LESN 05
Di Ting Dem Iina Di Baibl A Wa Gad Waahn Wi Fi Nuo
Di Baibl a wan nais prezent fram Jeuova. Iivn duo it luk laik wan big buk, a 66 likl buk mek it op. Bot yu mait-a a wanda: ‘A ou di Baibl kom bout? An a uu di sitn dem we de iin de kom fram?’ Fi get di ansa fi dem kwestiyan ya, wi a-go luk pan ou Gad did mek wi get di Baibl.
1. Ef a man rait di Baibl, ou kom wi se a Gad it kom fram?
A bout 40 difrant man rait di Baibl, an it tek bout 1,600 ier fi dem difrant difrant man de don rait it. Di fos sumadi did staat rait it iina di ier 1513 B.C.E. (dat a di taim bifuo Jiizas did baan), an di laas sumadi don rait it iina 98 C.E. (dat a di taim afta Jiizas ded). Di man dem we rait di Baibl, aal a dem neehn kom fram di siem plies ar av di siem kain-a wok, bot di ting dem we dem rait mek sens wen aal a it go tugeda. Dis a kaa di sitn dem we dem rait dong kom fram Gad. (Riid 1 Tesaluoniyan 2:13.) Iina 2 Piita 1:21 it se ‘di uoli spirit did tek kanchuol a piipl an mek dem gi mesij we kom fram Gad.’a (2 Piita 1:21) So yu si di sitn dem we dem did rait dong, a no jos wa dem did waahn fi rait dong. Dem rait dong wa Gad did yuuz im spirit fi mek dem rait dong.—2 Timoti 3:16.
2. Yu tingk evribadi kyan get di Baibl?
‘Piipl fram evri konchri, chraib, an evri langwij’ kyan get fi nuo di gud sitn dem we de iina di Baibl. (Riid Revilieshan 14:6.) Gad waahn aal a wi fi lorn fram di gud sitn dem we de iina di Baibl, so im mek shuor se di Baibl de iina muor langwij dan eni ada buk we man eva rait. So, piipl kyan get di Baibl no mata wich paat dem liv ar wich langwij dem taak.
3. Wa Jeuova du fi mek shuor se wi av di Baibl tide?
Wen dem did fos rait di Baibl, dem did rait it pan som sitn laik leda an wan piepa niem papairos, bot dem sitn de kudn stie lang. So, Jeuova mek shuor se som man we lov di Baibl sidong an rait it uova an uova, so wi kyan av it tide. Alduo som piipl we big an powaful chrai fi get rid a di Baibl, yu did av som ada piipl we did wilin fi gi op dem laif fi mek shuor se wi stil av di Baibl tide. Jeuova no mek nobadi ar notn tap im fram mek wi nuo wa im waahn wi fi nuo. Di Baibl mek wi nuo se “Gad wod a-go di de fi eva an eva.”—Aizaiya 40:8.
LORN SOM MUO
Wi a-go luk pan ou Gad put it iina di man dem fi rait di Baibl, ou im mek shuor se wi stil av it tide, an ou im mek shuor se evribadi kyan get wan.
4. Di Baibl mek wi nuo a uu it kom fram
Plie di VIDIYO. Den riid 2 Timoti 3:16, an wi a-go taak bout dem kwestiyan ya:
Ef a man rait di Baibl, wa mek wi se a Gad Wod?
Yu tingk yu kyan riili biliiv se Gad kuda put wa im waahn wi fi nuo iina di man dem we im yuuz fi rait di Baibl?
Sumadi mait-a yuuz wan sekiteri fi rait wan leta, bot wa iina it a no di sekiteri it kom fram. It kom fram di sumadi we tel im wa fi rait. A siem wie so, Gad yuuz man fi rait di Baibl, bot a Gad it kom fram
5. Iivn duo nof piipl did chrai fi get rid a di Baibl, it stil de ya
Ef a riili Gad di Baibl kom fram, im wuda stil mek wi kyan get it tide, no chuu? Bak iina di die, som big an powaful piipl did a chrai fi get rid a di Baibl. Aal di choch liida dem did chrai fi mek di piipl dem no nuo wa iina di Baibl. Iivn duo som piipl nuo se dem did a fait gens dem an dem mait-a en op ded, dem stil wok aad fi mek shuor se di Baibl stil de ya tide. Plie di VIDIYO we a-go mek wi lorn muor bout wan a dem man de, an den wi a-go taak bout dem kwestiyan ya:
Wen yu luk pan umoch di piipl dem du fi mek shuor se wi av di Baibl tide, it mek yu waahn fi riid it? An wa mek yu se so?
Riid Saam 119:97, an den wi a-go taak bout da kwestiyan ya:
Wa mek nof piipl did redi fi ded so dat uol iip a piipl kyan get di Baibl fi riid iina difrant difrant langwij?
6. Wan buk fi evribadi
Fram wie bak wen til nou, wi no av no ada buk we iina so moch difrant difrant langwij an we so moch piipl kyan get laik di Baibl. Riid Aks 10:34, 35, an den wi a-go taak bout dem kwestiyan ya:
Wa mek Gad waahn di Baibl fi de iina uol iip a difrant difrant langwij so dat evribadi kyan get it fi riid?
Wa yu lov bout di Baibl?
Aalmuos
evribadi
iina di worl
kyan get di Baibl iina wan langwij we dem nuo
Piipl kyan get
paat a di Baibl ar di uol a it iina muor dan
3,000
langwij
5,000,000,000
Dis a bout umoch Baibl dem mek iina di worl.
Yu no av no ada buk we dem mek so moch a it
SUMADI MAIT-A SE: “Di Baibl a jos wan uol buk we som man did rait.”
Wa yu tingk bout dis?
Wa mek wi nuo se a Gad di Baibl kom fram?
DIS A WA YU FI MEMBA
Di Baibl a Gad Wod, an im mek shuor se evribadi kyan get wan.
Wa yu did lorn iina da lesn ya?
Wa wi miin wen wi se a Gad put it iina di man dem fi rait di Baibl?
Dem did a chrai fi get rid a di Baibl, bot wi stil av it iina uol iip a difrant difrant langwij. Wa yu laik bout dat?
Jeuova du so moch fi mek yu get fi nuo di ting dem we im waahn yu fi nuo. Ou dat mek yu fiil bout im?
CHEK OUT SOM MUO SITN
Fain out bout wen dem did fos rait di Baibl an bout ou it did kom dong tu tide die.
“Wa Dem Did Du So Dat Wi Stil Av Di Baibl Tide?” (Wiek Op!, Novemba 2007)
Lorn bout chrii tingz we dem did du fi chrai fi get rid a di Baibl.
“Nof Piipl Fait Gens Di Baibl, Bot It Stil De Ya” (Di Wachtowa No. 4 2016)
Wach da vidiyo ya an si ou som piipl did redi fi ded so dat dem kuda rait di Baibl iina difrant difrant langwij.
Dem did rait di Baibl uova an uova, an dem put it iina difrant difrant langwij so dat piipl kuda get it. So ou yu kyan nuo se wa iina it a wa Gad waahn wi fi nuo?
“Yu Tingk Dem Did Chienj Op Chienj Op Di Baibl?” (Sitn we yu kyan get pan di websait)