5. Wa Jeuova waahn im fren dem fi du?

Aal a wi lov wen wi fren dem du tingz fi wi.

• Wa’a som a di sitn dem we yu waahn yu fren dem fi du fi yu?

Riid 1 Jan 5:3, an den wi a-go taak bout da kwestiyan ya:

• Wa Jeuova waahn im fren dem fi du?

Ef wi a-go du wa Jeuova waahn wi fi du, wi mait-a afi tap du som a di sitn dem we wi a du ar chienj som a di wiez dem we wi av. Riid Aizaiya 48:17, 18, an den wi a-go taak bout da kwestiyan ya:

• Wa mek Jeuova aks im fren dem fi chienj dem wiez ar fi tap du tingz we dem a du?

Bifuo yu baptaiz, yu fi lorn bout Jeuova an chos iina im. (Riid Iibruu 11:6.) Di muor yu gwaan lorn bout Jeuova an chos iina im a di muor yu a-go lov im. Yu a-go du di sitn dem we Jeuova waahn yu fi du, an yu a-go waahn fi tel ada piipl bout di sitn dem we yu a lorn bout im tu. (2 Timoti 4:2; 1 Jan 5:3) So langks di sumadi a liv laik ou ‘Gad piipl fi liv an eva du di sitn dem we mek im api,’ den im kyan gi uova im laif tu Gad an get baptaiz.​—Koloshan 1:9, 10.a

Supuoz yu did a joun an sumadi siev yu? Yu wuda dis figet bout wa im du fi yu? Ar yu wuda du tingz fi mek im si se yu tangk im fi wa im du fi yu?

Wi uo Jeuova wi laif. Riid 1 Jan 4:8-10, an den wi a-go taak bout dem kwestiyan ya:

• Wa mek wi wuda se di gi op we Jiizas gi op im laif fi wi, a wan speshal prezent dat?

• Ou yu fiil bout wa Jeuova an Jiizas du fi yu?

Wa wi kyan du fi mek Jeuova an Jiizas si se wi tangk dem fi wa dem du fi wi? Riid 2 Korintiyan 5:15 an 1 Jan 4:11; 5:3. Afta evri skripcha wi a-go taak bout da kwestiyan ya:

• Bies pan da skripcha ya, wa wi fi du fi mek Jeuova an Jiizas si se wi tangk dem fi wa dem du fi wi?

Yu wuda se yu lov Jeuova muor nou dan wen yu did jos staat stodi di Baibl? Yu wuda waahn yu an im get kluos kluos an ton big fren? Ef a dat yu waahn, memba se di muor Jeuova si se yu lov im a di muor im a-go lov yu an tek kier a yu. Wa yu kyan du fi mek Jeuova si se yu lov im?

1. Wa wi kyan du fi mek Jeuova si se wi lov im?

Wen wi du wa Jeuova se wi fi du, wi shuo se wi lov im. (Riid 1 Jan 5:3.) Im no fuos nobadi fi du wa im se. Im gi evribadi di chaans fi disaid fi demself ef dem waahn fi du wa im se ar ef dem no waahn fi du it. Wa mek im du dat? Jeuova du dat kaa im waahn ‘wi fala im wid aal a wi aat.’ (Ruoman 6:17) So wa im riili waahn a fi yu du wa im se yu fi du, no kaa im fuos yu fi dwi’it, bot kaa yu lov im. Paat 3 an 4 iina da buk ya mek wi si di ting dem we wi fi du fi mek Jeuova si se wi lov im, an it mek wi nuo di sitn dem we im no waahn wi fi du tu.

2. Wa mek it mait-a aad somtaim fi du tingz fi mek Jeuova si se wi lov im?

“Di sumadi we a du wa Gad se rait a-go av uol iip a prablem.” (Saam 34:19) Aal a wi a sina, so muor taim wi fain it aad fi du di rait ting. An wi mait-a fain it aad fi mek a livin, ar fi get jostis an wi kuda av som ada prablem tu. Wen wi a go chuu som rof taim, it mait-a aad fi du wa Jeuova waahn wi fi du kaa wi mait-a fain it iiziya fi du di rang sitn. Bot wen yu mek shuor se yu du wa Jeuova waahn yu fi du, a da taim de yu shuo im se yu lov im muor dan notn els, an yu wi mek im si se yu a stik tu im no mata wa. An a dem taim de im a-go stik tu yu tu. Im naa go lef yu.​—Riid Saam 4:3.

4. Du tingz fi mek Jeuova api

Riid Pravorbz 27:11, an den wi a-go taak bout dem kwestiyan ya:

• Ou yu tingk Jeuova fiil wen yu du wa im waahn yu fi du? Wa mek im fiil so?

5. Yu kyan stik tu Jeuova no mata wa

VIDIYO: Tan Op Fi Wa Yu Biliiv Iina Aal Wen Piipl A Fait Gens Yu (5:09)

• Yu eva fain it aad fi tel ada piipl bout Jeuova?

• Iina da vidiyo ya, wa did elp Kevin fi no fried fi taak op bout wa im biliiv iina?

It iiziya fi wi stik tu Jeuova wen wi lov di sitn dem we im lov an iet di sitn dem we im iet. Riid Saam 97:10, an den wi a-go taak bout dem kwestiyan ya:

• Bies pan wa yu did lorn aredi, wa a som a di sitn dem we Jeuova lov an wa a som a di sitn dem we im iet?

• Wa kyan elp yu fi lov di sitn dem we gud an iet di sitn dem we bad?

6. Wi laif a-go betaraaf wen wi du di sitn dem we Jeuova waahn wi fi du

It aalwiez a-go ton out beta fi wi wen wi du wa Jeuova waahn wi fi du. Riid Aizaiya 48:17, 18, an den wi a-go taak bout dem kwestiyan ya:

• Yu tingk Jeuova aalwiez nuo wa a di bes ting fi wi? Wa mek yu se so?

• Wa gud it du fi yu aredi kaa yu a stodi di Baibl an a lorn bout Jeuova?

DIS A WA YU FI MEMBA

Yu kyan shuo Jeuova se yu lov im wen yu du wa im waahn yu fi du an stik tu im aal wen it no iizi fi yu du.

Wa yu did lorn iina da lesn ya?

• Wa yu lorn fram ou Juob did diil wid di sitn dem we im go chuu?

• Wa yu a-go du fi mek Jeuova si se yu lov im?

• Wa a-go elp yu fi stik tu Jeuova no mata wa?

CHEK OUT SOM MUO SITN

Fain out wa yu fi du so yu kyan stik tu Jeuova an di kanggrigieshan.

“Enibadi We Stik Tu Yu, Yu Stik Tu Dem Tu” (16:49)

Fain out muor bout wa Sietan kliem se a di riizn wa mek piipl a sorv Gad.

“Juob Liv Op An Du Wa Gad Waahn Im Fi Du” (Wa A Di Mesij We Iina Di Baibl? lesn 6)

Luk pan ou wi nuo se aal likl pikni kyan shuo se dem lov Jeuova.

Du Tingz Fi Mek Jeuova Api (8:16)

Ou wan yong sumadi kyan stik tu Gad aal wen ada yong piipl a presha im fi du wa rang?

No Du Di Bad Sitn Dem We Yu Fren Dem A Fuos Yu Fi Du! (3:59)