Wi A-Go Wok Aad Aad Iina Septemba Fi Fain Piipl Fi Stodi Di Baibl Wid

Iina Septemba, wi a-go du evriting we wi kyan du fi fain piipl fi stodi di Baibl wid. An wi a-go yuuz di pamplet we niem Yu Kyan Bi Api Nou An Fi Eva! fi dwi’it. Di wan dem we a agzilari paiyanier kyan du 30 owa fi da mont de. So ou wi a-go dwi’it?

• Di Fos Taim Wi Taak Tu Dem: Yuuz wa de pan di bak a di pamplet fi si ef dem wuda waahn nuo muor. An yuuz it fi shuo dem ou wi stodi di Baibl wid piipl. An memba se wi kyan chek op bak pan di wan dem we did waahn nuo muor bifuor. Plos di wan dem we se wi fi kom bak afta di fos taim wi taak tu dem. Aal ef sumadi did se dem neehn waahn stodi di Baibl wid wi bifuo, dem kuda laik di wie ou wi a stodi di Baibl wid piipl nou, an di nyuu pamplet we wi a yuuz. Wi no fi lef di pamplet fi nobadi we no de a dem yaad. An wi no fi put it iina no leta sen go gi nobadi we neva shuo se dem waahn nuo muor. Di Kanggrigieshan Sorvis Komitii mait-a set op muo miitn fi fiil sorvis iina da mont de.

• Som Ada Sitn We Yu Kyan Du: Ef yu kanggrigieshan yuuz di kyaat fi priich, di pamplet we niem Yu Kyan Bi Api Nou An Fi Eva! kyan go pan it. Ef sumadi laik di pamplet an waahn nuo muor, mek dem nuo se wi yuuz it fi stodi di Baibl wid piipl fi frii. Yu kyan shuo dem ou wi dwi’it sed taim, ar set op wan neda taim fi shuo dem ou wi dwi’it. Di sorvis uovasiya mait-a aks di breda an sista dem we nuo ou fi dwi’it fi go a di bizniz plies dem iina di ieriya fi chrai an fain piipl we waahn fi stodi di Baibl wid wi. An yu kyan aks piipl we yu miit wen yu no de iina yu sorvis ar piipl we yu wok wid ef dem wuda waahn stodi di Baibl tu.

Jiizas tel wi se wi fi ‘tiich im mesij tu piipl evriwe, so dem kyan ton im falara tu.’ (Mt 28:19, 20) Wi uop se da pamplet ya we niem Yu Kyan Bi Api Nou An Fi Eva! wi elp wi fi du dat az wi wok aad iina Septemba fi fain piipl fi stodi di Baibl wid!