Shuo Se Yu Nuo Wa Yu A Du Wen Yu A Pik Yu Fren Dem

Wi fren dem kyan riili mek wi api wen tingz a go gud iina wi laif, an dem wi di de fi wi wen tingz get rof. Bot di Baibl shuo wi se wi kyaahn dis tek op eni an enibadi an se dem a wi gud fren. So ou yu kyan nuo wa yu a du wen yu a pik yu fren dem? Mek wi luk pan dem kwestiyan ya.

1. Di fren dem we yu pik, ou dem kyan mek yu laif beta ar mek it wos?

Di piipl dem we wi spen wol iip a taim wid, nof a di taim wi staat fi tingk laik dem an du di sitn dem we dem du tu. An it no mata ef di sumadi de roun wi ar wi a spen taim wid dem pan di intanet​—ou dem gwaan kyan mek wi du gud tingz ar bad tingz. Di Baibl se, “wen yu kip kompni wid piipl we waiz an av sens, yu wi av sens tu; bot ef yu kip kompni wid piipl we fu-fuul [dat a di wan dem we no lov Jeuova], den tingz naa go wok out gud fi yu.” (Pravorbz 13:20) Wen yu kip fren wid piipl we lov Jeuova an a sorv im, dat wi elp yu fi du di gud sitn dem we im waahn yu fi du an fi stik tu im. Bot ef yu kip fren wid piipl we no lov Jeuova, dat naa go elp yu fi stik tu im. A dat mek di Baibl tel wi se wi fi kierful wen wi a pik wi fren dem. So wen wi kip fren wid piipl we lov Gad, dat a-go elp wi an dem fi gwaan du di gud sitn dem we Gad waahn wi fi du. So yu an yu fren dem a-go “elp unu wan aneda get chrang.”​—1 Tesaluoniyan 5:11.

2. Ou Jeuova fiil bout di fren dem we yu pik?

A no eni an enibadi Jeuova pik fi bi im fren ino. “Im a gud gud fren wid di sumadi we a du wa rait.” (Pravorbz 3:32) Ou Jeuova wuda fiil ef wi kip fren wid piipl we no lov im? Im wudn fiil gud at aal. (Riid Jiemz 4:4.) Bot ef wi no kip bad kompni, an wi jraa nier tu Jeuova an stik tu di wan dem we lov im, den dat wi mek Jeuova api an im wi waahn ton fi wi fren.​—Saam 15:1-4.

LORN SOM MUO

3. Wach out fi bad kompni

Wen wi taak bout bad kompni, wi a taak bout di piipl dem we no lov Gad an no waahn fi du di sitn dem we im se dem fi du. Plie di VIDIYO, an den wi a-go taak bout di neks kwestiyan.

VIDIYO: Kip Faar Fram Bad Kompni (6:17)

• Ou wi kyan get miks op iina bad kompni an no iivn si se a dat a gwaan?

Riid 1 Korintiyan 15:33, an den wi a-go taak bout dem kwestiyan ya:

• Wa kain-a piipl yu no fi kip fren wid? Wa mek yu se so?

Riid Saam 119:63, an den wi a-go taak bout da kwestiyan ya:

• Wa a-go mek yu nuo se, ye, da sumadi de a wan gud fren dat?

4. Di piipl we wi an dem a gud fren, dem no afi tan jos laka wi

Di Baibl tel wi bout tuu man we niem Dievid an Janatan we did de iina Izrel bak iina di diez. Janatan did a big man fi Dievid an im faada a did di king. Bot di tuu a dem a did gud gud fren. Riid 1 Samwel 18:1, an den wi a-go taak bout da kwestiyan ya:

• Wa mek wi an wi fren dem no afi bi di siem iej an it no fi mata ef dem rich ar dem puor?

Riid Ruoman 1:11, 12, an den wi a-go taak bout da kwestiyan ya:

• Wen wi a fren wid piipl we lov Jeuova, ou dat kyan elp wi fi bil op wi wan aneda?

Wach da vidiyo ya an si ou wan yong breda get fi ton fren wid sumadi we im neehn tingk im kuda ton fren wid. Plie di VIDIYO, an den wi a-go taak bout di neks kwestiyan.

VIDIYO: Yu Kyan Ton Fren Wid Piipl We Yu Neehn Tingk Yu Wuda Ton Fren Wid (5:06)

• Wa mek Akil mada an faada neehn laik di kain-a fren dem we im did a kip a skuul?

• Wa mek im did waahn ton fren wid dem piipl de iina di fos plies?

• Wa did elp im fi get wan fren?

5. Ef sumadi waahn som gud fren, wa an wa dem fi du?

VIDIYO: Ou Yu Kyan Nuo Ef Sumadi A Wan Chuu Fren? (4:14)

Riid Pravorbz 18:24 an 27:17, an den wi a-go taak bout dem kwestiyan ya:

• Ou piipl we a gud fren elp dem wan aneda?

• Yu av no buonifai fren laik dat? Ef yu na’av non, wa yu kyan du fi get som?

Riid Filipiyan 2:4, an den wi a-go taak bout da kwestiyan ya:

• Ef yu waahn wan gud fren, yu afi bi wan gud fren tu. Ou yu kyan du dat?

DIS A WA YU FI MEMBA

Wen wi pik som gud fren, wi kyan mek Jeuova api an it elp wi fi liv wi laif iina di rait wie.

Wa yu did lorn iina da lesn ya?

• Wa mek di kain-a fren dem we wi kip mata tu Jeuova?

• Wa kain-a piipl wi no fi ton fren wid?

• Wa yu fi du so yu kyan ton gud fren wid di rait kain-a piipl dem?

CHEK OUT SOM MUO SITN

Lorn ou ef wi av di rait kain-a fren dem, wen tingz get aad, dem kyan elp wi.

“Jraa Kluosa Tu Wi Fren Dem Bifuo Di En Kom” (Di Wachtowa, Novemba 2019)

Luk pan som tingz we yu kyan du fi get som gud fren.

“Wa An Wa Mi Fi Du Ef Mi Waahn Fi Av Som Gud Fren?” (Som Kwestiyan We Yong Piipl Aalwiez A Aks Bout Laif An Som Ansa We Kyan Elp Dem, Di Fos Wan, chapta 8)

Wa an wa yu fi tingk bout wen yu a ton fren wid piipl panlain?

Yu Fi Nuo Wa Yu A Du Wen Yu A Diil Wid Piipl Panlain (4:12)

Iina di tuori we niem “Mi Did Wel Waahn Fi Av Wan Faada,” fain out wa mek wan man did staat tingk difrant bout di kain-a fren dem we im did a kip.

“Di Baibl Chienj Piipl Laif Fi Di Beta” (Di Wachtowa, Iepril 1, 2012)