Suun suun Jeuova a-go yuuz im Kindom, we a im govament, fi get rid a aal a wi prablem dem. Wi waahn evribadi fi ier bout da gud nyuuz ya, an Jiizas did waahn im falara dem fi tel evribadi bout da gud nyuuz ya tu. (Matyu 28:19, 20) Ou di Jeuova Witnis dem a du wa Jiizas tel im falara dem fi du?

1. Ou wa Matyu 24:14 se a-go apm a apm tide?

Jiizas did se: “Da Gud Nyuuz ya bout Gad Kindom afi go priich aal uova di worl.” (Matyu 24:14) Di Jeuova Witnis dem api fi du da priichin wok ya, an wi a priich iina muor dan 1,000 langwij! A nof wok afi gwaan fi evribadi ier da mesij ya, an evribadi we a dwi’it afi wok tugeda. Dem kudn dwi’it ef Jeuova neehn a elp dem fi dwi’it.

2. Wa a som a di sitn dem we wi du so dat wi kyan priich tu piipl?

Eniwe piipl de, wi go de go priich tu dem jos laik di Kristiyan dem we did de bout wen di Baibl did a rait. Wi go a “piipl ous” go tiich an priich di gud nyuuz tu dem. (Aks 5:42) Wen wi du it da wie ya, wi get fi priich tu uol iip a piipl evri ier. Bot stil, a no evridie piipl de a dem yaad. So somtaim wi afi fain dem pan di ruod an ada plies tu. Wi aalwiez a luk fi di chaans fi tel piipl bout Jeuova an wa im a-go du fi wi.

3. A uu fi riili a priich di gud nyuuz?

Aal a uu a chuu Kristiyan fi a priich di gud nyuuz tu ada piipl. An wi put evriting we wi av iina da wok de kaaz wi nuo se wen wi du it, nof piipl a get siev. (Riid 1 Timoti 4:16.) Nobadi no pie wi fi du da wok ya kaa di Baibl se: “Unu get tingz an unu neehn afi gi notn, nou gi an no luk fi get bak notn.” (Matyu 10:7, 8) A no evribadi lisn tu wi wen wi a priich ino. Bot wi no tap du it kaa wen wi priich, a paat a ou wi worship Gad an wi nuo se Jeuova api wen wi dwi’it.

LORN SOM MUO

4. Wi wok aad so dat wi kyan priich tu evribadi

VIDIYO: Priichin A Gwaan “Aal Uova Di Worl” (7:33)

• Wa yu laik bout wa di Jeuova Witnis dem a du so dat dem kyan priich tu piipl we de aal uova di worl?

Riid Matyu 22:39 an Ruoman 10:13-15, an den wi a-go taak bout dem kwestiyan ya:

• Wen yu si aal a wa wi a du so dat wi kyan priich tu evribadi, ou dat mek yu si se wi lov wi nieba dem?

• Ou Jeuova fiil bout di wan dem we a priich bout di gud nyuuz?​—Luk pan vors 15.

5. Wi a wok fi Gad

Uol iip a tingz apm wen wi a priich we shuo se Gad a mek wi nuo wa fi du. Luk pan wa did apm iina Nyuu Ziilan wen wan breda we niem Paal did a priich. Im go a wan uman yaad fi priich tu ar, onggl fi fain out se da siem maanin de, chrii owa bifuo im riich de, di uman prie tu Gad. Shi aal did a yuuz Gad niem, Jeuova, an shi aks im fi mek sumadi kom a ar yaad kom taak tu ar.

Riid 1 Korintiyan 3:9, an den wi a-go taak bout da kwestiyan ya:

• Ou wa did apm tu da breda ya an da uman ya we did iina Nyuu Ziilan mek wi nuo se wen it kom aan tu wi priichin wok, a Gad a mek wi nuo wa fi du?

Riid Aks 1:8, an den wi a-go taak bout da kwestiyan ya:

• Wa mek ef wi fi du di priichin wok di wie ou Jeuova waahn wi fi dwi’it, a im afi elp wi fi dwi’it?

Yu did nuo se?

Di miitn we wi av iina di wiik, a de-so dem tiich wi ou fi du di priichin wok. Ef yu did eva go a wan a dem miitn de, wa yu tingk bout di tiichin we yu si a gwaan de?

6. Jeuova se wi fi priich an a dat wi a du

Afta Jiizas ded, di piipl dem we neehn laik Jiizas an im falara dem, dem du tingz fi chrai fi tap Jiizas falara dem fram du di priichin wok. Dem Kristiyan de did afi ‘tan op an difen di gud nyuuz.’ Dem aal go a kuot go difen dem rait fi priich di gud nyuuz so dat di laa wich paat dem liv wuda gi dem di rait fi priich. (Filipiyan 1:7) A di siem ting di Jeuova Witnis dem a du tide.a

VIDIYO: Dem Difen Di Gud Nyuuz So Dat Di Laa Wich Paat Dem Liv Wuda Gi Dem Di Rait Fi Priich (2:28)

Riid Aks 5:27-42, an den wi a-go taak bout da kwestiyan ya:

• Wa mek wi naa go tap priich?​—Luk pan vors 29, 38, an 39.

DIS A WA YU FI MEMBA

Jiizas tel im falara dem se dem fi go priich di gud nyuuz tu evribadi we de aal uova di worl. An Jeuova a elp im piipl dem fi du da wok ya.

Wa yu did lorn iina da lesn ya?

• Wa a som a di sitn dem we a apm so dat piipl kyan ier di gud nyuuz no mata wich paat dem de?

• Wen yu si aal a wa wi a du so dat wi kyan priich tu evribadi, ou dat mek yu si se wi lov wi nieba dem?

• Yu tingk se wen yu priich tu sumadi, dat a sitn we kyan mek yu fiil gud? Wa mek yu se so?

CHEK OUT SOM MUO SITN

Luk pan ou di Jeuova Witnis dem a priich tu piipl iina som big siti.

Di Speshal Priichin Wok We Wi Du Iina Di Big Siti Dem​—Dem A Du It Iina Paris (5:11)

Wa a som a di sitn dem we di Jeuova Witnis dem a du so dat dem kyan priich tu piipl we afi muuv fram di konchri wich paat dem kom fram?

Di Jeuova Witnis Dem Priich Tu Di Wan Dem We Did Afi Muuv Fram Dem Konchri We Did Waahn Fi Lorn Bout Gad (5:59)

Luk ou wen sumadi yuuz muos a dem taim iina di priichin wok, it mek dem api.

Mi Glad Se Dis A Di Wok We Mi A Du (6:29)

Fain out bout som a di big kuot kies dem we wi win we elp wi so dat wi kyan gwaan priich bout di gud nyuuz.

“Di Wan Dem We A Priich Bout Gad Kindom Go A Kuot So Dat Dem Kyan Gwaan Priich” (God’s Kingdom Rules!, chapta 13)

Jiizas mek wi nuo se fi bi wan Kristiyan wi afi baptaiz. (Riid Matyu 28:19, 20.) Bot a wa it miin fi baptaiz? An wa yu fi du so yu kyan baptaiz?

1. Wa it miin fi baptaiz?

Di wod we miin “fi baptaiz” kom fram di Griik wod we miin “fi dip” anda waata. A dat mek wen dem did baptaiz Jiizas iina di Jaadn Riva, di Baibl se im “kom op outa di waata.” (Maak 1:9, 10) A siem so, wen wan chuu Kristiyan a baptaiz tide, di wol a im afi go anda di waata.

2. Wen sumadi baptaiz, wa it mek wi si se?

Wen sumadi baptaiz, it mek wi si se dem gi uova dem laif tu Jeuova. Ou dem du dat? Bifuo di sumadi baptaiz, dem wan prie tu Jeuova an pramis im se dem a-go gi dem laif tu im an sorv im fi eva. An fi du wa Gad waahn dem fi du a-go bi di bigis ting iina dem laif. Dem afi “figet bout wa dem waahn, . . . an fala” wa Jiizas du an wa im se wi fi du. (Matyu 16:24) Kaa di sumadi gi op im laif tu Gad an baptaiz, a so kom im ton kluos kluos fren wid Jeuova an im piipl dem.

3. Wa a som a di sitn dem we yu fi du bifuo yu baptaiz?

Bifuo yu baptaiz, yu fi lorn bout Jeuova an chos iina im. (Riid Iibruu 11:6.) Di muor yu gwaan lorn bout Jeuova an chos iina im a di muor yu a-go lov im. Yu a-go du di sitn dem we Jeuova waahn yu fi du, an yu a-go waahn fi tel ada piipl bout di sitn dem we yu a lorn bout im tu. (2 Timoti 4:2; 1 Jan 5:3) So langks di sumadi a liv laik ou ‘Gad piipl fi liv an eva du di sitn dem we mek im api,’ den im kyan gi uova im laif tu Gad an get baptaiz.​—Koloshan 1:9, 10.a

LORN SOM MUO

4. Wa wi kyan lorn fram wa did apm wen Jiizas did baptaiz an ou dem did dwi’it?

Riid Matyu 3:13-17 fi lorn muor bout wa did apm wen Jiizas a baptaiz. Den wi a-go taak bout dem kwestiyan ya:

• Yu tingk Jiizas did a wan biebi wen dem baptaiz im?

• Ou dem did baptaiz im? Yu tingk dem did jos springkl likl waata pan im?

Afta Jiizas baptaiz, im staat fi du di speshal wok we Gad sen im pan ort fi du. Riid Luuk 3:21-23 an Jan 6:38, an den wi a-go taak bout da kwestiyan ya:

• Afta Jiizas did baptaiz, a wich wok did a di bigis ting iina im laif?

5. It no aad fi du wa yu fi du fi baptaiz

Yu no afi fiil se it tuu aad fi du di sitn dem we yu fi du fi gi uova yu laif tu Gad an baptaiz kaa, likl bai likl, yu a-go si se a sitn we yu kyan du. Fi si som piipl we did go chuu dat aredi, plie di VIDIYO.

VIDIYO: Du Wa Yu Fi Du Fi Ton Jeuova Fren (1:11)

Riid Jan 17:3 an Jiemz 1:5, an den wi a-go taak bout da kwestiyan ya:

• Wa a som a di sitn dem we yu fi du so yu kyan baptaiz?

1. Yu gi yu laif tu Jeuova wen yu wan prie tu im an mek im nuo se yu a-go gi yu laif tu im an sorv im fi eva

2. Wen wi baptaiz wi mek di piipl dem we de de si se wi gi wi laif tu Gad

6. Wen yu baptaiz yu ton paat a Jeuova fambili

Wen yu baptaiz, yu ton paat a Jeuova fambili, we de aal uova di worl, we lov dem wan aneda. Iivn duo aal a wi gruo op difrant an wi kom fram difrant difrant plies, aal a wi biliiv iina di siem ting an a liv ou Jeuova waahn wi fi liv. Riid Saam 25:14 an 1 Piita 2:17, an den wi a-go taak bout da kwestiyan ya:

• Wen yu baptaiz, wa dat av fi du wid yu an Jeuova? An wa it av fi du wid yu an im piipl dem?

DIS A WA YU FI MEMBA

Jiizas mek wi nuo se fi bi wan Kristiyan wi afi baptaiz. Bot bifuo sumadi kyan baptaiz, dem fi a chos iina Jeuova an dem fi a liv di wie ou Jeuova waahn dem fi liv, an dem afi gi uova dem laif tu im.

Wa yu did lorn iina da lesn ya?

• Wa it miin fi baptaiz, an wa mek wi afi dwi’it?

• Wen sumadi prie an gi dem laif tu Gad, wa mek dem stil afi baptaiz?

• Wa a som a di sitn dem we yu afi du bifuo yu gi yu laif tu Gad an baptaiz?

CHEK OUT SOM MUO SITN

Fain out wa it miin fi baptaiz an wa it no miin.

“Wa It Miin Fi Baptaiz?” (Sitn we yu kyan get pan di websait)

Luk pan di difrant sitn dem we sumadi fi du bifuo dem kyan baptaiz.

“Wen Yu Lov Jeuova An Yu Tangk Im Fi Aal A Wa Im A Du, Dat A-Go Mek Yu Waahn Fi Baptaiz” (Di Wachtowa, Maach 2020)

Fain out bout wan man we neehn jos jomp go baptaiz so kaaz a ou im fiil.

“Dem Did Waahn Mi Si Se Dis A Di Chuut Fi Miself” (Di Wachtowa, Febiweri 1, 2013)

Wa mek fi baptaiz a wan a di bes ting yu kyan plan fi du, an ou yu kyan lain op yuself fi dwi’it?

“Mi Redi Fi Baptaiz Yet?” (Som Kwestiyan We Yong Piipl Aalwiez A Aks Bout Laif An Som Ansa We Kyan Elp Dem, Di Sekan Wan, chapta 37)