LESN 28
Mek Jeuova An Jiizas Si Se Yu Tangk Dem Fi Wa Dem Du Fi Yu
Wen wan a yu fren gi yu wan nais nais prezent, ou yu fiil wen yu get it? It mek yu fiil gud, no chuu? An yu waahn fi mek dem si se yu tangk dem fi’it. Jeuova an Jiizas gi wi di bes prezent eva. A wa’a da prezent de? An wa wi kyan du fi mek dem si se wi tangk dem fi’it?
1. Wa a wan sitn we wi kyan du fi mek Jeuova an Jiizas Krais si se wi tangk dem fi wa dem du fi wi?
Di Baibl mek wi nuo se “enibadi we chos iina [Jiizas]” a-go get fi liv fi eva. (Jan 3:16) Fi chos iina Jiizas a no jos biliiv wi fi biliiv iina im. Wi afi av akshan fi bak it op. So wi afi du wa rait. (Jiemz 2:17) Ef wi du an se di sitn dem we mek Jeuova an Jiizas si se wi chos iina dem, wi an dem wudaana ton big fren.—Riid Jan 14:21.
2. A wich speshal miitn wi av we wi kyan go fi mek Jeuova an Jiizas si se wi tangk dem fi wa dem du fi wi?
Pan di iivnin bifuo Jiizas did ded, im mek im falara dem nuo wan neks ting we dem kyan du fi shuo se dem tangk im fi wa im a-go du fi dem. Jiizas tel dem fi gyada tugeda an kip wa Gad Wod kaal ‘di Laad Sopa.’ (1 Korintiyan 11:20) Jiizas tel im apasl dem an aal a di Kristiyan dem afta dem, fi kip da speshal miitn ya fi memba se im gi op im laif fi wi. Wen it kom aan tu da speshal miitn ya, Jiizas se: “Unu fi du dis fi memba mi.” (Luuk 22:19) Wen yu go a di Laad Sopa, yu mek Jeuova an Jiizas si se yu tangk dem fi lov wi so moch.
LORN SOM MUO
Lorn bout som ada sitn we yu kyan du fi shuo Jeuova an Jiizas se yu tangk dem fi wa dem du. An luk pan wa mek wi nuo se di Laad Sopa a wan big ting.
3. Wa wi kyan du fi shuo Jeuova an Jiizas se wi tangk dem
Supuoz yu did a joun an sumadi siev yu? Yu wuda dis figet bout wa im du fi yu? Ar yu wuda du tingz fi mek im si se yu tangk im fi wa im du fi yu?
Wi uo Jeuova wi laif. Riid 1 Jan 4:8-10, an den wi a-go taak bout dem kwestiyan ya:
Wa mek wi wuda se di gi op we Jiizas gi op im laif fi wi, a wan speshal prezent dat?
Ou yu fiil bout wa Jeuova an Jiizas du fi yu?
Wa wi kyan du fi mek Jeuova an Jiizas si se wi tangk dem fi wa dem du fi wi? Riid 2 Korintiyan 5:15 an 1 Jan 4:11; 5:3. Afta evri skripcha wi a-go taak bout da kwestiyan ya:
Bies pan da skripcha ya, wa wi fi du fi mek Jeuova an Jiizas si se wi tangk dem fi wa dem du fi wi?
4. Du laik Jiizas
Wan neda ting we wi kyan du fi dem si se wi tangk dem, a wen wi du tingz laik ou Jiizas wuda du it. Riid 1 Piita 2:21, an den wi a-go taak bout da kwestiyan ya:
Wa yu kyan du fi shuo se yu a fala iina Jiizas futstep dem?
Jiizas lov Gad Wod. Im did priich bout di gud nyuuz, an im elp ada piipl
5. Go a di speshal miitn we niem di Laad Sopa
Riid Luuk 22:14, 19, 20 fi si wa did apm a di fos Laad Sopa. An den wi a-go taak bout dem kwestiyan ya:
Wa did apm a da Laad Sopa ya?
Wa di bred miin an wa di wain miin?—Luk pan vors 19 an 20.
Wen Jiizas did tel im falara dem fi kip di Laad Sopa, im did waahn dem fi kip it wan taim fi di ier pan di die wen im did ded. A dat mek di Jeuova Witnis dem gyada tugeda evri ier fi du wa Jiizas se wi fi du, an kip di Laad Sopa. Fi fain out muor bout da speshal miitn ya, plie di VIDIYO. An den wi a-go taak bout di neks kwestiyan.
Wa dem du a di Laad Sopa?
Di bred an di wain miin sopm. Di bred miin Jiizas porfek badi we im gi op fi wi an di wain miin im blod
SUMADI MAIT-A SE: “Aal yu afi du fi get siev, a jos biliiv iina Jiizas.”
Ou yu kyan yuuz Jan 3:16 an Jiemz 2:17 fi mek sumadi si se wi kyaahn dis se wi biliiv iina Jiizas, wi afi du muor dan dat?
DIS A WA YU FI MEMBA
Wi mek Jiizas nuo se wi tangk im fi kom ded fi wi wen wi chos iina im an wen wi go a di Laad Sopa.
Wa yu did lorn iina da lesn ya?
Wa it miin fi put yu chos iina Jiizas?
Wa yu wuda laik fi du fi mek Jeuova an Jiizas nuo se yu tangk dem fi wa dem du fi yu?
Wa mek a wan big ting fi yu go a di Laad Sopa?
CHEK OUT SOM MUO SITN
Kaa Krais Jiizas kom ded fi wi, wa dat mek wi waahn fi du?
Lorn wa it miin fi put yu chos iina Jeuova an ou wi kyan dwi’it.
“Put Yu Chos Iina Aal A Di Sitn Dem We Jeuova Pramis Wi” (Di Wachtowa, Aktuoba 2016)
Luk pan ou wan uman laif did betaraaf afta shi lorn se Jiizas kom ded fi ar iina da tuori ya we niem, “Mi Fiil Laik Sumadi Agen.”
“Di Baibl Chienj Piipl Laif Fi Di Beta” (Di Wachtowa, Aagos 1, 2011)
Fain out wa mek a onggl likl bit a piipl nyam di bred an jringk di wain a di Laad Sopa.