4. Wa kyan elp wi fi tap du bad sitn?

Ef yu sumuok ar tek jogz fi enjai yuself, yu mait-a fain out se a no sitn iizi fi tap du. Bot wa kyan elp yu? Tingk bout wa dem sitn ya kyan du tu yu. Riid Matyu 22:37-39, an den wi a-go taak bout ou wen sumadi yuuz tubako ar tek jogz, wa it kyan du tu . . .

• dem an Jeuova.

• dem fambili an ada piipl we de roun dem.

Plan wa yu a-go du fi tap du sitn bad we yu aalwiez a du.a Plie di VIDIYO.

VIDIYO: Nuo Ou Fi Kanchuol Yuself (2:47)

Riid Filipiyan 4:13, an den wi a-go taak bout da kwestiyan ya:

• Ou wen sumadi set wan taim fi prie, fi stodi di Baibl, an ga’a miitn, dat kyan elp im fi tap du di bad sitn dem we im fain it aad fi tap du?

5. Wok aad fi tap tingk bout aal kain-a naasinis an fi tap du di sitn dem we Jeuova no waahn yu du

Riid Koloshan 3:5, an den wi a-go taak bout dem kwestiyan ya:

• Ou wi nuo se Jeuova no waahn wi luk pan notn we av niekid piipl, piipl we a av seks laik iina bluu muuvi an dem sitn de, an im no waahn yu fi a fiil op fiil op yuself fi fiil laik se yu a av seks, an im no waahn yu fi sen niekid picha ar vidiyo, ar teks we a taak bout seks tu nobadi?

• Yu tingk it fier fi Jeuova waahn wi kip we fram aal a dem sitn ya? An wa mek yu tingk so?

Wok aad fi tap tingk bout aal kain-a naasinis. Plie di VIDIYO.

VIDIYO: Du Wa Yu Afi Du Fi Sorv Jeuova Di Rait Wie (1:51)

Jiizas mek wi nuo wa fi du fi mek shuor se notn no tap wi fram du wa Jeuova waahn wi fi du. Riid Matyu 5:29, 30, an den wi a-go taak bout da kwestiyan ya:

• Jiizas neva did a se wi fi chap aaf piis a wi badi, bot im did a se wi fi du sitn bout di prablem. Wa sumadi kyan du fi mek shuor se im naa tingk bout di naasi sitn dem we Jeuova no waahn im fi a tingk bout?b

Ef yu a chrai aad fi tap tingk bout di naasi sitn dem we Jeuova no waahn yu tingk bout, Jeuova lov fi si se yu a chrai. Riid Saam 103:13, 14, an den wi a-go taak bout da kwestiyan ya:

• Ef yu a fain it aad fi tap du sitn bad, ou da skripcha ya kyan elp yu fi no tap chrai?

Ef yu fain se yu a chrai an yu go slip op agen, no gi op!

It mait-a iizi fi tingk se ‘mi go slip op agen; it beta ef mi dis gi op.’ Bot tingk bout dis: No kaaz sumadi we a ron jrap iina di ries, it miin se im afi kom ded laas, ar im afi go staat ron bak di ries fram di staat agen. A siem so ef yu slip op, it no miin se yu kyaahn tap du dem bad sitn ya. An it naa go mek Jeuova figet bout aal a wa yu du aredi. It naamal fi slip op som a di taim. It no miin tu se wi afi gi op. Jeuova a-go elp yu fi tap du di bad sitn dem we im no waahn yu fi du.

6. Wa kyan elp yu fi tap jringk tu moch lika?

VIDIYO: ‘Mi Did Taiyad A Di Wie Ou Mi Did A Liv’ (6:32)

• Iina di vidiyo, wen Dmitry jringk tu moch lika, ou it did mek im gwaan?

• It did iizi fi im tap jringk lika sed taim?

• Wa did elp im fi tap jringk tu moch lika?

Riid 1 Korintiyan 6:10, 11, an den wi a-go taak bout dem kwestiyan ya:

• Wen sumadi jringk til dem jongk, ou siiros it bi?

• Wa mek wi nuo se sumadi we jringk lika til dem jongk kyan tap?

Riid Matyu 5:30, an den wi a-go taak bout da kwestiyan ya:

• Wen di Baibl se wi chap aaf wan a wi an, it a mek wi si umoch wi fi redi fi gi op fi mek Jeuova api. Wa yu kyan du ef yu fain it aad fi tap jringk tu moch lika?a

Riid 1 Korintiyan 15:33, an den wi a-go taak bout da kwestiyan ya:

• Yu tingk di mount a lika we yu jringk av notn fi du wid di fren dem we yu a kip?