Ombl Yuself An Nuo Se A No Evriting Yu A-Go Nuo

1. A ou Jeuova mek wi, an a wa mek im mek wi so?

JEUOVA mek wi iina wan nais wie, we mek wi kyan tingk fi wiself, lorn bout som nyuu sitn, an yuuz op di sitn dem we wi lorn iina wi laif. Jeuova mek wi da wie ya kaa im waahn wi fi yuuz di sitn dem we wi “nuo bout [im]” fi mek op wi main fi sorv im iina di rait wie.​—Pr. 2:1-5; Ruo. 12:1.

2. (a) Wa wi niid fi nuo bout wiself? (Juob 37:23, 24) (Luk pan di picha tu.) (b) Wa mek it impuotant fi wi nuo se an no evriting wi a-go nuo?

² Aalduo Jeuova mek wi iina wan wie we wi kyan lorn nof tingz, a uol iip a sitn wi stil no nuo. (Riid Juob 37:23, 24.) Laik tingk bout Juob, Jeuova did aks im som wol iip a kwestiyan, an a da taim de Juob did si se a uol iip a sitn im neehn nuo. An dat did mek im afi ombl imself an chienj di wie ou im did a tingk. (Juob 42:3-6) A wan gud sitn fi nuo tu se a no evriting wi a-go nuo. An wen wi memba dis, it a-go elp wi fi ombl wiself an chos se Jeuova wi mek wi nuo wa wi riili niid fi nuo so dat wi kyan mek op wi main fi du di rait ting.​—Pr. 2:6.

3. A wa wi a-go luk pan iina da lesn ya?

³ Iina da lesn ya, wi a-go taak bout som tingz we wi no nuo an ou kaa wi no nuo dem sitn de, it mait-a mek laif aad fi wi som a di taim. An wan neda ting we wi a-go luk pan a wa mek a wan gud sitn se wi no nuo sortn an sortn tingz. An di sitn dem we wi a-go lorn a-go elp wi fi chos iina Jeuova, di Gad we nuo evriting, an nuo se im a-go mek wi nuo wa wi riili niid fi nuo.​—Juob 37:16.

WI NO NUO WEN DI WORL A-GO DON

4. Bies pan wa Matyu 24:36 se, wa a wan sitn we wi no nuo?

⁴ Riid Matyu 24:36. Wi no nuo wen di worl a-go don. Iivn Jiizas neehn nuo “di die an di taim” wen di worl a-go don wen im did de pan di ort.a An so im mek im apasl dem nuo se a Jeuova a di onggl wan we av di powa fi disaid wen sortn an sortn tingz a-go apm, an dat a sitn we “im no lou [wi] fi nuo.” (Aks 1:6, 7) Jeuova set di taim aredi wen da worl ya a-go don bot wi no nuo fi shuor wen dat a-go apm.

5. Kaa wi no nuo wen di worl a-go don, ou dat mait-a mek wi fiil?

⁵ So bies pan wa Jiizas se, wi no nuo ou lang wi afi go wiet fi da worl ya don. An ef wi a wiet fi wan lang taim aredi, dis mait-a mek wi fiil laik se wi kyaahn wiet no langga an wi jos waahn gi op. Wos ef som a di piipl dem iina wi fambili an ada piipl mait-a aal a laaf aafa wi an mak wi kaa wi a wiet fi di worl fi don an it no don yet. (2 Pii. 3:3, 4) An so wi mait-a fiil laik se ef wi did nuo fi shuor wen di worl a-go don, it wuda iiziya fi wi fi wiet an no fiil no wie wen piipl a laaf aafa wi an a mak wi.

6. Wa mek a wan gud sitn se wi no nuo wen di worl a-go don?

⁶ Kaa Jeuova no mek wi nuo di taim wen di worl a-go don, dat gi wi di chaans fi shuo se wi a sorv im kaa wi lov im fram wi aat an se wi chos iina im. So wi no waahn it luk laik se wi onggl a sorv Jeuova til di worl don an se a it dat, bot wa wi waahn fi du a sorv Jeuova fi eva. So insted-a fi onggl a tingk bout di taim wen di worl a-go don, wa wi fi du a tingk bout di gud sitn dem we a-go apm wen da taim de kom. An dis a-go elp wi fi get kluosa an kluosa tu Jeuova an elp wi fi chos iina im.​—2 Pii. 3:11, 12.

7. A wa an wa wi nuo?

⁷ It wi du wi gud ef wi tingk bout wa wi nuo. Wi nuo se di laas die dem staat iina 1914. An wi nuo dis kaa iina di Baibl, Jeuova mek wi nuo som tingz we wuda apm bifuo dem apm we mek wi nuo se a iina 1914 di laas die dem wuda staat. Bot im no onggl mek wi nuo di ier, im mek wi nuo tu ou di worl a-go tan afta di laas die dem staat. An kaaz a dat wi nuo fi shuor se di worl suun don. (Zef. 1:14) An wi nuo di wok we Jeuova waahn wi fi a du tu, an dat a fi tel piipl bout di ‘gud nyuuz bout im Kindom.’ (Mat. 24:14) An wi a priich da gud nyuuz de iina bout 240 konchri an iina muo dan 1000 difrant difrant langwij. So wi na’afi nuo di die an taim wen da worl ya a-go don fi wok aad fi priich di gud nyuuz.

WI NO NUO OU JEUOVA A-GO ELP WI

8. A wa mek wi no aalwiez nuo ou Jeuova du tingz? (Iikliiziyastiiz 11:5)

⁸ Riid Iikliiziyastiiz 11:5. Wi no aalwiez nuo ou Jeuova du tingz, kaa fi mek wa im waahn fi apm apm, Jeuova kyan mek sortn an sortn tingz apm ar im kyan lou sortn tingz fi apm. So wi naa go nuo fi shuor wa im a-go du fi elp wi. (Sa. 37:5) An jos laik ou wan saiyantis no andastan evriting bout ou wan biebi gruo iina im mada beli, a siem wie so wi kyaahn andastan evriting bout wa Jeuova a-go du.

9. Kaa wi no nuo ou Jeuova a-go elp wi, wa wi kuda staat fi tingk se?

⁹ Kaa wi no nuo ou Jeuova a-go elp wi, wen wi fi mek op wi main bout sitn wi mait-a if-an-bot an a wanda-wanda. An so wi mait-a no so redi fi du tingz fi Jeuova, laik fi gi op tingz iina wi laif we wi mait-a waahn fi du, ar fi go muuv go elp we dem niid muor elp fi du di priichin wok. Ar wi mait-a aal a wanda ef Jeuova api wid wi ef wi a chrai fi du muor fi im an wi no get fi dwi’it. An wi mait-a fiil so tu ef wi a wok aad iina di priichin wok an wi stil naa get nobadi fi stodi di Baibl wid. Ar wi mait-a aal a wok aad fi bil Kindom Aal an dem ting de bot a wol iip a prablem a kom op.

10. Kaa wi no nuo fi shuor wa Jeuova a-go du fi elp wi, wa a som wiez we wi fi chrai fi av?

¹⁰ Kaa wi no nuo fi shuor ou Jeuova a-go elp wi, it mek wi lorn fi ombl wiself an nuo wa wi kyan du fram wa wi kyaahn du. An it elp wi fi si se Jeuova aalwiez nuo di bes ting fi wi du. (Aiz. 55:8, 9) An wan neda ting we wi lorn a se ef wi waahn tingz fi wok out gud fi wi, wi afi chos iina Jeuova. So wen tingz gwaan gud fi wi iina fiil sorvis ar wen wi a bil Kindom Aal an dem ting de, a Jeuova wi big op fi dem sitn de. (Sa. 127:1; 1 Kor. 3:7) An iivn ef tingz no wok out laik ou wi tingk it wuda wok out, wi fi aalwiez memba se Jeuova si an nuo wa a gwaan. (Aiz. 26:12) So mek wi du wa wi fi du an chos se Jeuova a-go aalwiez elp wi. Wi kyan nuo fi shuor se Jeuova a-go mek wi nuo wa wi niid fi nuo aalduo im mait-a no wok no mirikl wen im a dwi’it.​—Aks 16:6-10.

11. A wa an wa wi nuo bout Jeuova we kyan elp wi?

¹¹ So mek wi sidong an tingk bout wa wi nuo bout Jeuova: se im lov wi, se im a wan Gad we fier, an se im waiz. An nuo se im lov wi fi wa wi du fi im an wa wi du fi wi breda an sista dem. An wi nuo tu se Jeuova aalwiez du som uol iip a gud sitn fi di wan dem we stik tu im.​—Iib. 11:6.

WI NO NUO WA A-GO APM TUMARO

12. Bies pan wa Jiemz 4:13, 14 se, wa wi no nuo?

¹² Riid Jiemz 4:13, 14. Wi kyaahn go roun it se wi no nuo wa a-go apm tu wi tumaro. Iina da worl ya, tingz we wi “neehn tingk wuda apm, apm tu [wi].” (Iik. 9:11) An kaaz a dat, wi no nuo ef wa wi plan fi du a-go wok out, an wi nat iivn nuo ef wi a-go ded bifuo wi get fi du wa wi plan fi du.

13. A ou wi mait-a fiil som a di taim kaa wi no nuo wa a-go apm?

¹³ It mait-a aad fi wi fi go chuu kaa wi no nuo wa a-go apm tu wi iina laif. An kaaz a dat wi mait-a wori wori op wiself bout wa mait-a apm, an dis naa go mek wi api at aal. An aal av a sodn som bad sitn kyan apm we ton wi laif opsaid dong we kyan mek wi sad bad an schres out. An somtaim we wi ekspek fi apm no apm, an dis kyan mek wi fiil a wie an wi mait-a fiil laik wi kyaahn bada no muor.​—Pr. 13:12.

14. Wa wi niid fi du fi bi riili api? (Luk pan di picha dem tu.)

¹⁴ Wen wi no gi op wen wi a go chuu aad taim, wi a shuo se no mata wa, wi a sorv wi Faada kaa wi lov im. Di Baibl tel wi nof tingz we apm tu piipl we shuo wi se wi no fi ekspek se Jeuova a-go protek wi fram aal di bad sitn dem we apm tu wi, an dat im no plan out ou tingz fi go iina wi laif niida. An im nuo se wi na’afi nuo evriting bout wa a-go apm iina di fyuucha fi bi api, bot a wen wi luk tu im fi im tel wi wa fi du an wi du wa im se, a dat a-go mek wi api. (Jer. 10:23) Wen wi tek di elp fram im fi mek op wi main bout wa wi fi du, a laik wi a se, ‘Ef Jeuova waahn wi fi du dis, ar ef im waahn wi fi du dat, den wi wi liv an du dis, ar du dat.’​—Jmz. 4:15.

15. Wa wi nuo se a-go apm iina di fyuucha?

¹⁵ Ye, wi no nuo wa a-go apm evri die, bot wi nuo se Jeuova pramis wi se wi a-go liv fi eva, weda wi a-go liv a evn ar pan ort. An wi nuo se Gad no lai, an se notn kyaahn tap im fram du wa im se im a-go du. (Taitos 1:2) A im aluon kyan ‘tel wi tingz iivn bifuo dem apm, an fram lang taim im tel wi tingz we a-go apm bifuo it apm. An wi si dis wid aal a di sitn dem we Jeuova se wuda apm iina Baibl taim an ou dem apm fi chuu, an so wi nuo se evriting we im se a-go apm iina di fyuucha a-go apm fi chuu. (Aiz. 46:10) An wi nuo fi shuor se notn at aal kyaahn tap Jeuova fram lov wi. (Ruo. 8:35-39) An Jeuova a-go mek wi waiz, an im a-go elp wi, an im a-go gi wi di chrent we wi niid fi go chuu no mata wa apm tu wi. Ye man! Wi kyan nuo fi shuor se Jeuova a-go elp wi an im a-go bles wi tu.​—Jer. 17:7, 8.

WI KYAAHN ANDASTAN UMOCH JEUOVA NUO WI

16. Bies pan wa Saam 139:1-6 se, wa an wa Jeuova nuo bout wi an ou dat mek yu fiil?

¹⁶ Riid Saam 139:1-6. Kaa Jeuova a di wan we mek wi, im nuo evriting bout wi. Laik im nuo wa mek wi tingk bout tingz di wie ou wi tingk bout tingz an wa mek wi fiil sortn an sortn wie bout tingz. Im nuo di ting dem we wi se an di ting dem we wi did riili waahn fi se. An im nuo evriting we wi du an wa mek wi dwi’it. King Dievid did se Jeuova kyan elp wi, an im eva redi fi dwi’it. So ou it mek yu fiil fi nuo se Jeuova, di Gad we big an powaful we a di Muos Ai an we mek evriting, kier bout yu so moch? Wen Dievid tingk bout ou Jeuova nuo im gud gud, im se it komiin laik sopm we im kyaahn iivn andastan.​—Sa. 139:6, ftn.

17. Wa an wa mait-a mek it aad fi wi biliiv se Jeuova nuo wi gud gud?

¹⁷ It mait-a aad fi wi si Jeuova az wan faada we lov wi an kier bout wi, miebi kaaz a ou wi gruo op ar kaaz a wa wi yuus tu biliiv bifuo wi lorn di chuut. Ar wi mait-a fiil se di bad sitn dem we wi yuus tu du did so bad dat Jeuova wuda neva waahn fi nuo wi an get kluos tu wi. Aal Dievid did fiil so som a di taim tu. (Sa. 38:18, 21) An sumadi we chrai fi chienj op im laif an liv ou Gad waahn im fi liv mait-a a wanda se, ‘Ef Gad riili nuo mi so gud, wa mek im wuda waahn mi fi tap du sitn we aad fi mi fi tap du?’

18. Wa mek it gud fi nuo se Jeuova nuo wi beta dan wi nuo wiself? (Luk pan di picha dem tu.)

¹⁸ Wi kyan lorn fi biliiv se Jeuova nuo wi beta dan wi nuo wiself an se im si di gud iina wi aal ef wi kyaahn si it. Im lov wi iivn duo im si di mistiek dem we wi mek kaa im nuo se a no so wi waahn fi tan. (Ruo. 7:15) Wen wi get fi nuo se Jeuova kyan si di kain-a sumadi we wi riili waahn fi bi, dat wi push wi fi du wi bes fi sorv im an bi api wen wi a dwi’it.

19. Wa an wa wi nuo fi shuor bout Jeuova?

¹⁹ Wi nuo se Jeuova a lov. Dat a sitn we wi no afi ges an spel bout. (1 Jan 4:8) Wi nuo se evriting we Jeuova tel wi fi du ar no fi du a kaa im lov wi an im waahn wi fi av wan gud laif. Wi nuo tu se Jeuova waahn wi fi liv fi eva, an a das wai im mek Jiizas kom ded fi wi. An kaa Jiizas du dat, wi kyan sorv Jeuova an mek Im api wid wi iivn duo wi mek mistiek som a di taim. (Ruo. 7:24, 25) Pan tap a dat, wi nuo se “Gad biga dan wi aat, an im nuo evriting.” (1 Jan 3:19, 20) Jeuova nuo evriting bout wi an im nuo se wi kyan du wa im waahn wi fi du.

20. Wa a-go elp wi fi no wori wori op wiself bout wa wi no nuo?

²⁰ Jeuova no aid notn fram wi, im tel wi evriting we wi niid fi nuo. So wi no afi wori wori op wiself bout wa wi no nuo. Insted-a dat, mek wi kip wi main pan di ting dem we riili impuotant. Wen wi du dat, wi shuo se wi ombl an se wi chos Jeuova wid aal a wi aat, di Wan we nuo evriting. (Juob 36:4) Ye, wi nuo se a no evriting wi a-go andastan ya nou, bot wi nuo se wi a-go aalwiez a lorn nyuu tingz bout Jeuova an dat mek wi fiil gud.​—Iik. 3:11.