LESN 49
Wa Yu Fi Du Fi Av Wan Api Fambili Laif?—Paat 1
Wen wan ozban an wan waif jos marid, di wie ou dem fiil api pan dem wedn die, dem wudn main ef dem kuda fiil so fi eva. An yu waahn nuo se dem kyan api so fi eva ino. Yu av som Kristiyan we marid fi wol iip a ier an dem get fi si se wen dem wok aad fi du wa di Baibl se dem fi du, dem riili api fi chuu.
1. Wa di Baibl se di ozban dem fi du?
Di ozban, a im Jeuova se inchaaj a di fambili. (Riid Ifiijan 5:23.) Jeuova waahn di ozban dem fi du di sitn dem we a-go mek dem fambili aarait. Di Baibl se: “Di ozban dem fi lov dem waif.” (Ifiijan 5:25) Bot a wa dat riili miin? Wen wan ozban lov im waif, im no onggl chriit ar gud roun ada piipl bot im chriit ar gud wen im de a im yaad tu. Im du im bes fi mek shuor se shi sief an aarait an av evriting we shi niid fi liv. (1 Timoti 5:8) Bot di bigis ting we im fi du a di sitn dem we a-go kip im waif kluos tu Jeuova. (Matyu 4:4) Laik, im kyan prie wid im waif an riid di Baibl wid ar. Wen wan ozban du di sitn dem fi tek kier a im waif, a so kom im an Jeuova a-go kluos kluos.—Riid 1 Piita 3:7.
2. Wa di Baibl se di waif dem fi du?
Di Baibl se: “Di waif dem fi rispek dem ozban.” (Ifiijan 5:33) Ou wan waif kyan shuo se shi rispek ar ozban? Shi kyan tingk bout di gud wiez dem we im av an wa im du fi tek kier a ar an di pikni dem. Sitn els we shi kyan du fi shuo se shi rispek im a dat wen im mek op im main fi du sitn fi di fambili, shi elp im so dat tingz kyan wok out gud. An wen shi a taak tu im, shi mek shuor se shi dwi’it iina wan nais wie, aal ef im a sumadi we naa worship Jeuova.
3. Wa wan ozban an wan waif kyan du fi mek dem marid laif beta?
Di Baibl tel wi se wen wan man an wan uman marid ‘di tuu a dem ton wan sumadi.’ (Matyu 19:5) Dat miin se dem wok aad fi stie kluos tu dem wan aneda. So dem fi mek shuor se dem eva a spen taim a du tingz wid dem wan aneda an a taak tu dem wan aneda bout ou dem riili fiil bout tingz. Ef sumadi marid, a Jeuova fi kom fos iina dem laif an afta im, a dem ozban ar dem waif. An dem fi mek shuor se dem naa spen no wol iip a taim a taak tu ar a du tingz wid no ada man ar uman.
LORN SOM MUO
Yu a-go si ou di ting dem we yu lorn fram di Baibl kyan elp yu fi mek yu marid laif beta.
4. Di ozban dem fi lov dem waif an chriit dem gud
Di Baibl se: “Ozban fi lov dem waif, siem laik ou dem lov dem uona self.” (Ifiijan 5:28, 29) A wa dat riili a se? Plie di VIDIYO, an den wi a-go taak bout di neks kwestiyan.
Wa a som tingz we wan ozban kyan du fi shuo se im lov im waif an im a chriit ar gud?
Riid Koloshan 3:12, an den wi a-go taak bout da kwestiyan ya:
Ou wan ozban kyan shuo se im a du di ting dem we da skripcha ya se wen im a diil wid im waif?
5. Di waif dem fi shuo se dem lov an rispek dem ozban
Di Baibl se wan waif fi av nof rispek fi ar ozban, aal ef im naa sorv Jeuova. Riid 1 Piita 3:1, 2, an den wi a-go taak bout dem kwestiyan ya:
Ef yu av wan ozban we naa sorv Jeuova, wi nuo se yu wel waahn im fi kom sorv Jeuova wid yu. Wa yu tingk wuda riili elp im—ef yu eva a priich tu im laik Paal, ar yu a wok aad fi du di gud sitn dem we yu a lorn fram di Baibl an shuo se yu av nof rispek fi im? Wa mek yu se so?
A nof tingz di ozban an di waif dem afi du fi mek shuor se dem fambili gwaan gud. An di tuu a dem kyan mek op dem main bout wa dem gweehn du tugeda. Bot som a di taim wan waif mait-a no si tingz di wie ou ar ozban si’it. So wa shi kyan du dem taim de a taak tu im iina wan nais wie an mek im nuo ou shi fiil bout tingz. Bot shi fi memba se a im a di wan we Jeuova put inchaaj fi du tingz fi mek shuor se evribadi iina di fambili api an aarait. So wen im mek op im main fi du sitn, shi fi wok aad fi elp im. Wen shi du dat, shi elp evribadi iina di fambili fi bi api. Riid 1 Piita 3:3-5, an den wi a-go taak bout da kwestiyan ya:
Wen wan waif shuo se shi rispek ar ozban, ou Jeuova fiil bout dat?
6. Ou yu kyan diil wid prablem iina yu marid laif?
Nobadi marid laif no porfek. So di ozban an waif dem afi wok tugeda fi mek shuor se eni prablem we dem av, it no mash op dem marid laif. Plie di VIDIYO, an den wi a-go taak bout di neks kwestiyan dem.
Wa shuo se di ozban an waif we iina di vidiyo neehn so kluos tu dem wan aneda agen?
Wa a som a di tingz we dem did du fi mek tingz beta iina dem marid laif?
Riid 1 Korintiyan 10:24 an Koloshan 3:13. Afta evri wan a di skripcha dem, wi a-go taak bout da kwestiyan ya:
Wen di ozban an di waif dem du wa da skripcha ya se, ou dat kyan mek dem marid laif beta?
Di Baibl tel wi se wi fi put ada piipl bifuo wiself. Wen wi put ada piipl bifuo wiself, wi chriit dem gud an shuo se wi av nof rispek fi dem. Riid Ruoman 12:10, an den wi a-go taak bout dem kwestiyan ya:
Di ozban an waif dem fi put di sumadi we dem marid tu bifuo demself. Yu tingk dem afi wiet fi di ada sumadi dwi’it fos bifuo dem dwi’it? Wa mek yu tingk so?
SUMADI MAIT-A SE: “Mi an di sumadi we mi marid tu no kluos laik wan taim.”
Wa yu wuda se fi mek dem nuo se di Baibl kyan elp dem?
DIS A WA YU FI MEMBA
Wan ozban an wan waif wi api wen dem lov dem wan aneda, wen dem shuo se dem rispek dem wan aneda, an dem du wa di Baibl se dem fi du.
Wa yu did lorn iina da lesn ya?
Wa an wa wan ozban fi du fi mek im marid laif api?
Wa an wa wan waif fi du fi mek ar marid laif api?
Ef yu marid, wich wan a di tingz we yu lorn fram di Baibl yu tingk kyan mek yu marid laif beta?
CHEK OUT SOM MUO SITN
Lorn bout som sitn we kyan elp yu fi av wan api fambili laif.
Wach wan myuuzik vidiyo we shuo di blesn dem we yu kyan get wen yu du wa di Baibl se yu fi du iina yu marid laif.
Luk pan wa it miin fi wan waif shuo se shi rispek se ar ozban inchaaj a di fambili.
“Wa Mek Di Uman Dem Fi Shuo Se Dem Rispek Di Ed Fi Dem Fambili?” (Di Wachtowa, Mie 15, 2010)
Wa did elp wan ozban an waif, we did aal divuos tu, fi diil wid di prablem dem iina dem marid laif?