Du Laik Di Ienjel Dem We A Du Wa Jeuova Se Dem Fi Du

1-2. (a) Ou wi difrant fram di ienjel dem? (b) A ou wi komiin laik dem?

JEUOVA av wan big fambili we a worship im, an di ienjel dem a paat a da fambili de. So wen im jraa yu fi kom worship im, yu ton paat a da fambili de tu. (Dan. 7:9, 10) Iivn duo wi an di ienjel dem a paat a di siem fambili, dem difrant fram wi. Laik wan a di ting we mek dem difrant a dat dem de bout langga dan wi. (Juob 38:4, 7) Wan neda ting a dat dem av muor powa dan wi. An di wie ou dem uoli an a du wa rait, wi naa go eva uoli an du wa rait laik dem kaa wi no porfek.​—Luuk 9:26.

² Aalduo wi difrant fram di ienjel dem iina dem wie ya, wi komiin laik dem iina som wie tu. Laik di ienjel dem av som gud wiez laik wa Jeuova av, an wi kyan av dem wiez ya tu. Jeuova mek dem iina wan wie so dat dem kyan mek op dem uona main bout tingz, an a so im mek wi tu. An dem av dem uon niem an aal a dem no stie di siem wie, an dem av difrant difrant wok fi du, an a di siem ting wid wi tu. An jos laik ou dem waahn fi worship Jeuova, a siem so wi waahn fi worship im tu.​—1 Pii. 1:12.

3. Wa a som tingz we wi kyan lorn fram di ienjel dem?

³ Kaa wi komiin laik di ienjel dem, wi kyan lorn wol iip a gud tingz fram dem. Iina da lesn ya, wi a-go luk pan ou wi kyan ombl laik dem, an lov piipl laik dem, an ou wi kyan wiet an eng aan an no gi op no mata wa, an ou wi kyan chrai aad fi kip di kanggrigieshan kliin laik dem.

DI IENJEL DEM OMBL

4. (a) A ou wi nuo se di ienjel dem ombl? (b) Wa mek di ienjel dem ombl? (Saam 89:7)

⁴ Aalduo di ienjel dem waiz an nuo nof sitn an dem chrang bad, dem stil du wa Jeuova tel dem fi du; dis mek wi si se dem ombl. (Sa. 103:20) Wen dem du di ting dem we dem get fi du, dem no buosi-buosi an dem no shuo aaf fi shuo ou chrang an powaful dem bi. Bot dem api fi du wa Jeuova waahn dem fi du aal wen di Baibl no tel wi dem niem.a (Jen. 32:24, 29; 2 Ki. 19:35) Dem no tek di big op we Jeuova fi get. Di ienjel dem ombl kaa dem lov Jeuova an dem av nof rispek fi im.​—Riid Saam 89:7.

5. Wen wan ienjel did afi jraa op Jan, ou im did shuo se im ombl? (Luk pan di picha tu.)

⁵ Mek wi luk pan sitn we did apm iina 96 C.E. wen wan ienjel did go gi Jan wan vijan. (Rev. 1:1) Wen Jan get di vijan, Jan chrai fi worship di ienjel. Bot di ienjel tap im kwik kwik an se: “No, yu kyaahn du dat! Mi sorv Gad jos laik yu an yu breda an sista dem . . . A Gad yu fi worship.” (Rev. 19:10) So dis mek wi si se di ienjel did ombl. So im neehn ich fi mek Jan nuo se a Jeuova im fi worship an a Jeuova wan fi get di priez an big op. An a no laik se im did tingk se Jan a neehn nobadi. Iivn duo di ienjel did a worship Jeuova langga dan Jan an im did av muo powa dan im, im stil si Jan laik sumadi we a worship Gad jos laik im. So iivn duo im did afi jraa op Jan, im neehn rof im op, bot im taak tu im iina wan nais wie kaa im did nuo se Jan did jos fiil gud kaaz a aal a wa im si.

6. Ou wi kyan ombl wiself laik di ienjel dem?

⁶ Ou wi kyan ombl wiself laik di ienjel dem? Wen wi get wok fi du iina Jeuova aaganaizieshan, wi fi dwi’it an no buosi-buosi, an wi fi mek Jeuova get di big op fi wa wi du. (1 Kor. 4:7) An wi no fi fiil laik se wi beta dan ada piipl kaa wi a sorv Jeuova langga dan dem ar kaa wi a du speshal wok fi Jeuova. Matarafak, di muor tingz we wi get fi du fi Jeuova a di muor wi fi ombl wiself. (Luuk 9:48) Jos laik di ienjel dem, wi waahn fi du tingz fi ada piipl an wi no fi waahn fi a big op wiself.

7. Ef wi afi jraa op sumadi, ou wi kyan shuo se wi ombl?

⁷ Wan neda wie wi kyan shuo se wi ombl a wen wi a jraa op sumadi, laik wan breda ar wan sista ar wi pikni. Ef wi afi jraa dem op wi fi mek dem nuo se wi siiros bout wa wi a se, bot wi no fi mek dem fiil laik se wi a bata dem. Wi fi dwi’it iina wan nais wie, jos laik ou di ienjel did dwi’it wen im did afi jraa op Jan. So ef wi no tingk se wi beta dan nobadi els, den wen wi afi yuuz di Baibl fi jraa op sumadi wi a-go mek dem si se wi rispek dem an se wi fiil it fi dem.​—Kol. 4:6.

DI IENJEL DEM LOV PIIPL

8. (a) Azkaadn tu Luuk 15:10, wa di ienjel dem a du fi shuo se dem lov piipl? (b) A ou di ienjel dem a elp wid di priichin wok? (Luk pan di picha tu.)

⁸ A no laik se di ienjel dem no bizniz wid wa a gwaan wid piipl. Dem lov piipl. Dem api wen wan sina ton tu Gad an ton we fram di rang sitn dem we dem did a du. (Riid Luuk 15:10.) Di ienjel dem a elp wid di priichin wok we a gwaan. (Rev. 14:6) A no laik se dem a priich tu piipl, bot dem a elp wi fi fain di wan dem we waahn fi lorn bout Jeuova. Wi no nuo fi shuor uu an uu dem elp, kaa Jeuova a yuuz ada tingz, laik im uoli spirit, fi elp wi fi fain piipl we wel waahn fi sorv im tu. (Aks 16:6, 7) Bot im a yuuz im ienjel dem nof nof. So wen wi out de a priich, wi kyan nuo fi shuor se dem de de a bak wi.​—Luk pan di paat we niem “Jeuova Ansa Dem Prieya Dem.”b

9. Ou wi kyan du laik di ienjel dem an shuo piipl se wi lov dem?

⁹ Ou wi kyan du laik di ienjel dem an shuo piipl se wi lov dem? Wi kyan du dat ef wi ier se sumadi we did get put outa di kanggrigieshan staat fi sorv Jeuova agen an wi mek dem nuo se wi api se dem kom bak. Dis a-go mek dem si se wi lov dem. (Luuk 15:4-7; 2 Kor. 2:6-8) Wi kyan du laik di ienjel dem an go aad iina di priichin wok tu. (Iik. 11:6) An jos laik ou dem shuo se dem di de fi wi iina di priichin wok, a siem so wi kyan shuo se wi di de fi wi breda an sista dem wen dem a priich tu. Laik wi kyan plan fi wok wid di wan dem we jos staat priich. An wi kyan wok wid di wan dem we op iina iej ar we kyaahn muuv roun gud so dat dem kyan priich tu.

10. Wa wi kyan lorn fram wa Sara did go chuu?

¹⁰ Ef wi kyaahn priich laik ou wi wuda waahn fi priich, wi stil kyan wok wid di ienjel dem iina di priichin wok. Luk pan wa did gwaan wid wan sista iina Indiya we niem Sara.c Shi did a paiyanier fi bout 20 ier, bot afta dat shi get sik bad we shi kudn kom outa di bed. An dis mek ar sad bad. Bot kaa di breda an sista dem did a elp ar an shi did a riid ar Baibl aafn, shi staat fi luk pan tingz difrant. Shi kudn iivn sidong iina ar bed fi rait leta, bot shi staat fi yuuz di fuon fi priich tu piipl. So shi kaal aal a di piipl dem we shi yuus tu taak tu bout di Baibl, an den dem tel ar bout ada piipl we wuda waahn fi stodi tu. So iina no taim, Sara en op wid 70 Baibl stodi. An kaa shi wan kudn manij aal a dem, shi aks di breda an sista dem fi du som a dem Baibl stodi de. An nof a dem staat kom a miitn. Di ienjel dem wel api fi wok wid di breda an sista dem we komiin laik Sara we a du aal a we dem kyan du iina di priichin wok!

DI IENJEL DEM A ENG AAN AN A WIET

11. Ou di ienjel dem a shuo se dem a wiet pan Jeuova?

¹¹ Di ienjel dem mek wi si wa it miin fi eng aan an no gi op kaa dem si aal a di wikidnis we a gwaan iina di worl fi wol iip a ier nou. An dem did si wen Sietan an nof a di ada wikid ienjel dem ton gens Jeuova. (Jen. 3:1; 6:1, 2; Juud 6) Di Baibl aal mek wi nuo se wan a Sietan wikid ienjel dem did a fait wan a Gad ienjel dem fi wol iip a die. (Dan. 10:13) An Jeuova ienjel dem si se fi wol iip a ier a jos likl bit a piipl did a worship Jeuova di rait wie. Aalduo dem si aal a dem sitn de, dem ienjel de a gwaan sorv Jeuova wid aal a dem aat, an dem api fi dwi’it kaa dem nuo se Jeuova a-go get rid a aal a di wikidnis we a gwaan iina di worl di rait taim.

12. Wa kyan elp wi fi eng aan an go chuu?

¹² Ou wi kyan eng aan an wiet jos laik di ienjel dem? Jos laik di ienjel dem, wi mait-a si bier wikidnis a gwaan an piipl a fait gens wi kaaz a wa wi biliiv iina. Bot jos laik dem, wi nuo se Jeuova a-go get rid a aal di wikidnis we a gwaan. An jos laik di ienjel dem, “mek wi no get taiyad fi du gud.” (Gya. 6:9) Jeuova pramis wi se im a-go elp wi fi go chuu wi prablem dem. (1 Kor. 10:13) So wen wi prie, wi kyan aks Jeuova fi gi wi im uoli spirit we a-go elp wi fi wiet pan im an api tu. (Gya. 5:22; Kol. 1:11) Ef sumadi a fait gens yu ar mek tingz aad fi yu kaaz a wa yu biliiv iina, no fried, bot chos iina Jeuova wid aal a yu aat kaaz im a-go aalwiez de de fi yu an im a-go gi yu di chrent fi go chuu.​—Iib. 13:6.

DI IENJEL DEM A ELP FI KIP DI KANGGRIGIESHAN KLIIN

13. Wa a di speshal wok we di ienjel dem a du iina dem laas die ya? (Matyu 13:47-49)

¹³ Iina dem laas die ya, Jeuova gi di ienjel dem wan speshal wok fi du. (Riid Matyu 13:47-49.) Aal kain-a difrant difrant piipl laik di gud nyuuz we wi priich. An som a dem chienj op tingz iina dem laif fi staat fala Jiizas, bot som a dem no du it. So di ienjel dem get di wok fi “tek out di wikid piipl fram di wan dem we liv rait.” Dis mek wi si se dem a elp fi kip di kanggrigieshan kliin. Bot dis no miin tu se enibadi we tap kom a miitn an so kyaahn kom staat sorv Jeuova agen. An it no miin tu se wi naa go av no prablem iina di kanggrigieshan dem niida. Bot wi nuo se di ienjel dem a wok aad fi elp kip di kanggrigieshan dem kliin.

14-15. Wa wi kyan du fi shuo se wi waahn fi kip di kanggrigieshan kliin iina evri wie laik di ienjel dem? (Luk pan di picha dem tu.)

¹⁴ Ou wi kyan du laik di ienjel dem an kip di kanggrigieshan kliin? Wi kyan du dis wen wi chrai fi kip wi aat kliin an onggl kip fren wid piipl we a du wa rait an ton we fram eniting we a-go doti op wi main. (Sa. 101:3) An wi kyan elp di ada breda an sista dem fi du di ting dem we Jeuova waahn dem fi du tu. Laik ef wi fain out se wan a dem a get miks op iina seks sin ar sitn laik dat, kaa wi lov dem, wi a-go mek dem nuo se dem fi go taak tu di elda dem. Bot ef dem no du dat, wi afi go mek di elda dem nuo wa a gwaan kaa wi waahn dem fi get di elp we dem niid kwik an faas!​—Jmz. 5:14, 15.

¹⁵ Sad fi se, som a di taim som a wi breda an sista dem mait-a sin bad an afi get put outa di kanggrigieshan. Wen dat apm, wi “no fi av notn fi du” wid dem.d (1 Kor. 5:9-13) An wen wi du dat, it elp fi kip di kanggrigieshan kliin an wi a mek dem si se wi lov dem. An dat mait mek dem waiz op an staat fi sorv Jeuova agen. Ef dem du dat, wi api an Jeuova an di ienjel dem api tu.​—Luuk 15:7.

16. Wa a som sopm we yu kyan du laik di ienjel dem?

¹⁶ Wat a nais ting fi nuo wa a gwaan wid Jeuova ienjel dem an fi kyan wok wid dem! So mek wi du laik dem an shuo se wi ombl, an lov piipl, an go chuu an wiet pan Jeuova no mata wa. An mek wi du laik dem an chrai fi kip di kanggrigieshan kliin iina evri wie. Ef wi du laik di ienjel dem, wi a-go kyan worship Jeuova fi eva an eva wid dem.