Unu We A Breda​—Unu A Du Di Sopm Dem We Unu Fi Du So Dat Unu Kyan Bi Wan Elda?

1-2. A wa a som a di “gud sopm” dem we di elda dem a du?

EF YU a wan ministiiriyal sorvant fi wan gud wail nou, dat miin se yu a chrai aad fi du di sopm dem we kyan mek yu ton wan elda. Fi ton wan elda “a [wan] gud sopm.” Yu tingk yu kuda ton wan elda?​—1 Tim. 3:1.

² A nof wok di elda dem du. Dem wok aad iina di priichin wok an dem wok aad fi yuuz di Baibl fi elp di breda an sista dem an fi tiich dem tu. An dem chrai fi du di sopm dem we di Baibl se dem fi du so dat di ada breda an sista dem kyan fala dem. Dem ya a som a di gud sopm dem we di elda dem a du, an a das wai di Baibl se dem a “wan gif tu di piipl dem.”​—Ifii. 4:8, NWT.

3. Ou wan breda fi stie an wa im fi a du ef im waahn fi ton wan elda? (1 Timoti 3:1-7; Taitos 1:5-9)

³ Fi get wan wok iina di worl, yu afi kyan du sortn an sortn tingz we di baas man waahn yu fi kyan du gud, an a so yu a-go kyan get di wok. Bot a no di siem ting fi ton wan elda. Fi ton wan elda, yu no onggl afi kyan priich an tiich gud, bot yu afi du di sitn dem we di Baibl se di elda dem fi du we de a 1 Timoti 3:1, 2 (NWT), 3-7 an Taitos 1:5-7, 8 (NWT), 9. (Riid.) Iina da lesn ya, wi a-go luk pan chrii sitn: Ou di elda dem fi stie an tuu a di ting dem we dem fi a du. Di fos wan a dat piipl iina di kanggrigieshan an piipl outa di kanggrigieshan fi av gud tingz fi se bout dem, di sekan wan a dat dem fi a shuo se dem kyan tek kier a dem fambili so dat ada piipl kyan fala dem, an di tord wan a dat dem fi api fi du tingz fi di breda an sista dem iina di kanggrigieshan.

PIIPL FI AV GUD TINGZ FI SE BOUT YU

4. Wen di Baibl se “nobadi kyaahn se notn bad gens im,” wa it miin?

⁴ Fi wan breda fi ton wan elda, “nobadi kyaahn se notn bad gens im.” An dat miin tu se “aal piipl we no biliiv iina Jiizas mos taak gud bout im.” Di onggl taim dem fi se notn bad gens im a kaaz a di sitn dem we im biliiv iina. Dat miin tu se im fi anis an naa du notn rang so dat dem kyaahn av notn gens im fi se. (Dan. 6:4, 5) So yu kyan aks yuself, ‘Piipl we iina di kanggrigieshan an we no iina di kanggrigieshan av sitn gud fi se bout mi kaaz a di sitn dem we mi a du?’

5. A ou yu kyan shuo se yu “lov evriting we gud”?

⁵ So ef yu a sumadi we “lov evriting we gud,” yu a-go aalwiez chrai fi luk fi di gud iina ada piipl an big dem op fi di gud wiez we dem av. Yu a-go api tu fi du gud sitn fi ada piipl an yu a-go redi fi go outa yu wie fi elp dem. (1 Tes. 2:8; Taitos 1:8, NWT.) A wan big ting fi di elda dem du dis kaa dem a yuuz op uol iip a dem taim fi yuuz di Baibl fi elp push di breda an sista dem fi tan op chrang an fi du di ada ting dem we dem get fi du iina di kanggrigieshan. (1 Pii. 5:1-3) Aalduo dem av uol iip a tingz fi du, it a-go mek dem muor api kaa dem a du tingz fi elp di breda an sista dem.​—Aks 20:35.

6. Wa a som sitn we yu kyan du fi shuo se yu “redi fi uopm op [yu] ous tu piipl”? (Iibruu 13:2, 16; luk pan di picha tu.)

⁶ Im fi “redi fi uopm op im ous tu piipl.” Dis miin se yu redi fi shier wid ada piipl. Bot a no onggl yu fren dem yu a-go shier wid, bot yu a-go shier wid ada piipl we yu no so kluos tu. (1 Pii. 4:9) Wan buk we rait bout dis se “wen wan man shier wid ada piipl, it wuda komiin laik im a uopm im ous an im aat tu piipl we im no nuo.” So aks yuself, ‘Piipl nuo mi az sumadi we mek ada piipl fiil laik mi api fi av dem roun mi?’ (Riid Iibruu 13:2, 16.) Wan man we lov fi shier wa im av wid ada piipl a-go du dat tu aal piipl we im no nuo, laik di wan dem we puor an di wan dem we a wok aad fi Jeuova, laik di sorkit uovasiya dem an di breda dem we kom gi taak.​—Jen. 18:2-8; Pr. 3:27; Luuk 14:13, 14; Aks 16:15; Ruo. 12:13.

7. Ou wan elda kyan shuo se im “no fi lov moni”?

⁷ “Im no fi lov moni niida.” So dat miin tu se im no fi onggl a tingk bout ou im fi mek muor moni. Weda yu av moni ar yu na’av non, a Gad govament fi bi di big ting iina yu laif. (Mat. 6:33, NWT ) So yu fi yuuz op yu taim an yu chrent an di ada ting dem we yu av fi worship Jeuova an fi tek kier a yu fambili an elp out iina di kanggrigieshan. (Mat. 6:24, NWT; 1 Jan 2:15-17) So yu kuda aks yuself, ‘Mi a sumadi we lov moni? Mi aarait wid di sitn dem we mi av? Ar mi aalwiez a chrai fi mek moni an a ron dong di ting dem iina di worl?’​—1 Tim. 6:6, 17-19.

8. Wa a som a di ting dem we yu fi du an no fi du fi shuo se yu “kyan kanchuol [yuself]” an se yu ‘naa fala wa yu badi waahn yu fi du’?

⁸ Sumadi we a wan elda “fi kyan kanchuol imself” an im “[naa] fala wa im badi waahn im fi du.” Wen im du dat, im a-go av kanchuol uova ou im liv im laif. Im naa go nyam an jringk tu moch, an im a-go nuo ou fi jres prapa, an ou fi av fon iina wan wie we im no go uova buod wid it. An im naa go chrai fi liv laik ou di piipl dem iina di worl a liv. (Luuk 21:34; Jmz. 4:4) Aal wen piipl du sitn fi mek im get beks, im a-go nuo ou fi iizi imself an gwaan laik im stil av im ed pan im badi. “Im no fi lov jringk tu moch,” an nobadi no fi kyan se im a sumadi we lov im lika. So wan kwestiyan yu kuda aks yuself a ‘Di wie ou mi liv mi laif, mi shuo se mi a sumadi we nuo ou fi kanchuol miself an naa fala wa mi badi waahn mi fi du?’

9. Wa a som sitn we wan breda we waahn ton wan elda fi du fi shuo se im a “tingk chriet” an a “du tingz di wie ou im fi dwi’it”?

⁹ Wan elda “fi kyan tingk chriet.” Dat miin tu se im a-go mek shuor se eniting im a-go du im kyan yuuz di Baibl fi riizn pan it. Im naa go jos jomp an du sitn kaaz a ou im fiil, bot im a-go mek shuor se im chek out tingz fos bifuo im du notn. (Pr. 18:13) An wen im du dat, im a-go du tingz we shuo se a so Jeuova wuda waahn im fi dwi’it. Piipl fi si se im “du tingz di wie ou im fi dwi’it.” So dat miin tu se im a-go aalwiez de pan taim an av tingz saat out. An piipl a-go nuo se im a sumadi we dem kyan dipen pan. Im a-go du tingz di wie ou it fi du. Wen yu du dem sopm ya, it a-go mek piipl kyan taak gud bout yu. Mek wi luk pan di ting dem we di Baibl se sumadi we waahn ton wan elda fi du wen it kom aan tu dem fambili.

SHUO SE YU KYAN TEK KIER A YU FAMBILI SO DAT ADA PIIPL KYAN FALA YU

10. Wa wan man a-go du fi shuo se im “nuo ou fi ron im ous”?

¹⁰ Ef yu a wan man we marid an waahn fi ton wan elda, di ting dem we yu waif an pikni dem a du kyan mek yu no ton wan elda tu. So yu “fi nuo ou fi ron [yu] ous.” Piipl fi nuo yu az sumadi we lov yu fambili an a tek kier a dem. So dis miin tu se yu a-go mek shuor se yu an dem de a miitn an a du di ada ting dem we fi mek unu stie kluos tu Jeuova. An yu fi du dis kaa di apasl Paal mek wi nuo se: “Ef sumadi kyaahn ron dem uona ous ou dem a-go ron Gad choch?”​—1 Tim. 3:5.

11-12. Wa mek wa wan breda pikni du kyan mek im bi wan elda ar no mek im bi wan? (Luk pan di picha tu.)

¹¹ Ef yu a wan faada, yu andaiej “pikni dem fi lisn wa [yu] se an shuo rispek.” Yu fi tiich dem iina wan wie we shuo se yu lov dem. An wi nuo se dem a-go lov fi plie an enjai demself kaa dem a pikni, bot bikaa a ou yu tiich dem, dem a-go lisn tu wa yu se an nuo ou fi shuo se dem rispek ada piipl an nuo ou fi biyiev demself. An yu fi du evriting we yu kyan du so dat dem an Jeuova a gud gud fren an se dem a du di sopm dem we di Baibl se dem fi du so dat dem kyan baptaiz.

¹² “Im pikni dem no fi wail ar go gens wa dem mada an faada se bot mos aalwiez shuo dem rispek.” Ef yu pikni we liv wid yu baptaiz an sin bad an a kaa yu neehn did a du wa yu fi du fi chrien dem, dat miin tu se yu naa go kyan bi wan elda agen.​—Luk iina The Watchtower fi Aktuoba 15, 1996, p. 21, par. 6-7.

DEM FI A DU TINGZ FI DI BREDA AN SISTA DEM IINA DI KANGGRIGIESHAN

13. Ou wan elda kyan shuo se im “jengkl” an im ‘no ful-a imself’?

¹³ Di breda dem we av som gud wiez a wan blesn tu di breda an sista dem iina di kanggrigieshan. Wan man we “jengkl” wok aad fi liv iina piis wid ada piipl an im elp ada piipl fi liv iina piis wid dem wan aneda tu. Im a-go lisn tu wa ada piipl av fi se tu. So ef yu iina wan miitn wid som elda, an muos a dem a se sopm difrant fram yu, yu a-go wilin fi go wid wa dem a se az lang az it no go gens wa di Baibl se? “Im no fi ful-a imself.” Dis miin tu se yu no fi aalwiez waahn fi du tingz di wie ou yu fiil se it fi go, an yu fi redi fi lisn tu wa ada piipl av fi se tu. (Jen. 13:8, 9; Pr. 15:22) Yu fi chrai fi “liv iina piis wid evribadi” an yu no “kwik fi get beks.” So insted-a fi chriit piipl rof an no aarait wid notn we dem a se, yu a-go taak tu dem iina wan kain an jengkl wie. Kaa yu lov piis yu a-go du aal we yu kyan du fi liv iina piis wid piipl, aal wen it aad. (Jmz. 3:17, 18) Wen yu taak tu piipl iina wan nais wie, yu kyan mek tingz beta aal wen yu a diil wid di wan dem we a fait gens yu kaaz a wa yu biliiv iina.​—Joj. 8:1-3; Pr. 20:3; 25:15; Mat. 5:23, 24.

14. Wen di Baibl se di elda dem “no fi bi sumadi we jos staat biliiv iina Jiizas Krais” an se dem fi “stik tu Gad,” wa dat miin?

¹⁴ Wan breda we waahn fi bi wan elda “no fi bi sumadi we jos staat biliiv iina Jiizas Krais.” Aalduo dem na’afi bi sumadi we baptaiz fi uol iip a ier, dem niid fi bi sumadi we chrang iina wa dem biliiv iina. Bifuo dem pik yu fi bi wan elda, yu fi shuo se yu ombl jos laik Jiizas an yu a wiet pan Jeuova fi gi yu wok fi du. (Mat. 20:23; Fil. 2:5-8) Wen yu a liv di wie ou Jeuova waahn yu fi liv an yu a du di sitn dem we im aaganaizieshan se yu fi du, a so yu shuo se yu a “sumadi we a stik tu Gad no mata wa.”​—1 Tim. 4:15.

15. Yu tingk fi bi wan elda di breda afi kyan gi taak gud gud?

¹⁵ Di Baibl mek wi nuo se wan elda mos “kyan tiich gud.” Bot dat no miin tu se yu afi bi wan breda we kyan gi taak gud gud. Kaa wen wi tingk bout it, nof a wi elda dem kyan priich gud wen dem de a sorvis, an dem kyan yuuz di Baibl fi elp push di breda an sista dem fi gwaan tan op chrang, bot dem mait-a kyaahn gi wan taak so gud. (1 Timoti 3:2, NWT; luk pan 1 Korintiyan 12:28, 29 an Ifiijan 4:11.) So aalduo dem mait-a kyaahn gi wan taak so gud, dem stil fi chrai aad fi kyan tiich beta. Mek wi luk pan wa kyan elp dem fi du beta.

16. Wa kyan elp yu fi kyan tiich gud? (Luk pan di picha tu.)

¹⁶ “Di elda mos uol aan chrang pan di riil mesij . . . we wi tiich.” Fi kyan tiich gud wan elda afi mek shuor se im kyan yuuz Gad Wod fi elp sumadi, no mata wich paat im de. Im fi nuo wa de iina di Baibl an wi buk an pamplet dem. (Pr. 15:28; 16:23; Taitos 1:9.) Wen yu a stodi, chrai an mek shuor se yu get wa wi buk an pamplet dem a se so dat yu kyan du di rait ting. An wen yu a tiich, yu fi chrai aad fi mek shuor se wa yu a se a toch di aat a di wan dem we a lisn tu yu. An yu kyan aks di elda dem we a gi taak lang taim fi elp yu an du wa dem se. (1 Tim. 5:17) Wan elda fi kyan “tiich piipl di rait sitn” fi elp bil dem op. Bot som a di taim im afi go yuuz Gad Wod fi “karek” dem. Bot no mata wa dem a du, dem fi tek dem taim wid di sumadi. Yu kyan bi wan gud tiicha laik Jiizas wen yu shuo se yu lov yu breda an sista dem an yuuz Gad Wod fi elp dem.​—Mat. 11:28-30; 2 Tim. 2:24.

NO TAP DU DI SOPM DEM WE KYAN MEK YU TON WAN ELDA

17. (a) Wa kyan elp wan ministiiriyal sorvant fi no tap du di sitn dem we im fi du fi ton wan elda? (b) Wen di elda dem a-go pik sumadi fi ton wan elda, wa dem fi memba se? (Luk pan di paat we niem “Memba Se Sumadi No Afi Porfek Fi Ton Wan Elda.”)

¹⁷ Afta som breda we a ministiiriyal sorvant luk pan di sitn dem we dem fi du fi ton wan elda, dem mait-a fiil laik se dem naa go kyan ton wan elda. Bot dem fi memba se Jeuova an im aaganaizieshan naa ekspek nobadi fi du dem sitn ya porfek. (1 Pii. 2:21) An a Jeuova a-go yuuz im uoli spirit fi elp yu fi du dem sopm ya. (Fil. 2:13) Ef yu waahn fi chrai an du non a dem sopm ya beta, jos prie tu Jeuova fi elp yu fi dwi’it. Chrai an riid op muor bout di sopm dem we yu waahn fi du an yu kyan aks wan a di elda dem fi elp yu.

18. Wa di ministiiriyal sorvant dem fi gwaan du?

¹⁸ So mek aal a wi, aal di wan dem we a elda tu, gwaan du di sitn dem we wi taak bout iina da lesn ya. (Fil. 3:16) So ef yu a wan ministiiriyal sorvant rait ya nou, no tap du di sopm dem we yu fi du fi ton wan elda. Aks Jeuova fi elp yu fi gwaan du muor fi im an di breda an sista dem iina di kanggrigieshan. (Aiz. 64:8) Jeuova a-go bles yu wen yu du di sitn dem we im waahn yu fi du fi ton wan elda.