Wol iip a piipl fiil a wie fi taak bout seks. Bot yu nuo se di Baibl taak bout seks duo? Bot wen di Baibl taak bout seks, it taak bout it iina wan gud wie, an wa it se kyan du wi gud. An it mek sens se wa di Baibl se bout seks a-go gud fi wi, kaaz a Jeuova mek wi an im nuo di bes ting fi wi. Im mek wi nuo wa wi kyan du fi mek im api, an wa fi du ef wi waahn fi api nou an fi eva.

1. Wa Jeuova av fi se bout seks?

Seks a wan prezent fram Jeuova. Im waahn wan man an wan uman we marid tu dem wan aneda fi enjai it. Im no onggl mek it so dem kyan av pikni, bot im mek it so dem kyan shuo ou dem lov dem wan aneda an enjai it di wie ou Gad waahn dem fi enjai it. A dat mek di Baibl tel wi se: “Yu fi fiil gud wid di waif we yu av fram yu yong.” (Pravorbz 5:18, 19) Jeuova waahn di Kristiyan dem we marid fi stik tu dem wan aneda, so dem wudn sliip wid sumadi we dem no marid tu.​—Riid Iibruu 13:4.

2. A wa a seks sin?

Di Baibl mek wi nuo se “di piipl dem we tek paat iina aal kain-a seks sin . . . naa go tek paat iina Gad Kindom.” (1 Korintiyan 6:9, 10) Di man dem we rait di Baibl iina di Griik langwij, dem yuuz di wod por·neiʹa fi taak bout seks sin. Da wod de av fi du wid (1) piipl we sliipa wid piipl we dem no marid tu, (2) man we sliip wid man, an uman we sliip wid uman, an (3) piipl we av seks wid animal. Wi a du wa Jeuova waahn wi fi du an it a du wi gud wen wi “kip we fram aal kain-a seks sin.”​—1 Tesaluoniyan 4:3.

LORN SOM MUO

3. Ron we fram aal kain-a seks sin

Wan man we chos iina Gad we niem Juozif did afi ron we fram wan uman we did waahn av seks wid im so dat im kuda du tingz Jeuova wie. Riid Jenisiz 39:1-12, an den wi a-go taak bout dem kwestiyan ya:

• Wa mek Juozif did ron we fram Patifa waif? ​—Luk pan vors 9.

• Yu tingk Juozif did du di rait ting? An wa mek yu se so?

VIDIYO: Ron We Fram Seks Sin (5:06)

Jeuova waahn wi kip we fram seks sin. Riid 1 Korintiyan 6:18, an den wi a-go taak bout dem kwestiyan ya:

• Som piipl we en op iina seks sin, wa a som sitn we kuda kaaz dem fi dwi’it?

• Wa kyan elp yu fi kip we fram seks sin?

4. Yu kyan kip we fram eniting we wi kaaz yu fi sin

VIDIYO: Wen Yu Riid Di Baibl, It Kyan Elp Yu Fi Tan We Fram Eniting We Wi Kaaz Yu Fi Sin (3:02)

• Wen di breda iina da vidiyo ya si se di sitn dem we im did a tingk bout kuda mek im go gi im waif bon, wa dat did mek im du?

Wen it kom aan tu seks, aal wan Kristiyan we a sorv Jeuova di rait wie mait-a fain it aad fi tek im main aafa tingz we im nuo se no rait. Wa kyan elp yu fi tap tingk bout tingz we yu nuo se no rait? Riid Filipiyan 4:8, an den wi a-go taak bout dem kwestiyan ya:

• Wa kain-a tingz wi fi a tingk bout?

• Wen wi riid di Baibl an kip wiself bizi wid Jeuova bizniz, ou dem sitn ya kyan elp wi fi kip we fram seks sin?

5. Di wie ou Jeuova waahn wi fi liv a fi wi uona gud

VIDIYO: Sumadi We No Av Moch Sens (9:31)

• Ou di yong bwai en op wich paat im did de we mek im kuda get iina chobl?​—Luk pan Pravorbz 7:8, 9.

• Azkaadn tu Pravorbz 7:23, 26, seks sin kaaz wol iip a prablem. Ef wi kip we fram seks sin, wa a som prablem we wi naa go av?

• Wen wi kip we fram seks sin, ou it kyan mek wi api nou an fi eva?

Som piipl tingk se Gad wikid kaaz a ou di Baibl tel wi se im fiil bout wen man sliip wid man an uman sliip wid uman. Bot Jeuova Gad lov wi an im waahn evribadi fi api nou an fi eva. Fi get da laif de, wi afi liv ou Jeuova waahn wi fi liv. Riid 1 Korintiyan 6:9-11, an den wi a-go taak bout da kwestiyan ya:

• Bies pan ou Jeuova luk pan tingz, ef wan man fiil fi sliip wid wan man ar wan uman fiil fi sliip wid wan uman, a onggl dem fiilinz de rang?

Yu tingk it mek sens fi wi chienj op wi laif fi mek Gad api? Riid Saam 19:8, 11, an den wi a-go taak bout dem kwestiyan ya:

• Wen it kom aan tu seks sin an dem ting de, yu tingk wa Jeuova se bout it fier? Wa mek yu se so?

DIS A WA YU FI MEMBA

Seks a wan nais sitn we Jeuova gi wan man an wan uman we marid so dat dem kyan enjai it.

Wa yu did lorn iina da lesn ya?

• Wa an wa di Baibl se a seks sin?

• Wa a-go elp wi fi kip faar fram seks sin?

• Ou wi a-go betaraaf wen wi du wa Jeuova se wi fi du an kip we fram aal kain-a seks sin?

CHEK OUT SOM MUO SITN

Lorn wa mek Gad waahn wan man an wan uman we liv tugeda fi marid.

“Wa Di Baibl Av Fi Se Bout Wan Man An Wan Uman We De Wid Dem Wan Aneda Bot Dem No Marid?” (Sitn we yu kyan get pan di websait)

Lorn wa mek wen di Baibl se man no fi sliip wid man an uman no fi sliip wid uman it no miin se wi fi iet di piipl dem we du dat.

“It Rang Fi Man Sliip Wid Man An Uman Sliip Wid Uman?” (Sitn we yu kyan get pan di websait)

Luk pan ou wa Gad se bout seks protek wi.

“Wen Sumadi Yuuz Dem Mout Fi Av Seks, A Seks Dat?” (Sitn we yu kyan get pan di websait)

Luk pan wa elp wan man we yuus tu sliip wid man fi chienj op im wiez fi mek Gad api iina im tuori we niem “Dem Chriit Mi Gud.”

“Di Baibl Chienj Piipl Laif Fi Di Beta” (Di Wachtowa, Iepril 1, 2011)

Iina som plies, piipl biliiv se ef yu no marid yu kyaahn api. Bot a no evribadi we marid api, an som piipl we no marid api. Di Baibl mek wi nuo se weda wi marid ar wi no marid, di tuu a dem a sitn gud we Jeuova gi wi.

1. Wa a som gud sitn we sumadi kyan du kaa dem no marid?

Di Baibl tel wi se: “Di wan we marid . . . du di rait sitn, bot di wan we no get marid​—im du sitn iivn beta.” (Riid 1 Korintiyan 7:32, 33, 38.) Ou di wan dem we no marid “du sitn iivn beta” dan di wan dem we marid? Dis a kaa di wan dem we no marid no afi a spen no taim a tek kier a no ozban ar waif. So dem wuda av muor taim fi du ada tingz. So dem kyan du muor fi Jeuova, laik fi go a wan neda konchri fi go elp out wid di priichin wok de. An pan tap a dat, dem kyan spen muor taim a jraa nier tu Jeuova Gad.

2. Wen sumadi marid azkaadn tu di laa iina dem konchri, wa a som gud tingz we kyan gwaan fi dem?

Jos laik ou gud tingz kyan gwaan fi di piipl dem we no marid, a siem so gud tingz kyan gwaan fi di piipl dem we marid tu. Di Baibl tel wi se “wen tuu sumadi wok tugeda, it beta dan wan.” (Iikliiziyastiiz 4:9) Di wan dem we a du wa di Baibl se dem fi du iina dem marid laif fain out se dis a chuu. An di wan dem we marid azkaadn tu wa di laa iina dem konchri se pramis fi lov dem wan aneda an fi rispek, an tek kier a dem wan aneda. Dem fiil beta kaaz it naa go iizi fi di neks sumadi dis git op an lef dem. An ef dem av no pikni, it a-go beta fi di pikni dem tu.

3. Ou Jeuova fiil bout it wen wan man an wan uman marid?

Wen Jeuova a marid di fos man an uman, im se: “Wan man a-go lef im faada an im mada an jain op wid im waif.” (Jenisiz 2:24) Jeuova waahn wan ozban an wan waif fi lov dem wan aneda an stik tu dem wan aneda fi di wol a dem laif. Im onggl lou dem fi divuos ef wan a dem sliip wid sumadi els. Di wan we neehn sliip wid nobadi els, a dem av di rait fi mek op dem main ef dem waahn divuos ar dem no waahn divuos.a (Matyu 19:9) Jeuova no waahn nobadi fi marid tu muor dan wan sumadi siem taim.​—1 Timoti 3:2.

LORN SOM MUO

4. Mek yuus a di taim we yu av wen yu no marid

Jiizas did get fi du nof gud sitn kaaz im neehn marid. (Matyu 19:11, 12) Riid Matyu 4:23, an den wi a-go taak bout da kwestiyan ya:

• Kaaz Jiizas neehn marid, wa a som a di gud sitn dem we im get fi du fi im Faada Jeuova an fi ada piipl?

Di Kristiyan dem we no marid kyan yuuz dem taim fi du som gud sitn laik wa Jiizas did du we a-go mek dem api. Plie di VIDIYO, an den wi a-go taak bout di neks kwestiyan.

VIDIYO: Som A Dem We No Marid We A Du Nof Fi Jeuova (3:11)

• Wa a som tingz we som a di Kristiyan dem we no marid kyan du we a-go mek dem api?

Yu did nuo se?

Di Baibl no gi wi di iej wen sumadi fi marid. Bot it tel wi se “wan man fi marid wan uman.” Dat miin se dem a no likl pikni, so dem a-go nuo ou fi kanchuol demself wen it kom aan tu seks.​—1 Korintiyan 7:36.

5. No dis git op an marid eni an enibadi so

Fi pik di sumadi we yu a-go marid tu a wan a di bigis ting yu afi go mek op yu main fi du. Riid Matyu 19:4-6, 9, an den wi a-go taak bout da kwestiyan ya:

• Wa mek wan Kristiyan no fi dis git op an ron go marid so?

Di Baibl kyan mek yu nuo som a di wiez dem we yu fi luk fa iina di sumadi we yu waahn fi marid tu. Luk fi sumadi we lov Jeuova. Dat a wan a di bigis ting yu fi luk out fa.b Riid 1 Korintiyan 7:39 an 2 Korintiyan 6:14. An den wi a-go taak bout dem kwestiyan ya:

• Wa mek a onggl sumadi we a sorv Jeuova wi fi marid tu?

• Ou yu tingk Jeuova wuda fiil ef wi go marid tu sumadi we no lov im?

6. Luk pan marid laif di wie ou Jeuova luk pan it

Bak iina di taim wen di Baibl did a rait, som a di man dem we did de a Izrel did a divuos dem waif an lef dem kaa dem onggl did a tingk bout demself. Riid Malikai 2:13, 14, 16, an den wi a-go taak bout da kwestiyan ya:

• Wa mek Jeuova iet it wen sumadi divuos an dem na’av no rait riizn fi dwi’it?

Plie di VIDIYO, an den wi a-go taak bout di neks kwestiyan.

VIDIYO: Wen Yu Marid Tu Sumadi, Yu No Fi Lef Dem (4:30)

• Ef yu marid tu sumadi we naa sorv Jeuova, wa yu kyan du fi mek yu marid laif api?

7. Du di sitn dem we Jeuova se yu fi du iina yu marid laif

VIDIYO: Yu Kyan Du Wa Jeuova Waahn Yu Fi Du Wen It Kom Aan Tu Marid Laif (4:14)

Riid Iibruu 13:4, an den wi a-go taak bout dem kwestiyan ya:

• Yu tingk wa Jeuova waahn wi fi du wen it kom aan tu marid laif fier? Wa mek yu se so?

Jeuova waahn yu fi marid azkaadn tu di laa dem we de iina yu konchri. An ef yu a-go divuos it afi bi azkaadn tu di laa tu. Riid Taitos 3:1, an den wi a-go taak bout da kwestiyan ya:

• Ef yu marid, yu shuor se yu marid azkaadn tu di laa dem iina yu konchri?

DIS A WA YU FI MEMBA

Weda yu marid ar yu no marid, di tuu a dem a sitn gud we Jeuova gi wi. Eni wan a dem kyan mek yu api ef yu dwi’it di wie ou Jeuova waahn yu fi dwi’it.

Wa yu did lorn iina da lesn ya?

• Ou sumadi kyan mek yuus a dem taim wen dem no marid?

• Wa mek di Baibl se a onggl sumadi we a sorv Jeuova yu fi marid tu?

• Azkaadn tu di Baibl, wa a di onggl riizn wa mek sumadi kyan divuos?

CHEK OUT SOM MUO SITN

Wa it miin fi marid tu “wan a Gad pikni”?

“Kwestiyan We Piipl Aks” (Di Wachtowa, Julai 1, 2004)

Wach da vidiyo ya we kyan elp yu fi mek op yu main bout wa fi du wen yu laik sumadi an waahn fi marid dem an wen ya’a tingk bout fi marid.

Wen Yu A Plan Fi Get Marid (11:53)

Fain out wa mek wan breda fiil laik se wa Jeuova gi’im wot muo dan we im did gi op.

Mi Did A Uop Se Shi Wuda Lorn Di Chuut Bout Jeuova (1:56)

Wa a som sitn fi sumadi tingk bout bifuo dem plan fi divuos ar lef dem waif ar ozban?

“Rispek ‘Wa Gad Jain Op’” (Di Wachtowa, Disemba 2018)