yu laif tu Jeuova?
Wa elp som piipl fi du wa dem niid fi du so dat dem kyan get baptaiz?
Wa a som a di blesn dem we dem get kaa dem mek op dem main fi sorv Jeuova?
Wen yu gi yu laif tu Jeuova an get baptaiz, wa it miin?