Justin Paget/Stone via Getty Images
Muo An Muo Piipl A Get Sad Kaa Dem Fiil Laik Se Dem No Av Nobadi Roun Dem We Bizniz Wid Dem—Wa Kyan Elp Wi Fi Diil Wid Dat?
“Bout 5 outa evri 10 a di man an uman dem iina Merika se dem sad kaa dem fiil laik se dem no av nobadi roun dem we bizniz wid dem. An outa da nomba de, muos a dem de pan di yongga said.”—Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community, 2023.
“[The World Health Organization] se a wan big ting fi piipl kyan miit op an spen taim tugeda. So dem set op wan nyuu ting we a-go elp wid dat an we a-go elp wid di prablem we piipl a get sad kaa dem fiil laik se dem no av nobadi roun dem we bizniz wid dem. An dem a uop se da ting ya we dem set op a-go elp nof muor konchri fi saat out da prablem ya faas, weda di konchri dem rich ar puor.”—World Health Organization, Novemba 15, 2023.
Wen it kom aan tu ou wi fi chriit ada piipl an ou wi kyan liv gud wid wi wan aneda, di Baibl mek wi nuo di bes wie fi du dat.
Wa di Baibl se we kyan elp wi
No bada spen a bag a taim pan tingz we mek it aad fi yu kyan miit op wid piipl an spen taim wid dem. Wan a di ting dem we mek it aad fi yu kyan miit op wid piipl an spen taim wid dem a wen yu a spen uol iip a taim a fala piipl panlain an a chrai kip op wid wa dem du an wa dem a se. So insted-a fi a liv pan di intanet, luk out fi eni chaans we yu kyan get fi miit op wid piipl an fi de roun dem, an chrai fi get som nyuu fren tu.
Sitn we di Baibl se we yu kyan riizn pan: “Wan chuu fren shuo lov aal di taim, an im komiin laik wan breda uu de de fi yu wen yu a go chuu aad taim.”—Pravorbz 17:17.
Luk fi si wa yu kyan du fi elp ada piipl. Wen yu du tingz fi elp ada piipl, it a-go mek yu an dem fiil kluos kluos an it a-go mek yu fiil gud bout yuself.
Sitn we di Baibl se we yu kyan riizn pan: “Ef yu gi sumadi sopm, it mek yu muo api dan ef sumadi gi yu sopm.”—Aks 20:35.
Chek out wi websait ef yu waahn fi fain out som muor bout wa di Baibl av fi se bout ou fi get som gud gud fren.