LESN 51
Ou Yu Kyan Mek Shuor Se Di Ting Dem We Yu Se Mek Jeuova Api?
Wen Jeuova mek wi, im mek wi so dat wi kyan taak an dat a wan nais ting we im gi wi. Yu tingk di ting dem we wi se an di wie ou wi se it a sitn we Jeuova bizniz bout? Bot mos! (Riid Jiemz 1:26.) So wa wi fi du fi mek shuor se di ting dem we wi se an ou wi se dem mek Jeuova api?
1. Ou wi kyan taak tu piipl iina wan gud wie?
Di Baibl tel wi se wi fi ‘elp wi wan aneda get chrang an gwaan bil op wi wan aneda.’ (1 Tesaluoniyan 5:11) Yu nuo nobadi we niid sumadi fi taak tu so dat dem kyan fiil beta? Wa yu tingk yu kyan du fi elp dem? Mek dem nuo se yu riili kier bout dem. Yu mait-a kyan tel dem som a di tingz we yu riili laik bout dem. Yu nuo no Baibl vors we yu tingk yu kuda yuuz fi mek sumadi fiil beta? Yu av wol iip a skripcha iina di Baibl an yu kyan pik wan we a-go elp dem. Bot memba se a no jos wa yu se, bot di wie ou yu se it kyan elp di sumadi tu. So wi waahn mek shuor se enitaim wi a taak tu piipl, wi dwi’it iina wan nais wie.—Pravorbz 15:1.
2. Wa a som a di sitn dem we wi no fi se at aal?
Di Baibl se: “Unu fi tap chat doti chat.” (Riid Ifiijan 4:29.) Dat miin se wi naa go kos bad wod ar se tingz we a-go ort piipl ar mek dem fiil a wie. An wi no fi chat piipl ar susu-susu, ar se tingz fi tier dem dong.—Riid Pravorbz 16:28.
3. Wa kyan elp wi fi se tingz we a-go bil op piipl?
Nof a di taim di sitn dem we wi se shuo piipl ou wi riili fiil an mek dem nuo wa de iina wi aat. (Luuk 6:45) So wi waahn fi chrai wi bes fi tingk bout gud tingz. Wi fi tingk bout tingz we rait, tingz we gud an kliin, tingz we chuu, an eniting we fi get big op. (Filipiyan 4:8) Bot ef wi a-go kyan tingk bout dem sitn ya, wi afi mek shuor se di ting dem we wi du fi enjai wiself an di kompni we wi kip elp wi fi tingk bout gud tingz. (Pravorbz 13:20) Wan neda ting we wi elp wi a wen wi tek taim fi tingk bout wa wi a-go se bifuo wi se it. So tingk bout ou piipl a-go fiil bout di sitn dem we yu se. Di Baibl tel wi se: “Wen piipl se tingz we ort yu, it komiin laik wen sumadi a stab yu op wid wan suod; bot yu si wen sumadi we av sens taak, it mek yu fiil beta.”—Pravorbz 12:18.
LORN SOM MUO
Yu a-go lorn ou yu kyan taak iina wan wie we a-go mek Jeuova api an ou fi se tingz we a-go bil op ada piipl.
4. Wach wa yu se, wen yu se it, an ou yu se it
Som a di taim aal a wi se tingz we wi sari se wi did se. (Jiemz 3:2) Riid Gyalieshan 5:22, 23, an den wi a-go taak bout dem kwestiyan ya:
Wich wan a dem wiez ya yu tingk yu kyan prie fa so yu kyan nuo wa fi se an ou fi se it? Wen yu av dem gud wiez ya, ou dat kyan elp yu?
Riid 1 Korintiyan 15:33, an den wi a-go taak bout da kwestiyan ya:
Di ting dem we yu du fi enjai yuself, an di kompni we yu kip, yu tingk dat av notn fi du wid di wie ou yu taak tu ada piipl an di wod dem we yu yuuz?
Wa a som tingz we mait-a mek yu taak tu piipl iina wan gud wie ar wan bad wie?
Riid Iikliiziyastiiz 3:1, 7, an den wi a-go taak bout da kwestiyan ya:
Wen it mait-a gud fi wi no se notn at aal ar wiet fi wan neda taim fi se sitn?
5. Taak gud tingz bout ada piipl
Wa wi kyan du fi mek shuor se di sitn dem we wi se no ort ada piipl ar mek dem fiil a wie? Plie di VIDIYO, an den wi a-go taak bout di neks kwestiyan dem.
Wa mek di breda did waahn fi chienj di wie ou im did a taak bout ada piipl?
Wa im did du fi chienj im wiez?
Riid Iikliiziyastiiz 7:16, an den wi a-go taak bout da kwestiyan ya:
Ef wi fiil laik se wi a-go se bad tingz bout sumadi, wa wi fi memba?
Riid Iikliiziyastiiz 7:21, 22, an den wi a-go taak bout da kwestiyan ya:
Ou dem vors ya kyan elp yu fi no get beks wen sumadi chat sitn bad bout yu?
6. Yu fi taak tu yu fambili iina wan nais wie
Wen wi a taak tu wi fambili, Jeuova waahn wi fi dwi’it iina wan nais wie we shuo se wi lov dem. Plie di VIDIYO, an den wi a-go taak bout di neks kwestiyan.
Wa kyan elp yu fi taak tu yu fambili iina wan nais wie?
Riid Ifiijan 4:31, 32, an den wi a-go taak bout da kwestiyan ya:
Ou wi kyan taak tu wi fambili dem iina wan wie we mek dem fiil gud bout demself?
Jeuova did mek piipl nuo ou im fiil bout im Bwai Pikni, Jiizas. Riid Matyu 17:5, an den wi a-go taak bout da kwestiyan ya:
Ou yu kyan du laik wa Jeuova did du wen yu a taak tu yu fambili?
Luk fi tingz we yu kyan tel piipl fi mek dem fiil gud bout demself
SUMADI MAIT-A SE: “Mi se wa mi waahn fi se. Ef sumadi av wan prablem wid it, a fi dem bizniz dat.”
Yu tingk wa dem se mek sens? Wa mek yu se so?
DIS A WA YU FI MEMBA
Di sitn dem we wi se kyan elp ada piipl, ar it kyan ort dem. So wi afi mek shuor se wi tingk bout wa wi a-go se bifuo wi se it, wen a di bes taim fi se it, an ou wi fi se it.
Wa yu did lorn iina da lesn ya?
Ou di ting dem we yu se kyan elp ada piipl?
Wa a som tingz we wi fi mek shuor se wi no se?
Wa a-go elp wi fi mek shuor se wi aalwiez taak nais tu piipl an se tingz we a-go bil dem op?
CHEK OUT SOM MUO SITN
Ou wi kyan mek shuor se wi se tingz we bil op ada piipl?
Lorn som tingz we kyan elp yu fi no kos bad wod.
“Notn Rang Ef Yu Kos Wan An Tuu Bad Wod?” (Sitn we yu kyan get pan di websait)
Luk pan som tingz we kyan elp yu fi no chat ada piipl.
Si ou Jeuova did elp wan man uu did a wok aad fi tap kos bad wod.
“Mi Did Riili Staat Fi Tingk Bout Wa Mi Did A Du Wid Mi Laif” (Di Wachtowa, Aagos 1, 2013)