Mek Yu Fambili Si Se Yu Lov Dem

Lov komiin laik wan chrang chrang gluu. A it kip di fambili tugeda. Ef dem no shuo se dem lov dem wan aneda iina di fambili, di fambili a-go plit op plit op, an dem naa go wok tugeda iina piis. Wa di ozban an waif dem, di mada an faada dem, an di pikni dem kyan du fi shuo se dem lov dem wan aneda?

Wan ozban we lov im waif a-go mek ar si se im kier bout ar an ou shi fiil bout tingz. (Ifii 5:28, 29) Im a-go mek shuor se im fambili av di ting dem we dem niid, an im a-go elp dem fi du di ting dem we dem niid fi du fi kip dem kluos tu Jeuova. Im a-go mek shuor se dem av wan iivnin we dem du dem fambili Baibl stodi pan. (1Ti 5:8) Di waif dem we lov dem ozban a-go ombl demself an du wa dem ozban se dem fi du. (Ifii 5:22, 33; 1Pii 3:1-6) Di tuu a dem fi figiv dem wan aneda fram dem aat. (Ifii 4:32) Di mada an faada dem we lov dem pikni a-go mek evri singgl wan a dem si se dem kier bout dem an dem a-go tiich dem fi lov Jeuova. (De 6:6, 7; Ifii 6:4) Di mada an faada dem kyan aks demself: Wa kain-a prablem mi pikni dem a av a skuul? Ou dem a manij ef ada pikni a fuos dem fi du tingz we dem no waahn fi du? Ef evribadi iina di fambili du tingz fi shuo se dem lov dem wan aneda, evribadi a-go fiil sief an api.

WACH DI VIDIYO NO TAP SHUO LOV IINA YU FAMBILI, AN DEN ANSA DEM KWESTIYAN YA:

• 

  Wan ozban we lov im waif, wa a som a di ting dem we im a-go du fi shuo se im a tek kier a ar an a yuuz Gad Wod fi elp ar?

• 

  Wan waif we lov ar ozban, wa a som a di sitn dem we shi a-go du fi shuo se shi av nof rispek fi’im?

• 

  Di mada an faada dem we lov dem pikni, wa a som a di sitn dem we dem du fi tiich dem pikni fi lov Jeuova fram dem aat?