LESN 11
Ou Yu Kyan Riid Di Baibl So Dat It Kyan Elp Yu?
Yu eva fiil laik se yu av wan big wok fi du an yu no nuo ou fi staat it? Yu mait-a afi staat it likl likl so dat it no komiin laik tu moch fi yu. A siem so, fi staat riid di Baibl, it mait-a komiin laik wan big ting tu yu. Yu mait-a aal aks yuself, ‘A wich paat mi fi staat riid it fram?’ Iina da lesn ya, wi a-go luk pan som likl tingz we yu kyan go du so dat yu kyan get fi lov fi riid an stodi di Baibl.
1. Wa mek wi fi riid di Baibl aafn?
Sumadi we a riid “Jeuova wod” aafn, im a-go api an evriting we im du a-go wok out gud. (Riid Saam 1:1-3.) Fi di fos, jos staat riid likl bit evridie. Di muor yu riid di Baibl, a di muor yu a-go lov fi riid it.
2. Wa wi fi du wen wi a riid di Baibl so dat it kyan elp wi?
Wen wi a riid di Baibl, wi fi tap an tingk bout wa wi a riid se. So wi fi riid it tu wiself “an tingk bout wa it a se.” (Jashwa 1:8) So wen yu a riid, aks yuself dem kwestiyan ya: ‘Wa dis a tel mi se bout Jeuova Gad? Ou mi kyan du wa dis a tel mi se fi du? An ou mi kyan yuuz dem sitn ya we mi a riid bout fi elp ada piipl?’
3. Wa yu kyan du fi fain taim fi riid di Baibl?
Yu fain it aad fi mek taim fi riid di Baibl? A no yu wan fain it aad fi mek taim fi riid it. Di Baibl tel wi se: “Evri chaans unu get fi du sopm gud, du it.” (Ifiijan 5:16) So wa yu fi du a set wan taim evridie fi riid di Baibl. Som dwi’it orli maanin. Som dwi’it lieta iina di die, laik pan dem lonch taim. An som ada piipl riid dem Baibl bifuo dem go a dem bed. Wa wuda bi wan gud taim fi yu fi riid di Baibl?
LORN SOM MUO
Fain out som tingz we yu kyan du so dat yu kyan get fi lov fi riid di Baibl. An lorn fi du di ting dem we a-go elp yu fi get redi fi wen di sumadi we a-go tiich yu kom kom stodi di Baibl wid yu.
Jos laka ou yu kyan get fi lov iit difrant difrant fuud we yu neva nyam bifuo, a siem so yu kyan get fi lov fi riid di Baibl
4. Wa yu fi du so dat yu kyan lov fi riid di Baibl
Wen yu jos a-go staat riid di Baibl, it naa go so iizi fi yu du it. Bot jos laka ou sumadi kyan get fi lov fi iit difrant difrant fuud we dem neva nyam bifuo, a siem wie so wi kyan get fi lov Gad Wod an “wel waahn” fi riid it. Riid 1 Piita 2:2, an den wi a-go taak bout da kwestiyan ya:
Yu tingk se ef yu riid di Baibl evridie yu kyan go get fi lov fi riid it an wel waahn dwi’it?
Plie di VIDIYO fi si ou som piipl did get fi staat lov fi riid di Baibl. Den wi a-go taak bout dem kwestiyan ya:
Wa’a som a di ting dem we did mek it aad fi di yong piipl dem riid di Baibl?
Wa’a som a di ting dem we dem did du so dem kuda riid di Baibl wen dem did plan fi riid it?
Wa’a som a di sitn dem we dem did du so dat dem kuda get fi lov fi riid di Baibl?
Tingz we yu kyan du fi staat riid di Baibl:
Pik wan Baibl we dem rait iina wan langwij we it iizi fi andastan. Yu kyan riid di New World Translation ef yu av it iina fi yu langwij.
Di fos ting yu fi du, a riid di paat dem iina di Baibl we yu laik di muos. Fi si som tingz we yu kyan du, luk pan di paat we niem ““Tingz We Kyan Elp Yu Fi Staat Riid Di Baibl.”
Rait dong di paat dem we yu riid aredi. Fi du dis, yuuz di paat we de iina da buk ya we niem “Maak Wich Paat Yu Riid Aredi Iina Di Baibl.”
Yu kyan yuuz di JW Library® ap. Yu kyan yuuz it pan yu fuon ar tablit an dem ting de fi riid yu Baibl ar fi lisn tu it eniwe.
Yuuz di paat we de a di bak a di New World Translation we niem apendiks. Wen yu luk roun de-so, yu a-go si som paat we niem map, chaat, glasri, an ada tingz.
5. Du di ting dem we a-go elp yu fi get redi fi wen di sumadi we a-go tiich yu kom stodi di Baibl wid yu
Riid Saam 119:34, an den wi a-go taak bout da kwestiyan ya:
Wa mek it gud fi yu prie bifuo yu riid di Baibl ar wen yu a get redi fi wen di sumadi we a-go tiich yu kom stodi di Baibl wid yu?
Si som sitn ya we yu kyan du fi mek shuor se yu get evriting we yu fi get wen yu a stodi di Baibl:
Riid evriting we de pan di fos piej a di lesn.
Fain di skripcha dem iina di lesn an riid dem, an si wa dem av fi du wid wa yu a lorn iina di lesn.
Maak di wod dem ar di paat dem we a-go elp yu fi gi di ansa; dis a mek it iizi fi yu taak bout wa yu a lorn wid di sumadi we a tiich yu.
Yu did nuo se?
Di Jeuova Witnis dem yuuz difrant difrant Baibl. Bot, wi riili lov fi yuuz di New World Translation of the Holy Scriptures kaa wa iina it a so it go fi chuu. It iizi fi wi get wa it a se. An Gad niem de iina it.—Yu kyan go chek out sitn we yu kyan riid pan di websait we niem “Jeuova Witnis Av Dem Uona Baibl?”
SUMADI MAIT-A SE: “It tek tu moch outa mi fi stodi di Baibl yaa man. Mi na’av di taim ar di chrent fi’it.”
Wa yu tingk bout dat?
DIS A WA YU FI MEMBA
Wen yu riid di Baibl, fi get aal a wa yu kyan get outa it, yu fi set wan taim fi riid it an prie tu Gad fi elp yu fi get wa yu a riid se. An du wa yu niid fi du so dat yu wi redi fi wen di sumadi we a-go tiich yu kom stodi di Baibl wid yu.
Wa yu did lorn iina da lesn ya?
Wen ya’a riid di Baibl wa a som a di sitn dem we yu fi du so dat it kyan elp yu?
Wen a di bes taim fi yu fi riid an stodi di Baibl?
Wa mek yu fi du di sitn dem we yu fi du so dat yu wi redi fi wen di sumadi we a-go tiich yu kom fi stodi di Baibl wid yu?
CHEK OUT SOM MUO SITN
Fain out bout som tingz we yu kyan du so dat wen yu riid di Baibl it kyan du wol iip muor fi yu.
“Du Dem Sitn Ya Wen Yu A Riid Di Baibl An It A-Go Du Uol Iip Muor Fi Yu” (Di Wachtowa No. 1 2017)
Fain out bout chrii difrant wie ou yu kyan riid di Baibl.
Fain out wa yu kyan du so dat yu kyan lov fi riid di Baibl.
Lisn tu som tingz we som piipl we a riid di Baibl fram lang taim du we yu kyan du.
Du Dem Sopm Ya Wen Yu A Stodi So Dat It Kyan Du Wol Iip Fi Yu (2:06)