LESN 60
Gwaan Du Di Ting Dem We A-Go Mek Yu An Jeuova Kluos Kluos
Fram yu staat yuuz da buk ya fi stodi di Baibl, a wol iip a tingz yu lorn bout Jeuova. An di ting dem we yu lorn mek yu lov Jeuova bad an kaaz a dat, yu guda aal gi yu laif tu im an get baptaiz aredi. An ef yu no baptaiz yet, yu mait-a a tingk se yu suun go dwi’it. Bot afta yu get baptaiz, a no jos it dat. Yu fi gwaan du tingz we a-go mek yu an Jeuova kluos kluos fi eva. Ou yu kyan du dat?
1. Wa mek yu fi gwaan du di sitn dem we a-go mek yu an Jeuova bi gud gud fren?
Wi afi wok aad fi gwaan du di ting dem we a-go mek wi an Jeuova kluos. Wa mek wi fi du dat? Wi afi du dat so dat “wi no chrie” we fram im. (Iibruu 2:1) So wa kyan elp wi fi gwaan sorv Jeuova fi eva? Wi afi mek shuor se wi eva a du evriting we wi kyan du fi priich tu piipl, an wi afi tingk bout som ada sitn we wi kyan du fi sorv Gad beta. (Riid Filipiyan 3:16.) Fi sorv Jeuova a di bes ting wi kuda eva du wid wi laif!—Saam 84:10.
2. Wa a sitn els we yu fi gwaan du?
Rait ya nou a don yu a don stodi di Baibl wid da buk ya, bot fi bi wan gud Kristiyan, yu afi gwaan du sitn els. Di Baibl se wi afi “lorn fi liv laik wan nyuu sumadi.” (Ifiijan 4:23, 24) Kaaz yu a gwaan stodi di Baibl an yu a go a di miitn dem, yu a-go si se yu gweehn lorn wol iip a nyuu tingz bout Jeuova an im wiez dem. Aalwiez luk fi si ou yu kyan du tingz di wie ou Jeuova wuda du dem. An ef yu si notn we yu kyan du fi sorv im beta, yu fi dwi’it.
3. Ou Jeuova a-go elp yu fi gwaan du di sitn dem we yu fi du so dat yu kyan sorv im beta?
Di Baibl tel wi se: ‘Gad . . . a-go mek unu aat chrang so unu kyan anggl di sofarieshan an im a-go mek shuor se unu tan op chrang iina im no mata ou rof it mait-a get.’ (1 Piita 5:10) Aal a wi fies tingz we kyan kaaz wi fi sin. Bot Jeuova gi wi di chrent we wi niid fi elp wi tan op chrang. (Saam 139:23, 24) Im did pramis wi se im a-go elp wi so dat wi waahn fi du di sitn dem we im waahn wi fi du.—Riid Filipiyan 2:13.
LORN SOM MUO
Lorn bout di sitn dem we yu fi gwaan du so dat yu an Jeuova kyan kluos kluos an ou im a-go bles yu wen yu du dat.
4. No tap taak tu yu bes Fren an lisn tu wa im a se tu
Kaaz yu a prie tu im an yu a stodi di Baibl, a dat mek yu an Jeuova ton fren aredi. Ou wen yu du dem sitn de it a-go elp yu an Jeuova fi get kluosa an kluosa?
Riid Saam 62:8, an den wi a-go taak bout da kwestiyan ya:
Ef yu waahn yu an Jeuova fi kluos kluos, wen yu tingk bout di wie ou yu prie tu im an di ting dem we yu se wen yu a prie, wa yu kyan chienj bout dat?
Riid Saam 1:2, an den wi a-go taak bout da kwestiyan ya:
Ef yu waahn yu an Jeuova fi kluos kluos, ou yu kyan riid di Baibl iina wan wie so dat it elp yu muo?
Wen yu a du yu uona Baibl stodi, wa a som tingz we yu kyan du so it riili elp yu? Fi si som tingz we yu kyan du, plie di VIDIYO, an den wi a-go taak bout di neks kwestiyan dem.
Wa a som a di sitn dem we yu si iina di vidiyo we yu wuda waahn fi du?
Wa a som sitn we yu wuda waahn fi stodi bout?
5. Plan fi du tingz we a-go elp yu fi sorv Jeuova beta
Wen yu plan fi du tingz fi sorv Jeuova beta, dat a-go elp yu fi gwaan du di sitn dem we mek yu an im kluos kluos. Plie di VIDIYO, an den wi a-go taak bout di neks kwestiyan.
Iina di vidiyo, ou it did elp Cameron wen shi did mek op ar main fi du muor tingz fi Jeuova?
A no evribadi kyan muuv go a wan neda konchri fi go priich, bot aal a wi kyan stil du muor tingz fi Jeuova. Riid Pravorbz 21:5, an den tingk bout som tingz we yu wuda laik fi du fi sorv Jeuova beta . . .
iina yu kanggrigieshan.
wen yu a priich tu piipl an a tiich dem.
Ou wa di vors se kyan elp yu fi du di ting dem we yu plan fi du fi sorv Jeuova beta?
Si som sitn ya we yu kyan du fi sorv Jeuova beta
Si ou yu kyan du beta iina di wie ou yu prie tu Jeuova.
Riid aaf di Baibl.
Chrai fi nuo evribadi we iina yu kanggrigieshan.
Staat stodi di Baibl wid sumadi.
Sain op fi bi wan aagzilari paiyanier ar wan regila paiyanier.
Ef yu a wan breda, chrai du muor so dat yu kyan ton wan ministiiriyal sorvant.
6. Yu kyan bi api nou an fi eva!
Riid Saam 22:26, an den wi a-go taak bout da kwestiyan ya:
Wa yu fi du so dat yu kyan bi api nou an fi eva?
DIS A WA YU FI MEMBA
Gwaan du di sitn dem we a-go mek yu an Jeuova kluos an aalwiez chrai fi du muo tingz fi sorv Jeuova beta. Wen yu du dat, yu a-go api nou an fi eva!
Wa yu did lorn iina da lesn ya?
Wa mek yu kyan shuor se Jeuova a-go aalwiez de de fi elp yu fi gwaan sorv im?
Wa an wa yu kyan du so dat yu an Jeuova kyan kluos kluos?
Wen yu du muo tingz fi Jeuova, ou dat kyan elp yu fi get kluosa tu im?
CHEK OUT SOM MUO SITN
Wa yu tingk miin muor tu Jeuova, ef sumadi du wan big ting wan taim fi shuo se dem a chos iina im, ar dem chos iina im fi di wol a dem laif?
Aal sumadi we a sorv Jeuova gud gud kyan av som taim wen dem no so api. Wach dis fi si wa dem kyan du fi api agen.
Wen Yu Stodi An Tingk Bout Wa Yu A Lorn, Dat Wi Mek Yu Api Agen (5:25)
Ou yu kyan plan fi du muo tingz fi Jeuova an mek shuor se yu du dem?
“Plan Fi Du Tingz We A-Go Big Op Di Wan We Mek Yu” (Di Wachtowa, Julai 15, 2004)
Wa mek it impuotant fi wan Kristiyan chrai aad fi du di sitn dem we Jeuova se dem fi du, an ou yu kyan mek shuor se yu a du dat?