Aal A Unu We A Yong Breda​—Du Laik Maak An Timoti

1-2. Wa a som a di sitn dem we kuda mek Maak an Timoti no du muor fi Jeuova?

WI NUO fi shuor se nof a unu yong breda waahn fi du muor fi Jeuova an fi du muor fi unu breda an sista dem tu. An it riili nais fi nuo se wi av so moch yong man we riili waahn fi du dat! (Sa. 110:3) Bot yu mait-a fain it aad fi du kaa yu mait-a a wanda wa mait-a apm iina di fyuucha. An yu mait-a no se yu wi du sortn tingz kaa yu no shuor ef yu kyan manij it. Ef yu fiil da wie de, jos memba se a no yu wan.

² Maak an Timoti did go chuu som a di sitn dem we yu mait-a a go chuu rait ya nou. Bot dem neehn mek kaa dem neehn nuo wa wuda apm iina di fyuucha, ar kaa dem neva shuor ef dem kuda manij sitn, tap dem fram du wa dem did waahn fi du fi Jeuova. Maak mait-a did a liv wid im mada iina wan nais ous wen Paal an Baanabas did aks im fi kom wid dem di fos taim dem did a go roun go priich a di difrant difrant plies dem. (Aks 12:12, 13, 25) Bot Maak lef im yaad an di piipl dem we im nuo fi du muor fi Jeuova. An di fos plies im go a Antiyak. An afta dat, im go a som difrant plies wid Paal an Baanabas. (Aks 13:1-5) An Timoti mait-a did a liv wid im mada an faada tu wen Paal did aks im fi kom wid im iina di priichin wok. Bot Timoti neehn mek kaa im did yong an neehn nuo nof mek im no du muor fi Jeuova. (Luk pan 1 Korintiyan 16:10, 11 an 1 Timoti 4:12.) An kaa im go wid Paal im get uol iip a blesn.​—Aks 16:3-5.

3. (a) A ou wi nuo se Paal did lov Maak an Timoti uol iip? (2 Timoti 4:6, 9, 11) (Luk pan di picha dem tu.) (b) Wa a som a di kwestiyan dem wi a-go get di ansa fa iina da lesn ya?

³ Kaa Maak an Timoti did se dem wuda du muor fi Jeuova, dem get fi lorn uol iip a tingz an dem get fi du uol iip a big tingz fi Jeuova wen dem did yong. An Paal did lov dem man ya uol iip kaa wen im bout fi ded, im tel dem fi kom wich paat im de. (Riid 2 Timoti 4:6, 9, 11.) Wa a som a di wiez dem we Maak an Timoti did av we mek Paal lov dem so moch? Wa kyan elp di yong breda dem fi du laik dem, an ou wa Paal did se tu Timoti kyan elp di yong breda dem tide?

DU LAIK MAAK AN REDI FI ELP ADA PIIPL

4-5. Wa mek wi nuo se Maak did redi fi elp ada piipl?

⁴ Bies pan wa wan buk se, wen wi a du sitn fi elp sumadi, wi a-go “chrai wi bes fi dwi’it, an no tap dwi’it til it don.” An Maak elp wi fi si ou wi fi du dis, kaa wen Paal did tan op chrang an se im neehn fi kom wid dem wen dem a go roun go priich a di difrant difrant plies dem di sekan taim, Maak mos did fiil a wie. (Aks 15:37, 38) Bot dat neehn mek Maak tap elp di breda an sista dem.

⁵ Aalduo Maak neehn get fi go wid Paal, im did get fi go wid im kozn, Baanabas. An 11 ier afta dat, Maak did iina Ruom de elp Paal wen dem did lak im op di fos taim. (Failii. 23, 24) Paal did api so moch fi di elp we Maak did gi im dat im se im ‘elp an push im uol iip.’​—Kol. 4:10, 11.

6. Kaa Maak did spen nof taim wid di breda an sista dem we chrang iina wa dem biliiv iina, a ou dat did elp im? (Luk pan di said paint.)

⁶ Kaa Maak did spen nof taim wid som ada breda an sista we chrang iina di sitn dem we dem biliiv iina, dat did elp im tu. Afta im spen nof taim wid Paal iina Ruom, im go a Babilan go wok wid Piita. An chuu dem get fi spen nof taim wid dem wan aneda, dem get so kluos dat Piita se Maak komiin ‘laik im bwai pikni.’ (1 Pii. 5:13) An wen dem a wok wid dem wan aneda, Piita mait-a did tel im fren Maak uol iip a tingz bout wa Jiizas did du wen im de pan ort, an a dem sitn de Maak rait bout iina di Baibl buk we niem Maak.a

7. A ou wan yong breda we niem Seung-Woo did du laik Maak? (Luk pan di picha tu.)

⁷ Ef yu waahn fi du sopm fi Jeuova, an yu no get fi dwi’it, jos gwaan tek taim wid yuself an gwaan luk fi ada tingz we yu kyan du fi sorv Jeuova an fi elp yu breda an sista dem jos laik we Maak did du. An wan neda ting we Maak did du a dat im stie kluos tu di breda dem we chrang iina wa dem biliiv iina. Luk ou da breda ya we niem Seung-Woo, we a wan elda ya nou, did du laik Maak. Im se wen im weehn yong, im yuus tu luk pan di sitn dem we di ada yong breda dem a get fi du, an im did a wanda ef nobadi neehn a si di sitn dem we im did a du. So im go taak tu som breda we chrang iina di sitn dem we dem biliiv iina. An wan elda mek im nuo se a wan gud sitn fi du tingz fi elp ada piipl aal ef nobadi naa si im fi big im op fi wa im a du. An dat did elp Seung-Woo nof kaa im staat du uol iip a tingz fi elp out di breda an sista dem we op iina iej, laik im elp fi kya som a dem go a di miitn dem. Wen im memba wa did gwaan, im se: “Mi get fi nuo wa it riili miin fi du tingz fi ada piipl wid aal a mi aat. An mi fain out se a wen mi du tingz fi ada piipl mi riili api.”

DU LAIK TIMOTI AN SHUO SE YU RIILI LOV AN KIER BOUT ADA PIIPL

8. A wa mek Paal did pik Timoti fi go roun wid im? (Filipiyan 2:19-22)

⁸ Paal did waahn piipl we no friedi-friedi fi go roun wid im wen im did a go baka di plies dem we di piipl dem did mek tingz aad fi im. So fos im pik Sailas, wan man we chrang iina wa im biliiv iina, fi go wid im. (Aks 15:22, 40) Den afta dat, im pik Timoti fi go wid im tu. An wan a di gud ting bout Timoti a dat di breda an sista dem did av gud tingz fi se bout im. (Aks 16:1, 2) An im did riili kier bout piipl tu.​—Riid Filipiyan 2:19-22.

9. A wa Timoti did du fi shuo se im riili kier bout di breda an sista dem?

⁹ Fram Timoti did staat wok wid Paal, im shuo se im kier bout ada piipl muor dan ou im kier bout imself. An kaaz a dat, Paal kuda lef im iina Beriya fi gwaan push di breda an sista dem we dis get baptaiz fi tan op chrang. (Aks 17:13, 14) Timoti did lorn nof fram Sailas we did tan iina Beriya tu. An afta dat, kaa Timoti did gwaan so gud, Paal sen im wan fi go a Tesalonaika fi elp di breda dem de fi get chrangga iina wa dem biliiv iina. (1 Tes. 3:2) So fi di neks 15 ier ar so, Timoti get fi lorn ou ‘fi baal wid di wan dem we a baal.’ So dat miin tu se im wuda shuo se im fiil it fi di wan dem we a sofa. (Ruo. 12:15; 2 Tim. 1:4) So a ou di yong breda dem kyan du laik Timoti?

10. A wa did elp Woo Jae fi shuo se im kier bout ada piipl?

¹⁰ Wen wan breda we niem Woo Jae did yong, im did a fain it aad fi taak tu di breda an sista dem we uolda dan im. Wen im de a miitn, im wuda jos se oudi tu dem an go we kwik. Bot wan elda tel im se im fi tel dem sopm we im laik bout dem, an im fi tingk bout tingz we dem mait-a waahn fi taak bout. An wen Woo Jae du dem sopm ya, it elp im fi shuo se im kier bout ada piipl. Nou Woo Jae a wan elda, an im se: “Mi fain it iiziya fi staat taak tu piipl no mata dem iej. An nou mi waahn nuo muor bout wa a gwaan wid mi breda an sista dem. An dat a elp mi ya nou fi elp mi breda an sista dem.”

11. Wa di yong breda dem kyan du fi shuo se dem kier bout di ada breda an sista dem? (Luk pan di picha tu.)

¹¹ A siem so di yong breda dem kyan lorn ou fi du tingz fi shuo se dem kier bout ada piipl. Laik wen dem de a miitn, dem kyan taak tu di breda an sista dem we a difrant difrant iej an we gruo difrant fram dem, an aks dem ou dem du, an lisn gud wen dem a taak. Den yu a-go si wa yu kyan du fi elp dem. Yu mait-a fain out se wan ozban an waif we op iina iej mait-a niid elp fi yuuz di JW Library^® ap, ar ou fi yuuz dem fuon an dem ting de. Ar yu mait-a fain out se dem na’av nobadi fi wok wid iina sorvis, so yu mait-a fain se yu kyan go du tingz so dat yu kyan go wok wid dem. Wen yu du sitn fi elp di breda an sista dem, yu a du sopm gud we ada piipl kyan fala.

DI TING DEM WE PAAL SE KYAN ELP YU

12. A ou wa Paal did se tu Timoti kyan elp di yong breda dem?

¹² Paal did tel Timoti tingz we im fi du we kyan elp im so dat im kyan gwaan du di wok we Jeuova gi im fi du. (1 Tim. 1:18; 2 Tim. 4:5) An ef yu a wan yong breda, dem sitn ya we Paal se kyan elp yu tu. Wa yu kyan du a riid di tuu leta dem we Paal did rait tu Timoti, an riid it laik se a yu im did rait it tu, an si wa yu kyan lorn fram wa it se. Mek wi luk pan som a di sopm dem we it se.

13. Wa wi afi du ef wi a-go stik tu Jeuova?

¹³ “Wok aad fi fala we Gad se an liv ou yu nuo Gad waahn yu fi liv.” (1 Tim. 4:7b) Wen di Baibl se wi fi liv ou Gad waahn wi fi liv, dat miin tu se wi a-go stik tu Jeuova an wi a-go waahn fi du di sopm dem we a-go mek im api. An sins wi no baan wid dem wiez ya, a sitn wi wuda afi wok aad fi du. Wen di Baibl did rait iina Griik, wen dem yuuz di wod dem “wok aad”, dem yuuz it fi taak bout sumadi we wok aad fi chrien fi ron iina wan ries. An dem rona ya wuda chrai aad fi no du sortn tingz we dem wuda waahn fi du. An a siem so wi naa go du sortn tingz we wi wuda waahn fi du so dat wi kyan get kluos tu Jeuova.

14. Wa a di riizn we mek yu fi riid di Baibl? Yuuz wan tuori fi tel wi ou wi kyan dwi’it.

¹⁴ Wen yu a riid di Baibl, chrai fi memba se yu a dwi’it fi get kluosa tu Jeuova. So wi a-go luk pan wa wi kyan lorn fram wan taim wen Jiizas a taak tu wan yong ruula we did rich. (Maak 10:17-22) Da yong ruula de did nuo se Jiizas a did di Mesaiya, bot kaaz a sortn tingz im neehn redi fi fala im. Bot Jiizas did luk pan im “an lov im.” It riili nais ou Jiizas did taak tu di man. Jiizas did waahn im fi mek op im main fi du di rait ting. An Jiizas did a shuo umoch Jeuova did lov di man tu. (Jan 14:9) Wen yu tingk bout wa did gwaan ya-so an wa a gwaan iina fi yu laif, yu kyan aks yuself se, ‘Wa mi kyan du fi get kluosa tu Jeuova an fi du muor fi elp di breda an sista dem?’

15. Wa mek wan yong breda fi tingk bout di sitn dem we im a du we ada piipl kyan fala? Tel wi ou im kyan dwi’it. (1 Timoti 4:12, 13)

¹⁵ “Mek shuor yu liv rait so piipl kyan fala yu.” (Riid 1 Timoti 4:12, 13.) Paal did mek Timoti nuo se im no onggl fi chrai fi kyan riid an tiich piipl gud, bot im fi chrai fi av som gud wiez tu. Im fi du tingz fi mek piipl si se im lov dem, im fi chos iina Gad, an liv wan kliin laif. Im did tel im dem sopm ya kaa im did nuo se wen sumadi a du di sitn we dem tel ada piipl fi du, it aalwiez mek dem lisn tu dem muor. Laik ef yu get wan taak fi du we a taak bout ou yu fi du muor iina di priichin wok, yu a-go fiil beta fi taak bout it ef yu a du yu bes iina di priichin wok. So piipl a-go kyan si se yu a du we yu did taak bout.​—1 Tim. 3:13.

16. (a) Wa a som sopm we wan yong breda kyan du we mek ada piipl kyan fala dem? (b) Wa kyan elp wan yong breda fi taak iina wan wie we shuo se im chrang iina wa im biliiv iina?

¹⁶ Iina 1 Timoti 4:12, Paal tel Timoti som difrant difrant sitn we wan yong breda kyan du we mek ada piipl kyan fala dem. So wa yu kyan du a luk pan dem sitn de we Paal did taak bout an si ou yu kyan du beta. Laik wen yu a taak tu piipl, chrai an tingk bout ef wa yu se a-go mek piipl fiil beta. So ef yu stil a liv a yaad wid yu mada an faada, yu kyan mek dem nuo muor se yu tangk dem fi aal a wa dem a du fi yu. An wen miitn don, yu kyan tel wan breda ar sista sitn we yu laik bout wa dem did du iina dem taak. An wen yu a ansa wan kwestiyan a di miitn, yu kyan chrai fi ansa iina yu uona wod dem. Wen yu chrai aad fi du aal a dem sitn ya, yu a shuo se yu a get chrangga an chrangga iina di sitn dem we yu biliiv iina.​—1 Tim. 4:15.

17. Wa a-go elp wan yong breda fi get fi du di sitn dem we im waahn fi du fi Jeuova? (2 Timoti 2:22)

¹⁷ “So ron we fram di wikid sitn dem we di yong piipl dem waahn fi du an chrai aad aad fi du we rait.” (Riid 2 Timoti 2:22.) Paal did a mek Timoti nuo se im no fi mek sortn an sortn tingz tap im fram get kluos tu Jeuova ar no mek im get fi du sortn tingz we im waahn fi du fi Jeuova. A siem so yu no fi mek sortn an sortn tingz tap yu fram get kluos tu Jeuova ar fi du muor fi im. An yu mait-a si se notn no rang fi du sortn tingz, bot di mount a taim we yu yuuz fi du dem sitn de kyan mek yu no get fi du wa yu waahn fi du fi Jeuova. Laik yu kyan tingk bout umoch taim yu yuuz a plie baal, ar fi plie vidiyo giem, ar fi de pan di intanet an dem ting de. Di taim we yu yuuz fi du dem sopm de yu mait-a kuda yuuz dem taim de fi du ada tingz fi Jeuova. Laik fi fiks op di Kindom Aal ar fi du kyaat wok wid di breda an sista dem. Ef yu du dem sitn ya, it a-go elp yu fi ton gud fren wid di breda an sista dem, an dem breda an sista ya a-go elp yu fi waahn du muor fi Jeuova an fi dwi’it tu.

WEN WI DU TINGZ FI ADA PIIPL, IT A-GO MEK WI GET UOL IIP A BLESN

18. Wa mek wi kyan se Maak an Timoti did api wid dem laif?

¹⁸ Maak an Timoti did gi op uol iip a tingz fi du muor fi di breda an sista dem, an dem did stil api wid dem laif. (Aks 20:35) Laik Maak did go a difrant difrant plies fi elp di breda an sista dem. An im did get fi rait wan buk bout Jiizas laif we neehn dedi-dedi bot did ful op a bie tingz. An Timoti did elp Paal wen im did a staat op di difrant difrant kanggrigieshan dem, an im did elp di breda an sista dem fi get chrang iina wa dem biliiv iina. An wi nuo se Jeuova did api se dem did gi op nof sitn fi du muor fi im.

19. Wa mek di yong breda dem fi chrai fi du wa Paal did tel Timoti, an wa a-go apm ef dem du dat?

¹⁹ Wen wi luk pan di leta dem we Paal did rait Timoti, wi get fi si umoch im did lov im. An wa iina dem leta ya mek wi si umoch Jeuova lov di yong breda dem, an se im waahn dem fi av wan nais laif rait ya nou. So chrai aad fi du di sitn dem we Paal did tel Timoti fi du an fi waahn fi du muor fi di breda an sista dem. Ef yu du dat, yu a-go liv wan nais laif rait ya nou, an iina di fyuucha yu a-go “get di laif we Gad pramis.”​—1 Tim. 6:18, 19.