1. Jiizas​—A uu im bi?

Jiizas a wan powaful spirit we liv iina evn. Jeuova Gad did mek Jiizas bifuo Im mek notn els. An dat a wa mek di Baibl se “im a fos iina evriting.” (Koloshan 1:18) An it se Jiizas a Gad “wan dege-dege Bwai Pikni” kaa a Jeuova wan did mek im. (Jan 3:16) Jiizas did elp im Faada, Jeuova, fi mek evriting els. (Riid Pravorbz 8:30.) Jiizas an Jeuova stil kluos. A im Jeuova yuuz fi mek wi nuo wa Im waahn wi fi nuo, an Jiizas api fi dwi’it. An a dat mek di Baibl tel wi se im a “di Wod.”​—Jan 1:14.

Kaa di fos man an uman we Gad did mek neehn du wa im se, a dat mek sin kom bout an wi en op a sofa an ded.a Bot a no it dat fi wi. Jeuova mek wan wie fi elp wi so wi no afi sin an ded agen. Im du dat wen im sen im Son, Jiizas Krais, fi kom ded fi wi. Di Baibl mek wi nuo se Jiizas kom ded fi wi so dat wi kyan get frii fram wi sin. So im yuuz fi im porfek laif fi kom pie fi wi sin dem. (Riid Matyu 20:28.) Yu si kaa Jiizas did porfek, im did av di rait fi liv fi eva pan di ort. Bot im gi op aal a dat so dat wi kyan av di chaans fi liv fi eva. An Jiizas mek wi nuo se im an Jeuova lov wi bad bad. Wen wi don da lesn ya, it a-go mek wi tangk Jeuova an Jiizas iivn muor fi wa dem du fi wi.

1. Laik ou Jiizas did kom ded fi wi, wa dat kyan du fi wi ya nou?

Kaa wi no porfek, wi du nof tingz we Jeuova no laik. Bot yu si chuu Jiizas did kom ded fi wi, ef wi riili sari fi di rang sitn dem we wi du an wi chrai wi bes no fi du dem agen, a so kom Jeuova a-go figiv wi an wi an im kyan ton fren. (1 Jan 2:1) Di Baibl tel wi se: “Krais Jiizas sofa an ded fi di uol a wi sin wans an faraal. Wan man we du onggl wa rait, ded fi aal a uu a sina, fi bring wi tu Gad.”​—1 Piita 3:18.

2. Kaa Jiizas did kom ded fi wi, wa dat kyan go du fi wi iina di fyuucha?

Jeuova sen Jiizas fi gi op im porfek laif “so enibadi we chos iina [Jiizas] naa go ded bot a-go liv fi eva.” (Jan 3:16) Kaaz a wa Jiizas did du fi wi, Jeuova suun gi wi bak aal a di gud sitn dem we Adam did dash we wen im sin. Dis miin tu se ef wi du tingz fi shuo se wi biliiv se Jiizas did kom ded fi wi, wi a-go kyan liv fi eva pan di ort wen it ton iina wan paradais!​—Aizaiya 65:21-23.

LORN SOM MUO

3. Kaa Jiizas ded fi wi, di taim a-go kom wen wi naa go sin an wi naa go ded

VIDIYO: Wa Mek Jiizas Kom Ded Fi Wi?​—Paat 1 (2:01)

• Kaa Adam neehn du wa Gad tel im fi du, wa dat mek im luuz out pan di chaans fi get?

Riid Ruoman 5:12, an den wi a-go taak bout da kwestiyan ya:

• Kaa Adam sin, wa dat av fi du wid yu nou?

Riid Jan 3:16, an den wi a-go taak bout da kwestiyan ya:

• Wa mek Jeuova did sen im Bwai Pikni kom dong ya pan di ort?

1. Adam did a wan porfek man bot im neehn du wa Gad tel im fi du, an a dat mek wi en op a sin an a ded

2. Jiizas did a wan porfek man an im did du wa Gad tel im fi du. An kaaz a dat, im mek wi kyan go get porfek an liv fi eva

4. Kaa Jiizas kom ded fi wi, it kyan elp evribadi fi get nof gud sitn

VIDIYO: Wa Mek Jiizas Kom Ded Fi Wi?​—Paat 2 (2:00)

• Kaa wan man ded, ou kom dat kyan mek evribadi get nof gud sitn?

Riid 1 Timoti 2:5, 6, an den wi a-go taak bout da kwestiyan ya:

• Adam did a wan porfek man we mek wi en op a sin an ded. An Jiizas did a wan porfek man tu. Bot wa Jiizas did du so dat im kuda “bai bak evribadi an frii dem fram sin”?

5. Jeuova sen im Son fi kom ded fi yu

Jeuova sen Jiizas fi kom ded fi yu. So enibadi we dem an Gad a fren, dis a wan prezent fram Gad tu dem. Fi si dis, riid Gyalieshan 2:20, an den wi a-go taak bout da kwestiyan ya:

• Wa di apasl Paal did se we shuo se im nuo se wen Jiizas did gi op im laif, dat a did wan prezent fi im fram Gad?

Wen Adam did sin, dis did miin se im an aal a im pikni dem wuda en op ded. Bot kaa Jeuova waahn yu fi api an im waahn yu fi liv fi eva tu, im sen im Son fi kom ded fi yu.

Wen yu riid dem vors ya, jos tingk bout ou Jeuova did fiil wen im si im Son a sofa an a go chuu aal a dem sitn ya. Riid Jan 19:1-7, 16-18, an den wi a-go taak bout da kwestiyan ya:

• Wen yu tingk bout wa Jeuova an Jiizas du fi yu, ou it mek yu fiil?

DIS A WA YU FI MEMBA

Kaa Jiizas did ded fi wi, it mek Jeuova kyan paadn wi a wi sin dem, an a it a-go mek wi api fi eva tu.

Wa yu did lorn iina da lesn ya?

• Wa mek Jiizas did afi ded?

• Wa mek a onggl Jiizas porfek laif kuda mek evribadi kyan liv agen an frii dem fram sin?

• Kaa Jiizas did kom ded fi yu, ou dat kyan du uol iip a gud fi yu?

CHEK OUT SOM MUO SITN

Wa mek Jiizas did afi kom ded an gi op im porfek laif fi wi?

“Wa Mek Wen Jiizas Ded An Gi Op Im Laif Piipl Kyan Get Frii Fram Dem Sin?” (Sitn we yu kyan get pan di websait)

Luk pan wa yu fi du fi get siev.

“Wa Jiizas Du Fi Siev Wi?” (Sitn we yu kyan get pan di websait)

Wen wi sin bad, Jeuova wi figiv wi?

“Di Ansa Dem Fi Som Kwestiyan We Piipl Aks Bout Di Baibl” (Di Wachtowa, Mie 1, 2013)

Luk pan ou wan man did get fi chienj op im laif fi di beta afta im lorn se Jiizas did kom ded fi im.

“Mi Get Fi Si Se Mi No Afi A Waar Wid Piipl No Muor” (Sitn we yu kyan get pan di websait)

1. Wa a wan sitn we wi kyan du fi mek Jeuova an Jiizas Krais si se wi tangk dem fi wa dem du fi wi?

Di Baibl mek wi nuo se “enibadi we chos iina [Jiizas]” a-go get fi liv fi eva. (Jan 3:16) Fi chos iina Jiizas a no jos biliiv wi fi biliiv iina im. Wi afi av akshan fi bak it op. So wi afi du wa rait. (Jiemz 2:17) Ef wi du an se di sitn dem we mek Jeuova an Jiizas si se wi chos iina dem, wi an dem wudaana ton big fren.​—Riid Jan 14:21.