LESN 11
Ou di Prinsipl dem Iina di Baibl Kyan Elp Wi?
1. Wai wi niid dairekshan fi nuo ou fi du di rait ting iina laif?
Ou di prinsipl dem iina di Baibl kyan elp wi so dat wi no tek no chaans wid fi wi laif an wid ada piipl laif?—PSALM 36:9.
Fi wi Kriyieta waiza dan aal a wi. Bikaaz im a wan lovin Faada, im kier bout wi. Im neva mek wi fi dipen pan wi uona self. Im mek wi fi dipen pan im. (Jeremiah 10:23) Jos laik ou wan likl pikni niid dairekshan fram im mada an faada, a di siem wie wi niid dairekshan fram Gad. (Isaiah 48:17, 18) Di prinsipl dem iina di Baibl gi wi dairekshan iina laif, an dat a wan gif fram Gad.—Riid 2 Timoti 3:16.
Di laa an prinsipl dem we Jeuova gi wi tiich wi ou wi kyan liv iina di bes wie nou, an it shuo wi ou wi kyan get aal a di gud ting dem we Gad av in stuor fi wi. Sins a Gad mek wi, di rait ting fi wi du a fi shuo se wi grietful fi im dairekshan.—Riid Ruoman 15:4; Revilieshan 4:11.
2. Wa a Baibl prinsipl?
Baibl prinsipl a som jenaral chuut we iina di Baibl we kyan elp wi fi mek disijan iina difrant difrant sitiyieshan. Pan di ada an, di laa dem iina di Baibl tel wi egzakli wa wi fi du iina wan set sitiyieshan. (Deuteronomy 22:8) Wi afi tingk an andastan ou fi yuuz Baibl prinsipl iina difrant difrant sitiyieshan. (Proverbs 2:10-12) Fi egzampl, di Baibl tiich wi se laif a wan gif fram Gad. Da biesik prinsipl de kyan elp wi fi bi kierful wen wi a du tingz wen wi de a wi yaad, wen wi de a work, an wen wi a chravl op an dong.—Riid Aks 17:28.
3. Wa a di tuu mien Baibl prinsipl?
Jiizas did tel wi wa a di tuu muos impuotant prinsipl dem. Di fos wan mek wi nuo wa a di riizn wai Gad mek man. Im mek wi fi nuo Gad, fi lov im, an fi sorv im aluon fi eva. So wi fi tingk bout dis iina aal a di disijan dem we wi a-go mek iina laif. (Proverbs 3:6) An enibadi we liv dem laif bai da prinsipl de, dem an Gad a-go bi fren. Dem kyan fain chuu apinis, an dem kyan liv fi eva.—Riid Matyu 22:36-38.
Di sekan prinsipl kyan elp wi fi liv gud wid ada piipl. (1 Korintiyan 13:4-7) Wen wi put da prinsipl de iina praktis, wi chriit piipl ou Gad wuda chriit dem.—Riid Matyu 7:12; 22:39, 40.
4. Ou di prinsipl dem iina di Baibl kyan elp wi?
Di prinsipl dem we iina di Baibl tiich fambili ou dem kyan liv iina lov an yuuniti. (Koloshan 3:12-14) Di Baibl tiich wi se piipl uu marid supuoz tu stie tugeda an no lef dem wan aneda. Da prinsipl de elp fi protek di fambili so dat di fambili no mash op.—Riid Matyu 19:5.
Wen wi fala di tiichin dem we iina di Baibl, it protek wi. Wi av a kaam aat, an wi no afi wori bout di tingz dem we wi niid fi liv. Fi egzampl, di Baibl se piipl fi anis an dem fi work aad. (Proverbs 10:4, 26; Iibruu 13:18) A dem kwaliti de piipl a luk fa wen dem a luk fi sumadi fi work fi dem. Wan neda ting we Gad Wod tiich wi a dat wi fi satisfai wid di biesik sitn dem we wi niid fi liv, an fi put frenship wid Gad bifuo moni an aal a di ting dem we moni kyan bai.—Riid Matyu 6:24, 25, 33; 1 Timoti 6:8-10.
Wen wi liv wi laif akaadn tu we di Baibl se, it wi elp fi protek wi fram uol iip a tingz we wi ort wi. (Proverbs 14:30; 22:24, 25) Wen wi fala Gad laa we se wi no fi get jongk, wi kyan protek wiself fram aksident an fram diziiz we kyan kil wi. (Proverbs 23:20) Jeuova no av no prablem ef wi chuuz fi av a jringk, bot ef wi du dat wi mosn uova-dwi’it. (Psalm 104:15; 1 Korintiyan 6:10) Di prinsipl dem we Gad tiich wi elp wi fi kanchuol no onggl wa wi du, bot iivn we wi tingk bout. (Psalm 119:97-100) Bot chuu Kristiyan no onggl rispek evriting we Gad se jos bikaa a aal a di gud we dem kyan get outa it. Dem du it bikaa dem waahn gi Jeuova ana an rispek.—Riid Matyu 5:14-16.