Dis A Tel Wi Bout Paat 1

Di fos ting we di Baibl tel wi bout a ou Jeuova mek evriting, an it mek wi nuo bout di nais sitn dem we im mek iina evn an pan di ort. Ef yu av wan pikni, elp dem fi nuo bout di uol iip a difrant difrant sitn dem we Jeuova mek. An elp dem fi si se Gad mek piipl difrant fram di animal dem, kaa wi kyan du tingz we dem kyaahn du. Laik wi kyan taak, tingk bout tingz, mek tingz, sing, an wi kyan prie. Elp dem fi si se Jeuova av nof powa an im waiz, an dem fi big im op fi dat. An mek dem si se Jeuova lov evriting we im mek, an dat miin se im lov aal a wi tu.