Ou Di Baibl Kyan Elp Yu Fi Saat Out Yu Laif?

Uol iip a piipl a wanda wa mek laif so aad an ef tingz a-go get beta wan die. An yu av wan bag a tingz we a schres out piipl evridie. Laik piipl a wanda bout ou dem a-go kyan tek kier a demself ar dem fambili, ar wa dem kyan du fi mek dem an dem fambili api. Bot wa wi a si a dat di Baibl a elp piipl fi nuo muo bout dem sitn ya we piipl wanda bout, an it a elp wi fi si ou wi kyan liv wan beta laif rait ya nou. So tingk bout dis: Yu tingk di Baibl kyan riili elp aal a wi fi liv wan beta laif?

1. Wa a som a di sitn dem we wi a tingk bout we di Baibl gi wi di ansa fa?

Si som kwestiyan ya we di Baibl gi wi ansa fa: A ou wi kom bout? A wa wi de ya fa? Wa mek piipl a sofa? Yu tingk se wen sumadi ded a jos it dat? Ef evribadi a se piis, wa mek so moch waar de bout? Yu tingk se di ort a-go bon op, mash op, ar yu tingk sitn els a-go apm tu it? Di Baibl mek wi si se wi fi chrai an get di ansa fi dem kwestiyan ya, an a nof nof piipl api wid di ansa dem we dem get.

2. Ou di Baibl kyan elp wi fi gwaan enjai wi laif ya nou?

Di Baibl tel wi di bes wie fi liv. So it mek wi nuo wa wi fi du fi mek wi fambili riili api. It mek wi nuo wa wi kyan du so dat wi no av uol iip a schres iina wi laif, an ou fi enjai eni wok we wi a du. An yu a-go get fi riizn wid sumadi an fain out wa di Baibl se bout dem sitn ya an wol iip a ada tingz. An yu a-go get fi si se wa di Baibl se iina 2 Timoti 3:16, a so it go fi chuu. It se, “Evri wod we iina Gad wod . . . gud fi tiich piipl.”

LORN SOM MUO

Wi a-go taak bout ou di Baibl elp piipl fi liv wan beta laif, an yu a-go si se yu a-go lov fi riid di Baibl. An yu a-go get fi andastan wa mek yu niid sumadi fi elp yu fi get wa it a se.

3. Di Baibl kyan mek wi nuo wa fi du

Di Baibl komiin laik wan brait brait lait. It kyan mek wi nuo di rait sitn we wi fi du iina laif an wa a-go apm iina di fyuucha.

Riid Saam 119:105, an den wi a-go taak bout dem kwestiyan ya:

• Di sumadi we rait da saam ya, wa im did tingk bout di Baibl?

• Wa yu tingk bout di Baibl?

4. Eni kwestiyan we wi mait-a av, di Baibl kyan elp wi fi ansa dem

VIDIYO: No Tap Sorch Fi Gad! (1:48)

• A wa a som a di kwestiyan dem we di uman iina di vidiyo did av?

• Ou it did elp ar wen shi stodi di Baibl?

Di Baibl tel wi se wi fi aks kwestiyan we wi waahn ansa fa. Riid Matyu 7:7, an den wi a-go taak bout da kwestiyan ya:

• Wa a som kwestiyan we de pan yu main we di Baibl kyan gi yu di ansa fi dem?

5. Yu kyan get fi lov fi riid di Baibl

VIDIYO: Baibl Riidin (2:05)

• Wen it kom aan tu riidin, ou dem yong piipl ya did fiil bout it?

• Bot wa mek dem lov fi riid di Baibl nou?

Wa di Baibl se kyan elp wi fi nuo wa fi du, an it elp fi push wi fi tan op chrang an no gi op. Riid Ruoman 15:4, an den wi a-go taak bout da kwestiyan ya:

• Laik ou di Baibl se it a-go elp wi fi tan op chrang an no gi op, dat soun laik sitn yu wuda waahn it du fi yu?

6. Ada piipl kyan elp wi fi andastan wa di Baibl a se

Som piipl fain se iivn duo dem riid di Baibl pan dem uon, dem get fi andastan it beta wen dem taak bout it wid sumadi els. Riid Aks 8:26-31, an den wi a-go taak bout da kwestiyan ya:

• Ou wi kyan get fi andastan wa di Baibl a se?​—Luk pan vors 30 an 31.

DIS A WA YU FI MEMBA

Di Baibl mek wi nuo di bes wie fi liv wi laif, an it gi wi di ansa fi som kwestiyan we wi mait-a wanda bout, an it elp fi push wi fi tan op chrang an no gi op.

Wa yu did lorn iina da lesn ya?

• Wa a som a di sitn dem we di Baibl kyan elp wi wid?

• Wa a som a di kwestiyan dem we di Baibl kyan elp wi fi get di ansa fa?

• Wa a som a di sitn dem we yu wuda waahn fi nuo wa di Baibl se bout it?

CHEK OUT SOM MUO SITN

Tingk bout ou wen wi du di sitn dem we di Baibl tel wi fi du, ou it mek tingz beta fi wi nowadiez.

“Di Tingz Dem We Rait Dong Iina Di Baibl Kyan Aalwiez Elp Wi” (Di Wachtowa No. 1 2018)

Wach da vidiyo ya an si ou wan man we did av som uol iip a prablem fram im did a wan likl bwai get elp fram di Baibl.

Nou Mi Api An Mi Laif Get Beta (2:53)

Fain out bout som a di sitn dem we di Baibl se wi fi du fi mek wi fambili riili api.

“Fain Out 12 Sitn We Kyan Mek Yu Fambili Riili Api” (Wiek Op! No. 2 2018)

Da vidiyo ya a-go elp yu fi si uu riili a kanchuol da worl ya.

Wai It Gud fi Stodi di Baibl?​—Langga Wan (3:14)

1. Ef a man rait di Baibl, ou kom wi se a Gad it kom fram?

A bout 40 difrant man rait di Baibl, an it tek bout 1,600 ier fi dem difrant difrant man de don rait it. Di fos sumadi did staat rait it iina di ier 1513 B.C.E. (dat a di taim bifuo Jiizas did baan), an di laas sumadi don rait it iina 98 C.E. (dat a di taim afta Jiizas ded). Di man dem we rait di Baibl, aal a dem neehn kom fram di siem plies ar av di siem kain-a wok, bot di ting dem we dem rait mek sens wen aal a it go tugeda. Dis a kaa di sitn dem we dem rait dong kom fram Gad. (Riid 1 Tesaluoniyan 2:13.) Iina 2 Piita 1:21 it se ‘di uoli spirit did tek kanchuol a piipl an mek dem gi mesij we kom fram Gad.’a (2 Piita 1:21) So yu si di sitn dem we dem did rait dong, a no jos wa dem did waahn fi rait dong. Dem rait dong wa Gad did yuuz im spirit fi mek dem rait dong.​—2 Timoti 3:16.