Yu Riili Biliiv Iina Di Laad?

Fi mek Jeuova api, yu afi biliiv iina im. Bot di Baibl tel wi se “a no evribadi biliiv iina di Laad.” (2 Tes. 3:2) Iina da vors ya, Paal did a taak bout “di wikid an torbl piipl dem” we did a fait gens im we im did waahn Gad fi siev im fram. Bot da vors ya no onggl a taak bout dem wikid piipl de, it a taak bout som ada piipl we, aalduo dem si di sitn dem we Gad mek, dem no biliiv se Gad de fi chuu. (Ruo. 1:20) Som piipl biliiv se sitn out de we muor powaful dan dem we dem fi biliiv iina. Bot a no onggl dat dem fi du ef dem a-go mek Jeuova api.

Ef wi riili biliiv iina Gad, wi afi nuo fi shuor se Jeuova de fi chuu, an se “im a-go du som uol iip a gud sitn” fi di wan dem we chos iina im. (Iib. 11:6) An a piipl we av Gad uoli spirit riili biliiv iina im. An ef wi a-go get Gad uoli spirit, wi afi prie tu Jeuova fi it. (Luuk 11:9, 10, 13) Wan neda ting we wi kyan du fi get Gad uoli spirit a fi riid di Baibl an tingk bout wa wi riid an chrai fi du di sitn dem we wi lorn. Wen wi av Gad uoli spirit, it a-go elp wi fi chos iina im, an dat a-go mek im api wid wi.