Yu Memba?

Yu did riid Di Wachtowa dem fi da ier ya gud? Wel si ef yu kyan ansa dem kwestiyan ya:

A ou Jeuova shuo wi di bes wie ou fi chriit uman?

Im no paashal wen im a diil wid dem, an im no lov man muor dan uman. Gad lisn tu di uman dem, an im kier bout ou dem fiil bout tingz. An im chos dem fi du im wok.​—w24.01, p. 15-16.

A wa Ifiijan 5:7 a taak bout wen it se: “No kip kompni wid dem de saat a piipl de, an no tek paat iina dem fuulinish”?

Di apasl Paal did a waan wi fi no kip kompni wid piipl we mek it aad fi wi du wa Jeuova se rait. Wi no onggl spen taim wid piipl we de roun wi, bot wi spen taim wid piipl pan di intanet an dem ting de tu.​—w24.03, p. 22-23.

A wa kain-a tuori wi no fi a lisn tu?

Ef wi fren dem we lov wi tel wi wan tuori bout Jeuova aaganaizieshan bot dem no shuor se di tuori chuu, wi no fi lisn tu dem. An wi kyan aal get dem tuori ya iina iimiel fram piipl we wi no nuo. An wi no fi lisn tu di tuori dem fram di wan dem we tap sorv Jeuova an a chrai mek ada piipl tap sorv im tu.​—w24.04, p. 12.

Wa wi nuo an wa wi no nuo bout ou Jeuova a-go joj King Salaman, di piipl dem we ded iina Sadam an Gomaro, an di wan dem we ded iina di Flod?

Wi no nuo ef Jeuova get rid a dem piipl de fi gud ar ef im a-go mek dem kom bak alaiv. Bot wi nuo se Jeuova nuo evriting an im tek im taim wid piipl an im redi fi paadn dem.​—w24.05, p. 3-4.

Kaa Gad komiin laik “wan rak,” wa dat mek wi nuo bout im? (Dyuu. 32:4)

A Jeuova wi ron tu fi kip wi sief. Wi kyan aalwiez dipen pan im. An im naa go chienj, im naa go chienj di wiez dem we im av, an eniting we im plan se im a-go du, a dat im a-go du.​—w24.06, p. 26-28.

Wa kyan elp yu fi lov yu nyuu kanggrigieshan?

Chos iina Jeuova fi elp yu siem laik ou im elp im piipl dem fram wie bak wen. Yu no fi aalwiez a luk bak pan ou tingz did stie iina di kanggrigieshan we yu a kom fram. Du tingz wid di breda an sista dem iina yu nyuu kanggrigieshan, an chrai fi fain som nyuu fren.​—w24.07, p. 26-28.

Wa wi lorn fram di chrii tuori dem we de iina Matyu chapta 25?

Di tuori bout di shiip dem an di guot dem mek wi nuo se wi fi du tingz we shuo se wi a du wa rait an wi a du di sitn dem we Gad se. Di tuori bout di yong gyal dem we did waiz an di wan dem we did fu-fuul mek wi nuo se wi fi du tingz fi shuo se wi a redi op wiself fi gwaan sorv Jeuova til da worl ya don. An di tuori bout di bag a guol dem mek wi nuo wa mek it impuotant fi wi du tingz fi shuo se wi a wok aad.​—w24.09, p. 20-24.

A ou ai di front paat a Gad ous we Salaman did mek did bi?

Iina 2 Kranikl 3:4, som sitn we dem did rait uova di Baibl pan did se “120” kyubik iina da vors ya, an dat wuda mek di front paat a Gad ous bi 175 fut ai. Bot som ada sitn we dem did rait uova we wi kyan chos se “20 kyubik” ai, an dat a 30 fut. Di laas wan wuda mek muor sens sins it mach op wid ou tik di waal dem fi Gad ous did bi.​—w24.10, p. 31.

Wen di Baibl se wan ministiiriyal sorvant fi “onggl av wan waif,” wa els it did av fi du wid? (1 Tim. 3:12)

It miin tu se im no fi a du no seks sin niida. Bot a no onggl dat, im fi stik tu im waif wan. Im no fi mek no ada uman fiil se im waahn dem.​—w24.11, p. 19.

Wa mek wi kyan se wa Jiizas se a Jan 6:53 neva av notn fi du wid wen dem a kip di Laad Sopa?

A Jan 6:53 Jiizas se piipl wuda niid fi nyam im badi an jringk im blod. Im se dis iina 32 C.E., iina Gyalalii, tu di Juu dem we neehn chos iina im. Bot a did wan ier afta dat iina Jeruusilem Jiizas did staat fi kip di Laad Sopa. An dat de taim de im did taak tu di wan dem we a-go ruul wid im iina evn.​—w24.12, p. 10-11.