LESN 12

Wa Kyan Elp Yu So Dat Yu No Tap Stodi Di Baibl?

Di Wan We Print

Wen yu gwaan stodi di Baibl no mata wa, it a-go wok out gud fi yu. Bot it naa go aalwiez iizi fi yu dwi’it. Som a di taim dem yu mait-a wanda ef yu a-go kyan gwaan stodi di Baibl. Bot wa mek yu no fi mek notn tap yu fram dwi’it, no mata wa a gwaan?

1. Wa mek it a-go gud fi yu ef yu stodi di Baibl?

“Kaaz wen Gad taak, a laik se di sitn dem we im se alaiv, av powa an kyan du tingz!” (Iibruu 4:12) It a-go gud fi yu fi stodi di Baibl kaa it a-go mek yu nuo ou Gad fiil bout tingz, an ou im fiil bout yu. It a-go mek yu nuo nof tingz. Bot no onggl dat, it a-go mek yu nuo wa’a di rait ting fi du, an it a-go mek yu av sopm gud fi luk faawod tu. Bot beta dan dat, it a-go mek yu an Jeuova ton gud gud fren. Wen yu stodi di Baibl, yu laif a-go betaraaf.

2. Wa mek a wan gud sitn fi wi si se di Baibl av wol iip a gud tingz iina it?

Di sitn dem we de iina di Baibl wot nof, dem komiin laik wan chrezha. Das wai di Baibl tel wi se: “Go afta chuut an bai it, an no eva eva sel it.” (Pravorbz 23:23) Wen yu aalwiez memba se it gud fi yu stodi di Baibl, yu naa go mek notn mek yu no du yu stodi.—Riid Pravorbz 2:4, 5.

3. A ou Jeuova kyan elp yu fi gwaan du yu stodi?

Jeuova a di muos powaful Sumadi eva. A im mek yu, an im a yu fren. An a im mek yu waahn fi du di sitn dem we im waahn yu fi du, ‘an a im gi yu di chrent fi du dem tu.’ (Riid Filipiyan 2:13.) Wen taim yu fiil laik se yu kyaahn bada wid yu stodi ar yu no iebl fi du di sitn dem we ya’a lorn, Jeuova kyan elp yu fi du dem. Eni kain-a elp we yu niid, im kyan gi yu it. So no tap prie tu Jeuova an aks im fi elp yu.—1 Tesaluoniyan 5:17.

LORN SOM MUO

Yu a-go lorn ou yu kyan gwaan stodi di Baibl aal wen yu av wol iip a sitn fi du ar wen piipl a fait gens yu kaaz a di sitn dem we ya’a lorn. Luk pan ou Jeuova kyan elp yu fi gwaan du yu stodi, no mata wa.

4. No mek notn tap yu fram du yu Baibl stodi

Wen yu fiil laik se yu av wol iip a sitn fi du an yu na’av no taim fi du yu Baibl stodi, ou yu kyan go nuo wa fi du? Riid Filipiyan 1:10, an den wi a-go taak bout dem kwestiyan ya:

Wa’a som a ‘di rait sitn dem’ we wi fi a du?
Ou yu kyan mek shuor se notn no tap yu fram du yu Baibl stodi?

A. Som picha we a shuo we apm wen yu a ful op sitn wid san an rakstuon. 1. Wan likl san iip an som rakstuon. 2. Wan sitn we aalmuos ful op a san. 3. Som a di rakstuon dem de pan di grong kaa aal a dem kudn uol iina di sitn wid di san.

B. Som picha: 1. Di siem san iip an di siem rakstuon dem. 2. Di siem sitn we aalmuos ful op wid di rakstuon dem. 3. Di sitn ful op wid di rakstuon dem an aalmuos aal a di san. Likl bit a di san lef bak pan di grong.

Ef yu put san iina sitn fos an den yu chrai fi put som rakstuon iina it, evriting naa go uol iina it gud
Bot ef yu put di rakstuon dem iina it fos, yu a-go av spies fi uol muor a di san. A siem so, “di sitn dem we rait” wen yu du dem fos, yu a-go av taim fi du di big ting dem iina yu laif we rait an den yu a-go av taim lef fi du som ada sitn

Wen wi stodi di Baibl, it a-go shuo se wi nuo se wi niid Gad iina evri wie. Riid Matyu 5:3, an den wi a-go taak bout da kwestiyan ya:

Ou it a-go elp wi wen wi no mek notn tap wi fram du wi Baibl stodi?

5. Gwaan du yu Baibl stodi aal wen piipl a chrai tap yu

Ya’a go av som taim wen yu fren dem ar yu fambili dem gweehn no waahn yu du yu Baibl stodi. Luk pan wa did apm tu Francesco. Plie di VIDIYO, an den wi a-go taak bout dem kwestiyan ya:

VIDIYO: Di Blesn Dem We Yu Get Wen Yu No Mek Notn Tap Yu Fram Lorn Bout Jeuova (5:22)

Wan likl paat fram di vidiyo we niem ‘Di Blesn Dem We Yu Get Wen Yu No Mek Notn Tap Yu Fram Lorn Bout Jeuova.’ Francesco waak we fram im fren dem afta im tel dem se im naa go spen no muor taim wid dem.

Iina di vidiyo, wen Francesco did tel im fren dem an im fambili dem bout di sitn dem we im did a lorn, a ou dem did gwaan?
Kaa im neehn tap im stodi, ou it did wok out fi im?

Riid 2 Timoti 2:24, 25, an den wi a-go taak bout dem kwestiyan ya:

Ou yu fambili an yu fren dem fiil bout di sitn dem we ya’a lorn?
Azkaadn tu dem vors ya, a wa yu fi du wen sumadi no laik se ya’a stodi di Baibl an waahn yu fi tap? An wa mek yu fi du dat?

6. Mek Jeuova bi di wan fi elp yu

Di muor yu get fi nuo Jeuova, a di muor yu gweehn waahn fi du di sitn dem we im waahn yu fi du. Bot a no aal di taim ya’a go fain it iizi fi du di sitn dem we im waahn yu fi du. Wen yu fiil so, no gi op, Jeuova wi elp yu. Plie di VIDIYO, an den wi a-go taak bout dem kwestiyan ya:

VIDIYO: Jeuova Elp Wi Fi Chienj Wi Laif Fi Di Beta (3:56)

Iina da vidiyo ya, so dat im kuda du di sitn dem we Jeuova waahn im fi du, wa an wa Jim did du?
Wa yu lov di muos bout wa Jim did du?

Riid Iibruu 11:6, an den wi a-go taak bout dem kwestiyan ya:

Wa Jeuova a-go du “fi di wan dem we a luk fi im aad aad” an we waahn fi mek im api?
Ou yu tingk Jeuova fiil wen im si yu a du evriting we yu kyan du fi stodi di Baibl?

SUMADI MAIT-A SE: “Wa mek ya’a stodi di Baibl?”

Ou yu wuda ansa?

DIS A WA YU FI MEMBA

Wen ya’a stodi di Baibl, it naa go aalwiez iizi fi yu dwi’it. Bot wen yu dwi’it, it a-go kyan mek yu liv fi eva. Jos gwaan chos iina Jeuova an im wi bles yu.