Get Yu Aat Redi Fi Stodi Gad Wod

Wen wi a du wi uona Baibl stodi, wi waahn fi mek di sitn dem we wi a lorn bout Jeuova toch wi aat so dat wi kyan tingk di wie ou Jeuova tingk an fiil di wie ou im waahn wi fi fiil bout tingz. Di Baibl mek wi nuo se Ezra did tek di taim fi ‘get im aat redi bifuo im riid Gad wod.’ (Ezra 7:10) A ou wi kyan du laik im?

Prie. Bifuo yu staat fi stodi, prie tu Jeuova an aks im fi elp yu andastan wa yu a-go stodi so dat yu kyan du di sitn dem we im waahn yu fi du.​—Sa. 119:18, 34.

Yu fi ombl yuself. Jeuova aid di chuut fram di piipl dem we no ombl laik di wan dem we tingk se dem brait an no niid im elp fi andastan di Baibl. (Luuk 10:21) So wen wi a du wi uona Baibl stodi, wi no waahn fi dwi’it jos bikaa wi waahn ada piipl fi tingk se wi nuo nof tingz. An wen wi lorn bout sitn we wi fi chienj op iina wi laif, wi waahn fi ombl wiself an du wa Jeuova se wi fi du.

Lisn tu wan a wi sang dem. Myuuzik kyan toch wi aat. So wen wi lisn tu wan a wi sang dem bifuo wi staat wi uona Baibl stodi, it wi elp fi get wi aat redi fi lisn tu Jeuova an du di tingz dem we im waahn wi fi du.