Aamagedan A-Go Staat Iina Izrel?—Wa Di Baibl Av Fi Se Bout Dis?

Wen di Baibl taak bout Aamagedan, it naa taak bout wan waar we a-go gwaan iina wan paat a di worl, bot it a taak bout wan waar we a-go gwaan wen aal a di govament dem fram aal uova di worl jain op tugeda fi fait gens Gad.

• “Dem a diiman spirit we . . . go out aal uova di worl go gyada op di king dem fi waar—di waar we a-go apm pan di big die wen Gad, we muo powaful dan evribadi, a-go joj piipl. . . . Dem gyada op di ruula dem an dem aami dem a wan plies we iina di Iibruu langwij dem kaal Aamagedan.”—Revilieshan 16:14, 16.

Iina di Iibruu langwij di wod fi “Aamagedan” a Har Meghid·dohnʹ, an da wod de miin “Mountn we de a Megido.” Megido a did wan siti we did de iina Izrel iina di taim wen di Baibl did a rait. An a kaaz a dat, nof piipl tingk se di Aamagedan waar a iina Izrel dem a-go fait it. Bot wen wi luk pan it, di plies we Megido did de an no ada plies iina dat de paat a di worl de no so big dat it kuda eva wol di ‘king dem fram aal uova di worl’ an dem aami dem tu.

Di wie ou dem rait di buk a Revilieshan, di sitn dem we iina it dem tan fi sitn els. (Revilieshan 1:1) So laik Aamagedan, it no miin wan plies we de pan di ort ya nou, bot it riili a taak bout wa a-go gwaan wen di difrant difrant govament dem aal uova di worl jain op tugeda fi fait gens Gad an fi’im govament.—Revilieshan 19:11-16, 19-21.