Yan Zabolotnyi/stock.adobe.com
KIP WACH!
Wikidnis A Pred Laik Wail Faiya—Wa Di Baibl Av Fi Se Bout Dis?
Iina Ieti, di gyang dem a kil piipl an a mash op di plies bad. Iina Sout Afrika, a wol iip a vailens a gwaan, an a di siem ting a gwaan a Meksiko an som a di ada konchri dem we de nier Meksiko an iina Sout Amerika. An iivn iina som plies we dem naa rab op an kil piipl so moch agen, ada tingz a gwaan we a mek piipl kech dem fried, laik wen piipl a brok iina plies an bon dong plies an dem ting de.
Wa di Baibl av fi se bout di wikidnis we a pred aal uova di worl ya nou?
Di Baibl did mek wi nuo se nof wikidnis wudaana gwaan ya nou
Di Baibl mek wi nuo se wikidnis a wan a di sitn dem we a paat a di sain fi shuo se wi iina di taim wen “di worl suun don.” (Matyu 24:3) Wen Jiizas did a tel wi bout di difrant ting dem we mek op da sain de, im se:
“Kaa wikidnis a-go pred laik wail faiya, muos piipl aat a-go ton kuol an dem naa bada lov piipl laik wan taim.”—Matyu 24:12.
Di Baibl did mek wi nuo tu se iina “di laas die dem,” piipl naa go “lov notn we gud,” dem “naa go av no kanchuol uova demself an dem a-go gwaan laik dem a wail daag.” (2 Timoti 3:1-5) So yu si aal a dem doti wiez ya, a dem a kaaz piipl fi wikid so.
Bot wi nuo se tingz naa go gwaan so fi eva. Di Baibl mek wi nuo se wikidnis suun don we wid.
“Likl fram dis, no muo wikid piipl naa go de bout agen; dem naa go de wich paat dem yuus tu de, an yu naa go si no sain a dem agen. Bot di wan dem we ombl demself, yu si di ort, a dem piipl de a-go kom get it. An dem a-go api so til, kaa piis a-go de evriwe.”—Saam 37:10, 11.
Di Baibl tel wi se beta mos kom an it mek wi nuo tu wa mek wi kyan shuor se di ting dem we a apm nou a tingz we di Baibl se wuda apm. Fi fain out wa di Baibl se, riid dem ya:
“A Real Hope for a Better Tomorrow”