LESN 13
A Ou Di Rilijan Dem We Naa Worship Gad Di Rait Wie A Tel Lai Pan Gad?
Ef wa di Baibl se a chuu, se Gad a lov, wa mek di rilijan dem we se dem a worship Gad a du so moch wikid sitn? Dem a du so moch wikid sitn kaa wa dem a tiich a no wa Gad waahn dem fi tiich. A bier lai dem a tel pan Gad. A ou dem a tel lai pan Gad? Ou im fiil bout it? A wa im a-go du bout it?
1. Di rilijan dem we naa worship Gad di rait wie, a ou di sitn dem we dem a tiich shuo se dem a tel lai pan Gad?
Yu si dem rilijan de “dem ton dem bak pan di chuut bout Gad an go biliiv wan lai.” (Ruoman 1:25) Di Baibl tel wi se wi fi yuuz Gad niem bot wi fain se nof rilijan no tel dem piipl bout it. (Ruoman 10:13, 14) An wan neda ting a dat, wen sitn bad apm, di liida fi dem choch de se a Gad waahn it fi apm. Bot dat a lai; nat a ting no go so. So wen notn bad apm, a no Gad kaaz it fi apm. (Riid Juob 34:12.) Kaaz dem rilijan ya tiich so moch lai bout Gad, it mek piipl nat iivn waahn fi nuo Gad so dat dem kyan lov im.
2. Di rilijan dem we naa worship Gad di rait wie, wa a som a di sitn dem we dem a du we Gad no waahn dem fi du?
Yu si dem rilijan ya, dem naa chriit piipl di wie ou Jeuova wuda chriit piipl. Di Baibl tel wi se di rilijan dem we naa worship Gad di rait wie, dem sin dem “pail op til dem kech a evn.” (Revilieshan 18:5) Fi onjredz a ier nou, di rilijan dem a miks op iina palitiks, a bak waar, an dem kaaz wol iip a piipl fi ded, ar dem did aarait wid ada piipl a kil aaf piipl. Som a dem liida dem a liv big laif, an som a dem a fuos dem memba dem fi pie fi da big laif de. Dem sitn ya we dem a du mek wi si se dem nat iivn nuo Gad. So dem kyaahn tel wi wa Gad waahn wi fi nuo.—Riid 1 Jan 4:8.
3. Ou Gad fiil bout dem rilijan de we a tel bier lai bout im?
Ef di sitn dem we dem rilijan ya a du mek yu fiil beks, ou yu tingk Jeuova fiil bout wa dem a du? Alduo Jeuova lov piipl, im beks bad wid di choch liida dem we a tel lai pan im an a chriit dem choch memba dem bad. Im mek wi nuo se im a-go get rid a aal a di rilijan dem we naa tiich wa im waahn dem fi tiich an ‘nobadi naa go fain dem agen.’ (Revilieshan 18:21) Suun suun Gad a-go get rid a aal a di rilijan dem we naa du wa im waahn dem fi du.—Revilieshan 18:8.
LORN SOM MUO
Luk som muor pan ou Gad fiil bout di rilijan dem we naa tiich wa im waahn dem fi tiich. An luk pan som muor sitn we dem a du, an wa mek wi no fi mek wa dem a du tap wi fram lorn bout Jeuova.
4. A no evri rilijan a du wa Gad waahn dem fi du
Wol iip a piipl biliiv se di choch dem komiin laik difrant difrant saiz giet we a liid yu tu Gad. Bot notn go so? Riid Matyu 7:13, 14, an den wi a-go taak bout da kwestiyan ya:
Wa di Baibl tel wi se bout di giet we wi afi go chuu fi get laif?
Plie di VIDIYO, an den wi a-go taak bout di neks kwestiyan.
Yu tingk di Baibl a tel wi se a wol iip a rilijan a du wa Gad waahn dem fi du?
5. Dem rilijan de we naa worship Gad di rait wie naa shuo lov di wie ou Gad waahn dem fi shuo lov
A wol iip a ier nou dem rilijan de naa du wa Gad waahn dem fi du. Wan a di wikidis ting dem eva du a fi miks op iina waar. Fi si wan a di taim wen dem did du dat, plie di VIDIYO. An den wi a-go taak bout di neks kwestiyan dem.
Wen Worl Waar 2 did a gwaan, wa a som a di sitn dem we wol iip a di choch dem did a du?
Ou yu fiil bout di sitn dem we dem did a du?
Riid Jan 13:34, 35 an 17:16. An den wi a-go taak bout dem kwestiyan ya:
Ou yu tingk Jeuova fiil wen di rilijan dem get miks op iina waar?
Wa a som a di sitn dem we yu si di choch dem a du we mek it luk laik se Gad no lov wi?
Dem rilijan de we naa tiich wa Gad waahn dem fi tiich naa shuo lov di wie ou Gad waahn dem fi shuo lov
6. Gad waahn elp piipl fi kom outa di choch dem we naa tiich di ting dem we im waahn dem fi tiich
Riid Revilieshan 18:4,a an den wi a-go taak bout da kwestiyan ya:
Nou dat yu nuo se Gad waahn fi elp di piipl dem fi kom outa di choch dem we naa tiich di ting dem we im waahn dem fi tiich, ou dat mek yu fiil?
7. Gwaan lorn bout di chuu Gad an no mek notn tap yu
Yu tingk yu shuda bliem Gad fi aal a di bad sitn dem we dem choch de a du? Tingk bout wan bwai we naa lisn tu wa im faada a tel im se. Im lef im yaad an staat du aal saat a bad sitn. Wa mek it wudn fier fi bliem di faada fi aal a di bad sitn dem we di bwai a du?
A siem so, yu tingk it wuda fier fi bliem Jeuova fi aal a di wikid sitn dem we dem choch de a du an tap lorn bout im?
SUMADI MAIT-A SE: “Mi no waahn ier notn bout Gad kaaz nof a di wikidnis we a gwaan iina di worl a rilijan kaaz it.”
Yu fiil so tu?
Wa mek di sitn dem we dem choch de a du no fi mek yu tingk se Jeuova wikid?
DIS A WA YU FI MEMBA
Di rilijan dem we naa du wa Gad waahn dem fi du, a bier lai dem a tel pan Gad. So Gad a-go get rid a aal a dem.
Wa yu did lorn iina da lesn ya?
Ou yu fiil bout aal a di sitn dem we dem choch ya a du?
Ou yu tingk Jeuova fiil bout dem?
Wa Gad suun du tu aal a dem rilijan de we naa du wa im waahn dem fi du?
CHEK OUT SOM MUO SITN
Si tuu sitn ya we muos rilijan a du we mek Gad beks.
Wa mek Jeuova waahn di piipl dem we a worship im di rait wie fi worship im tugeda?
“Fi Worship Gad, Yu Tingk Yu Afi Bi Paat A Wan Rilijan?” (Sitn we yu kyan get pan di websait)
Wan priis did si se im choch neehn a tiich di rait ting. Bot dat neehn tap im fram lorn di chuut bout Gad.
Fi dangki ierz nou di rilijan dem a tel bier lai pan Gad we mek im luk laik im wikid an no kier bout wi. Fi chrii a dem lai de, si di chuut ya.
“Som Lai We Wuda Mek Nobadi No Waahn Fi Lov Gad” (Di Wachtowa, Novemba 1, 2013)
a Fi fain out wa mek iina Revilieshan it kaal aal a di rilijan dem we naa worship Gad di rait wie wan uman we niem Powaful Babilan, luk pan di paat we niem Riid Som Muor 1.